Yesaya 3 - Tonga Bible 1986

¹ Pakuti, ehe, Ambuya, Ambuya ŵa maŵamja, atuzgamo mu Yerusalemu ndi mwaku Yuda nchilikiliro ndi ndodo, nchilikiliro yose ya chiŵande ndi nchilikiliro yose ya maji,

² munthu wakulimba ndi msilikari, mweruzgi ndi mchimi, chanusi ndi mura,

³ nduna ya liŵanja la machumi ghankhonde ndi munthu wapachanya, wa upu ndi wakuloska wazeru ndi wakuziŵa ukongwa mayera.

⁴ Ndipo ndikachitanga ŵahurwa kuŵa ŵeruzgi ŵawo, malitema ndigho ghakaŵawusanga.

⁵ Ndipo ŵakayuzgananga uyu ndi munyake, munthu yose pa munyake we yose pa mwenasi wake; ŵanyamata wakaŵanga ŵa mwanu ku ŵara, ndi ŵa pasi ku ŵanthu ŵakuzirwa.

⁶ Penipo munthu wakakonga mwana munyake mu myumba ya awiske, wakatinge, “Wendi chirundu, ukaŵanga murongozgi widu. Ndipo ndundu iyi ya vyakuphwanyika yikaŵanga pasi pa mtufu wako”;

⁷ mu zuŵa liya wakarongoronga pakweru, kuti: “Kuti ndikaŵanga wakuchizga cha; mu nyumba yangu mulivi chiŵande pamwenga chirundu; kuti undichitenge ine kuŵa murongozgi wa ŵanthu cha.”

⁸ Pakuti Yerusalemu waguŵa, ndipo Yuda wawa; chifukwa mazu ghawo ndi nchitu zawo vilimbana ndi Ambuya, kuyuyuwa kuŵapo kwawo kwa unkhankhu.

⁹ Ŵakaboni ŵawo ŵatesi ŵachita ukaboni paku wo, ŵamemeza uheni wawo nge ndi Sodomu, kuti ŵatiwubisa cha. Owe kwaku iwo! Pakuti ŵajitole uheni pa ŵeneko.

¹⁰ Unene ŵarunji kuti kukaŵanga umampha kwaku iwo, pakuti ŵakarghanga vipasi vya nchitu zawo.

¹¹ Owe ku muheni! Kukamuŵiyanga uheni, pakuti vyo manja ghake ghachita vikachitikiyanga kwaku iyo.

¹² Ŵanthu ŵangu ŵayuzgika ndi ŵana, ŵanthukazi ndiwo ŵatiŵawusa. Owe mwa ŵanthu ŵangu, ŵarongozgi ŵinu ŵakumupuruskani, ŵakutimbanizga mendedu gha nthowa zinu.

¹³ Ambuya ato malo ghawo kulimbana, asoka kweruzga ŵanthu ŵawo.

¹⁴ Ambuya asere mu cheruzgu kumikana ndi ŵara ndi nduna za ŵanthu ŵawo: “Ndimwe mwaparghang'a munda wamphereska, muskowo wa ŵasauchi we mu nyumba zinu.

¹⁵ Mung'anamu wanji pakuphanga, ŵanthu ŵangu, pa kupera chisku cha ŵasauchi?” atiti Ambuya Chiuta wa maŵanja. Ŵanthukazi ŵaku Zioni

¹⁶ Ambuya anguti: Chifukwa ŵanthukazi ŵaZioni mbakujikuzga ŵatenda ndi makhosi ghakunyutuka, ŵavwikuwa ndi dama maso ghawo, ŵachita kuchakatuka ŵachenda, ŵaswaya ndi marundi ghawo;

¹⁷ Ambuya akakosonga ndi vitupatupa, mitu ya ŵanthu ŵaZioni, ndipo Ambuya akaŵajarikanga nkhuli.

¹⁸ Mu zuŵa leniliya Ambuya akatuzgangapo kunozga kwa vijeweli, chifuku chaku mutu, ndi mphande;

¹⁹ ndiŵereŵi, makoza, ndi mikanda;

²⁰ ŵatwiya, vikono, ŵalamba supa za vyachema ndi zimphiyu;

²¹ mphete za pa janja ndi vipini;

²² maraya gha dghera ndi viphemeska, maraya gha kuphimba kubwaro, ndi vikwama;

²³ minjirira ya usingiti, ndi minjirira yakuwolofoka, vilemba, ndi vivwinkhu.

²⁴ Mu malo gha vyachema mukaŵanga vya kuvunda; ndipo mu malo mwa lamba, mukaŵanga luzi, mu malo mwa sisi lamampha lakupesa, phara; ndipo mu malo mwa munjirira wakuzirwa, muŵenge chizombezga cha chigudulu; mu malo ghakusangaruka, muŵenge soni.

²⁵ Ŵanthu ŵinu ŵakamaranga ndi lipanga ndi vilimbi vinu mu nkhondo.

²⁶ Ndipo malikomo ghake ghakatenjenga ndi kuliya; wakubwanganduka, wakajanga pa dongo.