Yesaya 23 - Tonga Bible 1986

Gha pa Turo

¹ Ghakukambika gha pa Turo. Tenjeni mwa ngaraŵa zaku Tarshishi, pakuti Turo wachitika mapopa, walivi nyumba pamwenga phota! Kutuliya ku charu cha Kupro chavumbulika kwaku wo.

² Mutaka cheti, mwaŵakuja mu likumba, mwa ŵamalonda ŵa Sidoni; mathenga ghinu ghangwambuka nyanja wenga mu maji ghanandi.

³ Kuza kwauromba winu kwenga kurgha kwa Shihora, vuna wa Nile, mwenga ŵamalonda ŵa mitundu.

⁴ Uŵi ndi soni, Sidoni we, pakuti nyanja yakamba, linga la nyanja, lititi: “Ndilivi kuvwapo urwirwi chingana nkhupapa, ndilivi chingana nkhulerapo ŵana ŵahurwa pamwenga kukuzga ŵamwali.”

⁵ Makani ghachituwa ku Egipiti, ŵakawanga mu suzgu pa kuvwa makani gha Turo.

⁶ Rutani ku Tarshishi, tenjeni, mwa ŵakuja mu likumba!

⁷ Kumbi uwu ndiwu muzi winu wa upundi weniwo chiyambo chake ncha mazuŵa ghamwaka, wo marundi ghake ghanguwunyamuwa kwachizengeka patali?

⁸ Njani yo waghanaghaniya ichi paku Turo, wakuvwarika zimphumphu, mweniyo ŵamalonda ŵake ŵenga ŵeruzgi, yo ŵakuguliska ŵake ŵenga ŵakutumbikika ŵa charu chapasi?

⁹ Ambuya ŵa maŵanja ndiwo akuchighanaghana ichi, ku fipiska kujikuzga kwa unkhankhu wose, kuyeya ŵakutumbikika ŵa charu chapasi.

¹⁰ Sapatiskani charu chinu nge ndi msinji wa Nile, mwa ŵamu Tarshishi; kulivi so kukanizga.

¹¹ Watambaruliya janja lake pa nyanja, wasukuniska maufumu, Ambuya alangula gha pa Kanani kubwanganduwa malinga ghake.

¹² Ndipo iyo wanguti, “Kuti mukakondwanga so cha, mwa ŵanthu ŵakuyuzgika ŵamu msumba wa Sidoni, yuka, dumuwapo rutanga ku Kupro kuwa nako kuti ukaŵanga ndi chipumulo cha.”

¹³ Ehe charu cha ŵaKaldiya! Ŵanthu mbeneŵa, kuti ŵenga Asiriya cha. Ŵangutondo Turo kuŵamo nyama za mdondo. Ŵanguzenga vitanthali vyawo vyakukhazgiya, ŵangubwanganduwa nyumba zake za ufumu ŵanguwuchita kuŵa mapopa.

¹⁴ Mutenje mwangaraŵa za Tarshishi, pakuti linga linu lachitika mapopa.

¹⁵ Mu zuŵa liya Turo wakaruwikanga kwa virimika machumi ghankhonde ndi ghaŵi (70), uli ndi mazuŵa gha karonga yumoza. Pa umari wavirimika machumi ghankhonde ndi ghaŵi, kukamuŵiyanga Turo nge ndi mu sumu ya munthukazi mureŵi:

¹⁶ “To pangwi, ruta, uku ndi uku mu muzi, wamunthukazi murewi wakuruwika! Kowera nkhowera yakunozga, mbanga sumu zinandi, alinga kuti ukumbukike.”

¹⁷ Pa umari wa virimika machumi ghaŵi, Ambuya akachezganga ndi Turo, ŵakawerenga ku nchitu yake ya mphoto, ndipo ŵakachitanga dama ndi maufumu ghose gha charu pa chisku cha charu chapasi.

¹⁸ Malonda ghake ndi mphoto yake vipaturikiyenge ku Ambuya, kuti ghakaŵikikanga pamwenga kusungika cha, kweni malonda ghake ghakapaskanga kurgha kwakuzara ndi vivwaro vyamampha kwaku wo mbakuja paurongo pa Ambuya.