Yesaya 34 - Tonga Bible 1986

Zuŵa la Ambuya

¹ Ndereni pafupi, mwa ŵa mitundu mwe, kuzachivwa, ndipo tegherezgani, mwa ŵanthu mwe! Charu chapasi chitegherezge, ndi vyose vyakuzaza mwake, charu, ndi vyose vyakutuwa mwaku cho.

² Pakuti Ambuya awurumiya mitundu yose, mbakari ukongwa ndi maŵanja ghawo; aŵasuska, aŵapereka kukubayika.

³ Ŵakubayika ŵawo ŵakapong'ekanga kubwaro, ndipo kununkha kwa viŵanda vyawo kukakuwanga; mapiri ghakapopomanga ndi ndopa zawo.

⁴ Liŵanja lose la kuchanya likavundanga, ndipo uli ndi mapepara mitambo yikazingikanga. Liŵanja lawo lose likawanga, nge ndimo mani ghawiya kutuwa ku mphereska, nge ndi mani ghatuwa kutuwa ku mkuyu.

⁵ Pakuti lipanga langu lamwa kwa mgutu mu machanya; ehe, lisikiya kwachichita cheruzgu pa Edomu, pa ŵanthu wo ndasuska.

⁶ Ambuya ŵendi lipanga; lakhorwa ndi ndopa, lakuruŵika ndi mafuta, ndi mafuta gha ŵana ŵamberere ndi mbuzi, ndi mafuta gha sana za ŵabira. Pakuti Ambuya ŵendi chisopo mu Bozra, kubaya kukuru mu charu cha Edomu.

⁷ Njati zikawiyanga nazo pamoza, ndi zakubama za mpupuka ndi nkhuzi zakulimba, charu chawo chikazumbwanga ndi ndopa, nyata yawo yikasambasanga ndi mafuta.

⁸ Pakuti Ambuya ŵendi zuŵa la thayu, chirimika cha chilangu chifukwa cha Zioni.

⁹ Tumisinji twa Edomu tukasandukanga urambwe nyata yake yikaŵanga fukunyira la moto; charu chake chikaŵanga urambwe wakukole.

¹⁰ Usiku ndi msana kuti ukazimwanga cha; usi wake ukakweranga muyaya. Kutuwa ku mugonezi kuya ku mugonezi unyake chikaŵanga mapopa; palivi yo wakaporotangamo muyaya ndi muyaya.

¹¹ Kweni kaŵandu ndi chinungu vikachiharanga, manchichi ndi chahole vikajanga mwenimo. Wakatambaruwanga chingwe chakutimbanizga pachanya pake, ndi chingwe chachimtimbaheka pa ŵakuzirwa ŵake.

¹² Ŵakachidananga zina Ufumu Mulive Muwa, ndipo nduna zake zose zikaŵanga vyaŵakaŵaka.

¹³ Minga yikamenga pa malinga ghake, kabata ndi kuchiwanga mu malo ghake ghakuvikiriya. Mukaŵanga mwakupikiskana ŵakambwe, mwakugona viyuni.

¹⁴ Ndipo vinyama vya mudondo vikakumananga ndi ŵapundu, barafisi wakaliriyanga ku munyake; inya, muwa mukabotanga ŵina chendausiku, ndi kujisaniriya malo gha chipumulu.

¹⁵ Muwa manchichi wakachitangamo chivumbu, kutayiya, kugonapo, ndi kuwunjika twana twake mu chiduzi chake; inya, ŵakakoŵa ŵaunganenge mwenimuwa, weyose ndimuwoli wake.

¹⁶ Penjani ndipo ŵerengani mu buku la Ambuya: Palivi nanga nchimoza chikaŵanga chambura muwoli wake. Pakuti mlomo wa Ambuya walangula, ndipo Mzimu wake waviwunjika.

¹⁷ Avichitiya mphenduzga, janja lake lavigaŵiya ndi chingwe cha mweso; vikachiharanga muyaya, kutuwa ku migonezi kuya kumugonezi vikajanga mwaku cho.