Yesaya 31 - Tonga Bible 1986

Soka la ŵakugomezga chovyu ku Egipiti

¹ Soka kwaku wo ŵasikiya ku Egipiti kupenja chovyu ndipo ŵagomekezga mu ŵakavalo, wo ŵagomekezga mu unandi wa magareta ndi mu ŵakukwera pa ŵakavalo pakuti mba nthazi ukongwa, kweni kuti ŵalereska ku Mtuŵa Yumoza yo waku Yisraele cha, pamwenga kufumba Ambuya!

² Ndi kweni iyo ngwa zeru ndipo wapaska phasulu, kuti wawezge vuli mazu ghake cha, kweni wakamikananga ndi nyumba ya ŵakuchita uheni, ndi pa ŵakovya wo ŵatata utimbanizi.

³ ŴaEgipiti mbanthu, kuti ndi Chiuta cha; ndipo ŵakavalo ŵawo ndi nyama, kuti ndi mzimu cha. Penipo Ambuya atambaruwa janja lawo, wakovya wakaguŵanga, ndipo wakovyeka yo wakawanga, ndipo wose ŵamariyenge pamoza.

⁴ Pakuti viyo ndimu Ambuya angundinene, Nge ndimo nkharamu pamwenga nkharamu ya mpupuka yikorome pa nyama yake, ndi penipo mpingu wa ŵaliska wadanikiyako kulimbana nayo kuti yitofyerwa ndi kukambura kwawo cha pamwenga kuthaŵa chifukwa cha chiwawa chawo, viyo Ambuya ŵa maŵanja akasikanga kuzachirwa pa phiri Zioni ndi pa kamtunthu kake.

⁵ Uli ndimo viyuni vikupakupiya, viyo ndimu Ambuya ŵa maŵanja akavikiriyanga Yerusalemu, akauvikiriyanga ndi ku utaska, akawusunganga ndi kuwupozomoska.

⁶ Wereni kwaku iyo mweniyo imwe mwagarukako ukongwa, mwa ŵanthu mwe ŵaYisraele.

⁷ Pakuti mu zuŵaliya munthu yose wakatayanga ŵangoza ŵake ŵasiliva ndi ŵangoza ŵake ŵa golide, ŵeniwo manja ghinu ghamuchitiyani mu mphurupuru.

⁸ “Ndipo ŵaAsiriya ŵakawanga ndi lipanga, la munthu cha, ndipo lipanga, la munthu cha, likamumaranga, wakathaŵanga ku lipanga lo, ndipo ŵanyamata ŵake ŵakaŵikikanga pa nchitu yakuchichizgika.

⁹ Jarawe lake likarutanga mu chofyo, ndipo nduna zake zikayithaŵanga mbendera mu mantha,” atiti Ambuya, wo moto wawo wemu Zioni, ndi ng'anjo yawo ye mu Yerusalemu.