Yesaya 35 - Tonga Bible 1986

Unkhankhu wa Ambuya

¹ Bozwa lo ndi charu chiyumu vikakondwanga, bozwa lo likasekerenga ndi kupasa;

² likachitanga maluŵa ghakupasiya; uli ndi hanyezi likachitanga maluŵa ghanandi. Kusangaruka ndi likondwa ndi kumba, unkhankhu wa Lebanoni ukapaskikanga kwaku lo, kuziza kwa Karmele ndi Sharoni. Ŵakawonanga unkhankhu wa Ambuya, kuziza kwaku Chiuta widu.

³ Khomeskani manja ghakutomboroka, khozgani makongono ghakupunduka.

⁴ Ku ŵa mtima wa mantha unene, “Nkhwimani, kopa cha! Ehe, Chiuta winu wakazanga ndi thayu, ndi kuwezge nduza kwaku Chiuta. Wakazanga kumutaskani.”

⁵ Sono maso gha ŵachiburumutiya ghakabanukanga, ndi makutu gha ŵamgota kuti ghagotenge cha,

⁶ ŵakupunduka ŵakaurukanga, uli ndi mphoyo, lilime la wambuwu likambanga ndi likondwa. Pakuti maji ghakatuwanga mu bozwa, ndi tumisinji mu charu cha chiparamba;

⁷ mchenga wakocha ukasandukanga thaŵali, ndi charu chiyumu chikaŵanga misisi ya maji; mwakuchezga ŵakambwe mukasandukanga viyaghayagha, uteka ukasandukanga matete ndi magumbwa.

⁸ Ndipo gurwi mukuru wakaŵanga kwenikuwa, ndipo ukadanikanga Nthowa Yakupaturika; ŵaukazuzi kuti ŵakendangamo cha, ŵabereŵeza kuti ŵakalakwiyangamo cha.

⁹ Nkharamu kuti yizengemo cha, chingana nchikoko nacho so kuzamo cha; kuti vikasanirikangamo muwa cha, kweni ŵakutaskika ndiwo ŵakendanga mwenimuwa.

¹⁰ Ndipo ŵakuwomboleka ŵa Ambuya ŵakawenga, ŵakazanga ku Zioni ndi kumba; kukondwa kwa muyaya kukaŵanga pa mitimu yawo; ŵakarondenga likondwa ndi chimwemwe, ndipo chitima ndi urwirwi vikathaŵanga.