Yesaya 36 - Tonga Bible 1986

Nkhondo yaku Senakeribu pa Yerusalemu

¹ Mu chirimika cha chumi ndi vinayi cha karonga Hezekiya, Senakaribu karonga wa Asiriya wanguza kuzachilimbana ndi mizi yose ya malinga yaku Yuda ndi wanguyito.

² Ndipo karonga wa Asiriya wangutuma mathenga kutuliya kwaku Lakishi ku karonga Hezekiya pa Yerusalemu, pamoza ndi liŵanja la nkhondo. Ndipo wanguma pafupi ndi ngalande ya thaŵali la panena pa nthowa yakuya ku munda wa wakuchapa.

³ Ndipo kungubulika kwaku iyo Eliakimu mwana waku Hilikiya mweniyo watufuliyanga nyumba yose, ndi Shebna mlembi, ndi Joya mwana waku Asafi, mlembi wa makani.

⁴ Ndipo nthumi yo yinguti kwaku wo, “Mukakambi kwaku Hezekiya, ‘Karonga mura watiti, karonga wa Asiriya: mpha chine penipo uyegeme gomezgu lako ili?

⁵ Kumbi ughanaghana kuti mazu ghawaka mkhurwa ndipo ndi nthazi za nkhondo? Kumbi sono uyegeme paku yani po wandigarukiya?

⁶ Ehe, uyegeme paku Egipiti, ndodo ya dete liya lakuphwanyika lenilo likahomanga janja la munthu we yose wakuliyegeme. Viyo ndimu waliri Farao karonga wa Egipiti kwaku wose ŵakuyegeme pake.

⁷ Kweni asani ukatinge kwangu, “Tiyegeme pa Ambuya Chiuta widu,” kumbi kuti ndiyo cha mweniyo malo ghake gha visopo ndi viguŵa vya sembe Hezekiya wakunderezgapo, wangukamba kwaku Yuda ndi ku Yerusalemu, “Mukasopanga paurongo pa chiguŵa ichi cha sembe?”

⁸ Zanga sono ubeche ku mbuyangu karonga wa Asiriya: Ine ndikakupaskanga ŵakavalo 2,000 (vikwi viŵi) vinu kuchiri-kwako ungaziŵa kuŵa nawo ŵakugalapo paku wo.

⁹ Sono ungamudikiska uli mura wankhondo yumoza mukati mu ŵateŵeti ŵakumariya ŵa mbuyangu, penipo uyegeme pa Egipiti chifukwa cha magareta ndi ŵakugala pa ŵakavalo?

¹⁰ Nakweni-nako, kumbi ine ndaza kwambura Ambuya kuzachichiparghang'a charu ichi? Ambuya anguti kwaku ine, Ruta, kwera kwachirwa ndi charu ichi, ndi ukachiparghang'e.’ ”

¹¹ Sono Eliakimu, Shebna, ndi Joya ŵanguti ku muthenga, “Tipempha, ukambe ndi taŵateŵeti ŵako mu chi Aramu, pakuti titichiziŵa; reka kukamba nafwe mu lilime la chi Yuda mu makutu gha ŵanthu wo ŵe pa linga.”

¹² Kweni muthenga wanguti, “Kumbi mbuyangu wandituma kuzachikamba mazu yagha ku mbuya winu ndi kwaku imwe pe, ku ŵanthu wo ŵaja pa linga cha, wo ŵayungwiya pamoza namwe kurgha busu la ŵeneko ndi kumwa makozo ghaŵeneko?”

¹³ Sono muthenga wanguma ndi wangudanirizga ndi mazu kukambura mu lilime la chiYuda: “Avwani mazu gha karonga mura, karonga wa Asiriya!

¹⁴ Karonga watiti: ‘Wangampusikaninga Hezekiya, chifukwa kuti waziŵenge kumutaskani cha.

¹⁵ Hezekiya wangamuchitiskaninga kuyegeme pa Ambuya cha ndi mazu ghakuti, “Kwakuneneska Ambuya akatitaskanga, muzi uwu kuti ukapaskikanga mu manja gha karonga wa Asiriya cha.”

¹⁶ Mungategherezganga kwaku Hezekiya; pakuti karonga wa Asiriya watiti: Chitani chimangu ndi ine ndipo muzi kwangu, po ndipo we yose waku imwe wakarghanga vya mphereska yapa mtima wake, ndi we yose vya mkuyu wapa mtima wake, ndipo we yose waku imwe mukamwanga maji gha chisima chapa mtima wake;

¹⁷ mpaka penipo ndituza kuzachikutoleni ku charu chakukozgana ndi charu chapa mtima winu, charu cha kurgha ndi vinyo, charu cha chiŵande ndi minda ya mphereska.

¹⁸ Chenjeni vinu Hezekiya wangakusovyani ndi kukamba kuti, “Ambuya akatitaskanga.” Kumbi wakuwapo chiuta wa mitundu yo wakutaskapo charu chake ku janja la karonga wa Asiriya?

¹⁹ Ŵepani ŵachiuta ŵaku Hamati ndi Arpadi? Ŵepani ŵachiuta ŵaku Sefarvaimu? Kumbi wakumutaska Samaria ku janja langu?

²⁰ Mba chiutanji mukati mu ŵachiuta ŵa charu ichi ŵakutaska vyaru vyawo ku janja langu, kuti Ambuya angataska Yerusalemu ku janja langu?’ ”

²¹ Kweni ŵanguja chisisi kuti ŵangumwamuka nanga ndi mazu ghamoza cha, pakuti langulu la karonga lenga, “Mungamwamukanga cha.”

²² Sono Eliakimu mwana waku Hilikiya, yo wenga wakutufuliya nyumba yose, ndi Shebna mlembi, ndi Joya mwana waku Asafi, mlembi wa makani, ŵanguza kwaku Hezekiya ndi vivwalo vyawo vyakuparuka, ndipo ŵangumutauliya mazu gha muthenga yo.