Yesaya 22 - Tonga Bible 1986

Ghapa Yerusalemu

¹ Ghakukambika gha pa dambo la chiwona. Mung'anamuwanje po mutiti mwakwera, mose mwe pachanya pa zinyumba,

² imwe mwazazika ndi kubongo, kuti wa chiwawa, muzi, wakujitumphuska? Ŵakubayika ŵinu kuti ŵabayika ndi lipanga cha pamwenga kufwiya mu nkhondo.

³ Ŵeruzgi ŵinu wose ŵathaŵiya pamoza, ŵanguyoreka kwambura uta. Imwe mose mungusanirika munguyoreka, chingana ŵanguthaŵiya kutali.

⁴ Chifukwa cho ine ndinguti: “Lereskani kunyake kutuwako kwangu, ndirekeni ndiliyi masozi ghakuŵaŵa; mungatakatakiyanga kundisangaluska cha chifukwa chakumara kwa ŵanthu ŵangu.”

⁵ Chifukwa Ambuya Chiuta ŵa maŵanja ŵendi zuŵa la chiwawa ndi lakupwatiya ndi kutimbanizga, mu dambo la chiwona, kubwanganduliya pasi amlinga ndi kukambula mu mapiri.

⁶ Elami wanguto phodo pamoza ndi magareta ndi ŵa pakavalo, ndipo Kiri wangusotopo nguru.

⁷ Madambo ghinu ghakusankhika ghanguzazika ndi magareta, ndi ŵapakavalo ŵanguthaza pa malikomo.

⁸ Watuzgapo chivwinkhu chaku Yuda. Mu zuŵa liya mungulereska ku vidya vya nyumba yaku Lusuwa,

⁹ ndipo munguwona kuti kusweka kwa muzi waku Davidi kwenga kunandi, munguunjika pamoza maji gha chisima cha kusika,

¹⁰ munguŵerenga nyumba zamu Yerusalemu, ndipo mungubwanganduliya pasi nyumba kuvikiriya linga.

¹¹ Munguchita chakusungamo maji pakati pa malinga ghaŵi gha maji gha chisima chakale. Kweni kuti mungulereska kwaku yo wanguchichita cha chingana nkhumuphwere yo wanguchinozga umampha mu mazuŵa gharuta.

¹² Mu zuŵa liya Ambuya Chiuta wa maŵanja wangulangula kuliya ndi kutenje, kumeta maphara ndi kuvwara vigudulu;

¹³ ndipo ehe, chimwemwe ndi kukondwa, kubaya ng'ombe, ndi kubaya mberere, kurgha nyama ndi kumwa vinyo. “Tiyeni tirghenge ndi kumwa, pakuti lamawa tikafwanga.”

¹⁴ Ambuya ŵa maŵanja ajivumbuwa ŵeneko mu makutu ghangu: “Kwakuneneska ulakwi uwu kuti mukagowokerekiyanga cha, mpaka mukafwanga,” atiti Ambuya Chiuta wa maŵanja.

¹⁵ Viyo atiti Ambuya Chiuta wa maŵanja, “Zanga, ruta ku mlinda wa nyumba uyu, ku Shebna, mweniyo watufuliya nyumba yose, ukati kwaku iyo:

¹⁶ Uchitanji kuno ndipo njani yo we nayo, pakuti kuno wachongako muunda waku wamweni, iwe wakuchonga muunda munena, ndi kujiseme chakujamo wamwene mu jarawe?

¹⁷ Ehe, Ambuya akakudikiskanga uheni-uheni, wa munthu we wakulimba. Akakufyekanga ukongwa,

¹⁸ ndi kukuzungung'a uku ndi uku ndi kukupong'a uli ndi mpila mu charu chisani; ufwiyenge mwenimuwa, ndipo mwenimuwa mukaŵanga magareta ghako ghamanyanda, upaska soni nyumba yambuyako.

¹⁹ Ndikakudikiskanga pa nchitu yako, ndipo ukatuzgikangapo pa malo ghako.

²⁰ Mu zuŵa liya ndikadananga muŵanda wangu Eliakimu mwana waku Hilkia,

²¹ ndikamuvwarikanga munjirira wako, ndi kumumanga likwamba lako, kumupaska mu janja lake mtufu wako, ndipo wakaŵanga wiske ku ŵakuja mu Yerusalemu ndi ku nyumba yaku Yuda.

²² Ndipo ndikaŵikanga pa phewa lake mpiringizgu wa nyumba yaku Davidi, wakajuranga, ndipo paulengevi wakujara, wakajaranga ndipo paulengevi wakujura.

²³ Ndikamujinthanga uli nchichiri mu malo gheneko, ndipo wakaŵanga chitengo cha ufumu cha ulemu ku nyumba ya awiske.

²⁴ Wakapayikanga pake uzitu wose wa nyumba ya awiske, ŵana ndi mphapu, chiyaŵi chose chimana, kwamba ku chandi mpaka ku vyakumwiyamo vikuru.

²⁵ Mu zuŵa liya, atiti Ambuya ŵa maŵanja, chichiri cho chingujinthika mu malo gheneko chikajinthukanga; chikadumulikanga ndi kuwa, ndipo uzitu wo wenga paku cho ukadumulikanga, pakuti Ambuya ndiwo akamba.”