Yesaya 28 - Tonga Bible 1986

Chenjezgu ku ufumu waku Nkhonde wa ŵaYisraele

¹ Soka ku chilemba cha ufumu cha ŵakulowe ŵaku Efraimu, ku luŵa lake lakusanduka la unkhankhu wake wakutowa, lo le pa mutu wa dambo lisambasi laku wo mbakuloŵe vinyo!

² Ehe, Ambuya ŵe nayo yumoza yo ngwakulimba ndi wanthazi, uli chimphunga cha nya, lirondo lakubwanganduwa, uli nchimphunga cha kulimba, chakusapatiska maji, wakapong'anga pa charu chapasi ndi ukari.

³ Chilemba cha ufumu chakujikuzga cha wakulowe waku Efraimu chikapwatikiyanga kusi ku rundi;

⁴ ndi luŵa lake la msanduka la unkhankhu wake wakutowa, lo le pa mutu wa dambo lisambasi, likaŵanga nge ndi nkhuyu yakudanga kufya chifuku chenga chindafike: munthu wachiyiwona, watiyirgha asani ye mu janja lake.

⁵ Mu zuŵa liya Ambuya ŵa maŵanja akaŵanga chilemba cha ufumu cha unkhankhu, chifuku cha ufumu cha kutowa, ku ŵanthu ŵake ŵakujapo;

⁶ mzimu wa cheruzgu chirunji kwaku yo waja mu cheruzgu, ndi nthazi kwaku wo ŵawezge vuli homwa pa chipata.

Yesaya ndi ŵamchimi ŵakuroŵe ŵaku Yuda

⁷ Yaŵa nawo ŵazendazenda ndi vinyo ŵazendazenda ndi vyakumwa vyakuloŵereska; mzukuru ndi mchimi ŵazendazenda ndi vyakuloŵereska, ŵatimbanizgika ndi vinyo, ŵazendazenda ndi vyakuloŵereska, ŵananga mu chiwona, ŵaguŵa pakupaska cheruzgu.

⁸ Pakuti magome ghose ghazaza maukuzi, palivi malo ghambura ukazuzi.

⁹ “Mbayani wo ŵakarunguchizganga zeru, ndipo nkhwakuyani ko wakonkhoskiyenge uthenga? Wo ŵakuleka konkha, wo ŵakutuzgikako ku maŵe?

¹⁰ Pakuti ndi langulu pa langulu, langulu pa langulu, mzere pa mzere, mzere pa mzere, pano kamanavi, kuwa kamanavi.”

¹¹ Awa, kweni ndi ŵanthu ŵa milomo yamwenga ndi lilime lilendo Ambuya akarongoronga ndi ŵanthu ŵawo,

¹² kwaku wo weke “Ichi nchipumulu; pumuzgani ŵakuvuka, ndipo uku nkhuweremo nthazi;” ndipuuli kuti ŵatuvwa cha.

¹³ Chifukwa cho mazu gha Ambuya kwaku iwo ghakaŵanga langulu pa langulu, langulu pa langulu, mzere pa mzere, mzere pa mzere, pano kamanavi, kuwa kamanavi, kuti ŵarutenge, ndi kuwiya kuvuli, kufyoda, kurghika, ndi kutoleka.

¹⁴ Chifukwa cho vwani mazu gha Ambuya, mwa ŵankharghi, imwe muteruzga ŵanthu mu Yerusalemu!

¹⁵ Pakuti mwakamba kuti, “Tachita phanganu ndi nyifwa, ndi muunda tazomerezgana; asani likhwechu likuru lakapo kuti likazanga kwaku ifwe cha, pakuti maboza ndigho tato kuŵa chakudingang'amo chidu, ndipo mu utesi ndimo tabisama;”

¹⁶ chifukwa cho Ambuya Chiuta, atati, “Ehe, ndiŵika mu Zioni chiŵanja mwa, mwa wakweseka, mwa wanyondo wakuzirwa, wa chiŵanja chakuneneska: ‘Yo wavwana kuti wakatolekanga cha.’

¹⁷ “Ndipo ndikachitanga cheruzgu chirunji kuŵa chingwe, ndi urunji chingwe chakumikiya kwakinyoroska; vuwa ya matalala yikapeyanga mphanji ya maboza, maji ghakaburumutizganga malo ghakubisamapo.”

¹⁸ Sono phanganu linu ndi nyifwa likamaranga ndipo kuzomerezgana kwinu ndi nyifwa kuti kukaŵangapo cha; penipo likhwechu likuru lijumpha mukapumikanga nalo.

¹⁹ Nyengo zose lichiporotapo likamutoninga; pakuti mlenji ndi mlenji, likaporotangapo, msana ndi usiku; ndipo chikaŵanga chofyu chiduru kuwamo uthenga wo.

²⁰ Pakuti chita nchifupi ukongwa kutambalapo wa munthu, ndipo chakuvwinkha nchifinyi ukongwa kujivwinkha mwaku cho.

²¹ Chifukwa Ambuya akasokanga uli mpha phiri Perazimu, akakaripanga uli ndi mu dambo la Gibeoni, kuchita nchitu yawo, nchitu yawo njachilendo! Ndi kutakataka nchitu yawo, nchitu yawo nja chilendo!

²² Viyo sono munganyozanga cha, vinu vimangiru vinu vingalimba, pakuti ndavwa langulu la phasulu kutuwa ku Ambuya Chiuta wa maŵanja pa charu chose.

²³ Tegherezgani gutu, muvwe mazu ghangu, tegherezgani, muvwe cho ndikakambanga.

²⁴ Kumbi yo walimiya kuti wapande walima kwakurutiriya? Kumbi wagaluwa ndi kukong'ontha kwakurutiriya?

²⁵ Asani wayaniska dongo lake pachanya, kuti wamija cha ndi kupanda chitoŵe, kupanda trigu mu mizere barle mu malo ghake ghamwenera, ndi mapira nge ndi mphaka?

²⁶ Pakuti wapangizgika umampha, Chiuta wake watimurunguchizga.

²⁷ Maŵe kuti wapuntha ndi chakupunthiya cha, chingana ndirundi la gareta kuti ŵatilendeska pachanya chitoŵe cha; kweni maŵe akhwema ndi kamuti, chitoŵe akhwema ndi ndodo.

²⁸ Kumbi kupera kwa kamoza kunanga trigu? Awa, kuti wangapereke limu kwa kamoza pe cha; wachendeska mkombelo wa gareta lake pachanya pake ndi ŵakavalo ŵake, kuti ŵasilikiya limu cha.

²⁹ Ichi nacho chituliya ku Ambuya ŵamaŵanja; aziziswa mu upu wawo, mbakunozga ukongwa mu chinjeru.