Yesaya 32 - Tonga Bible 1986

Muusu wa Karonga wakurunjika

¹ Ehe, karonga wakausanga mu ukongorekwa, ndipo mafumu ghakeruzganga mu urunji.

² Yumoza ndi yumoza wakaŵanga uli ndi malo ghakubisamamo ku mphepo, musana wakubisamako ku lirondo, nge nthumisinji twa maji mu charu chiyumu, nge nchiduzi cha jarawe likuru mu charu chakuvuka.

³ Sono maso ghaku wo ŵalereska kuti ghakasizimiyanga cha, makutu ghaku wo ŵatuvwa ghakategherezganga.

⁴ Mtima wa ŵabefu ukaŵanga ndi cheruzgu chamampha, ndipo lilime la ŵachimama likarongoronga kwakupusumpha ndi kwakuvwika.

⁵ Mubereŵeza kuti wakadanikanga so wakuzirwa cha, muthyanithyani kuŵa wa ulemu so cha.

⁶ Pakuti mubereŵeza warongoro ubereŵeza mtima wake utata mphurupuru: kwachichita uchikanamarangu, kurongoro gha kusovya pa Ambuya, kujowo kupaska wanja vyo wanweka ndi kunora maji wanyota.

⁷ Mauthyanithyani gha muthyanithyani nkhulakwa; watata vipangu vya utimbanizi, kubwanganduwa ŵasauchi ndi mazu gha utesi, chingana makani gha msokwa ghangarunjika.

⁸ Kweni yo ngwakuzirwa wapanga vinthu vyakuzirwa, ndipo watuma mu vinthu vyakuzirwa.

Ŵanthukazi ŵamu Yerusalemu

⁹ Sokani imwe, mwaŵanthukazi mwaja kwakufwasa, vwani kakambidu kangu, mwaŵana ŵanthukazi ŵambura kuphwereko, tegherezgani gutu ku mazu ghangu.

¹⁰ Pakurutapo chirimika ndi kanyengo kamanavi mukatenthemanga, mwa ŵanthukazi, ŵambura kughanaghanako, pakuti kuvuna kwa mphereska kukatondekanga, kuvuna kwa vipasi kuti kukazanga cha.

¹¹ Tenthemani, mwa ŵanthukazi ŵakufwasa imwe, tenthemani, mwa ŵambura kughanaghanako kanthu; zuwani, mujijarike nkhuli, ndi vwarani vigudulu mu viunu vinu.

¹² Khung'uskani pa vifuŵa vinu chifukwa cha minda ya kunozga, chifukwa cha mphereska zakuzara,

¹³ pakuti mu nyata ya ŵanthu ŵangu mwame minga ndi kankhande, inya, chifukwa cha nyumba za kukondwa mu muzi walikondwa.

¹⁴ Pakuti nyumba ya ufumu yikajowolekanga, msumba wa ŵanthu ŵanandi ŵakawuthaŵanga; mtunthu ndi sonjo waulonda vikaŵanga zimphanji muyaya, likondwa la ŵaboli, malo gha uliska wa vyakuŵeta,

¹⁵ mpaka penipo Mzimu wakutuliya kuchanya wadika paku ifwe, ndi bozwa lisanduka munda wakupasa, ndi munda wakupasa uneneka kuti ndi lisuwa.

¹⁶ Sono cheruzgu chirunji chikajanga mu bozwa, ukongorekwa ukajanga mu munda wakupasa.

¹⁷ Ndipo ukongorekwa ukabaranga viyo chimangu, ndipo chakutuwa mu ukongorekwa, nchisisi, ndi chigomezgu muyaya.

¹⁸ Ŵanthu ŵangu ŵakajanga mu uja wa chimangu, mu vyakujamo vyakukho, ndi mu malo ghachipumulu gha chisisi.

¹⁹ Lisuwa likasikanga ukongwa, ndipo muzi ukawiskikanga limu pasi.

²⁰ Mwa ŵakukondwa ndimwe mwa ŵakuseŵa pafupu ndi maji, imwe muzomerezga ng'ombe ndi mbunda vyendengemo kwawanangwa.