Yesaya 26 - Tonga Bible 1986

Gomezgu la ŵaYuda

¹ Mu zuŵa liya sumu iyi yikambikanga mu charu chaku Yuda: “Tendi muzi wakukho; wamika utaski nge ndi malinge ndi lisitu.

² Jurani malikomo, mwakuti mtundu wakurunjika wo usunga chivwanu useremo.

³ Mutimusunga iyo mu chimangu cheneko, mweniyo mtima wake ukula pinu, chifukwa wagomekezga mwaku imwe.

⁴ Gomekezgani mu Ambuya muyaya, pakuti Ambuya Chiuta ndi jarawe la muyaya.

⁵ Pakuti ŵasiskiya pasi ŵakuja pachanya mu muzi wa pachanya. Ŵausiskiya pasi, kuusiskiya pasi pa dongo, ŵaupong'a pa fuvu.

⁶ Rundi lipwatapo, marundi gha ŵasauchi, nthangara za ŵakavu.”

⁷ Nthowa ya ŵarunji njakutambara, ndimwe munyoroska nthowa ya ŵakurunjika.

⁸ Mu nthowa ya vyeruzgu vinu, Ambuya, titumulindizgani, zina linu lakukumbukika ndilo linweka la mzimu widu.

⁹ Mzimu wangu unweka imwe ndi usiku, mzimu mukati mwangu upenja imwe ndi linweka. Pakuti asani vyeruzgu vinu vye mu charu chapasi, ŵakuja mu charu ŵasambira urunji.

¹⁰ Asani mwaŵi upaskika ku muheni kuti wasambira urunji cha, mu charu cha ŵakutowa mu mtima iyo wachita utimbanizi ndipo kuti watiuwona cha unkhankhu wa Ambuya.

¹¹ Ambuya, janja linu lasoskeka, kweni kuti ŵatiliwona cha. Ŵarekeni ŵawone mwamphu winu pa ŵanthu ŵinu ndi ŵachiti soni. Moto ŵakupindikana ŵinu uŵamare.

¹² Ambuya mwe, mukatichitiyanga chimangu ifwe, mwatilongosole ifwe nchitu zidu.

¹³ Ambuya Chiuta widu, ambuya ŵanyake ŵatiusa ifwe, kweni zina linu pe ndilo ifwe tizomera.

¹⁴ Iwo ŵakufwa, kuti ŵakaŵanga ŵamoyo cha; ndi mizguka, kuti ŵakayukanga so cha, chifukwa ichi imwe munguchezga nawo ndi phasulu ndipo mungusisita chinkhumbu chawo chose.

¹⁵ Kweni imwe mwakuzga mtundu, Ambuya, mwa ndaniska mtundu; mwakankhuskika imwe, mwakuzga mphaka zose za charu.

¹⁶ Ambuya mwe, mu suzgu ŵangukupenjani, ŵangupereka rombu, penipo likhwechu linu lenga paku iwo.

¹⁷ Uli ndi munthukazi wa paluŵavu, yo wagadabuka-gadabuka ndi kuliya mu urwirwi wake, po waŵandika ku nyengo yake, viyo ndimu tinguŵiya ifwe chifukwa chinu, Ambuya,

¹⁸ tenga ndi pa liŵavu tingugadabuka, gadabuka, taŵa ulaka tapapa mphepo. Tilivi kuchitamo utaski mu charu, ndipo ŵakuja mu charu ŵalivi kuwa.

¹⁹ Ŵakufwa ŵinu ŵakaŵanga ŵamoyo, maliŵavu ghawo ghakayukanga. Okwe mwa ŵakuja mu fuvu imwe! Yukani, mbani gha chimwemwe! Pakuti dungwi linu ndi dungwi la ukweru, ndipo charu chikatoriyanga so ku umoyo mizimu yaku wo ŵakufwa kale.

²⁰ Zaninga, mwa ŵanthu ŵangu, sereni muvipinda vinu, jarani visasa kuvuli kwinu, bisamani kwa nyengo yimanavi mpaka penipo ukari wakapo.

²¹ Pakuti ehe, Ambuya atuza kutuwa mu malo ghawo, kuzachilanga ŵakuja mu charu pa chifukwa cha kwananga kwawo, ndipo charu chazamvumbuwa ndopa zakudikiya paku cho, ndipo kuti chikabisanga so ŵakubayika ŵake cha.