Yesaya 21 - Tonga Bible 1986

Ghapa Babiloni

¹ Vyakukambika vyapa bozwa la nyanja. Mo ŵakavuruvuru mu Negebu ŵaputiya kutuwa ku bozwa mu charu chakofya.

² Chakuwona chizitu chataulika kwangu; wakukwamphuwa wakwamphuwa, wakubwanganduwa wabwanganduwa. Kweliyangako, Elami we, kazenge misasa Media we, kutata kose kwanthazi ko wachitiska iyo ndikamariskanga.

³ Chifukwa cho chiunu changu chazazika ndi suzgu; urwirwi wandikwetere, uli mburwirwi wa munthukazi yo wapapa; ndakotama pasi viyo kuti nditondeka kuvwa, ndagongowa viyo kuti nditondeka kulereska.

⁴ Mtima wangu ugunda, vyakofya vyandofya ukongwa, kucha ko ndingunweka kwandisandukiya ine kuŵa chofyo.

⁵ Ŵarongoso gome, ŵatandika ŵa chali, ŵaturgha, ŵatumwa. Yukani, mwa ŵeruzgi mwe, pakani nguru ndi mafuta!

⁶ Pakuti Ambuya angukamba viyo kwangu: “Ruta, kamiki mulonda, wataule vyenivyo wawona.

⁷ Wachiwona ŵakukwera pa ŵakavalo, ŵapakavalo ŵaŵi ŵaŵi, ŵakugala pa mbunda, ŵakugala pa ŵagamila, wategherezge ukongwa limu, wategherezge kwa chisisi.”

⁸ Sono yo wanguwona wanguliya: “Ndituma pa chitanthali chaulonda, Ambuya mwe, nyengo zose ndi msana, ndipo pa nchitu yangu ndimiskapo mausiku ghose.

⁹ Ndipo ehe, eyaŵa ŵatuza ŵapa ŵaKavalo, ŵatenda ŵaŵi-ŵaŵi!” Ndipo iyo ŵangwamuka, “Wawa, wawa Babiloni; ndipo vyangoza vyose vya ŵachiuta ŵake waswiya pasi.”

¹⁰ Owe vyakukhwema vyangu ndi vyakupepeta vyake, cho ndavwa ku Ambuya ŵa maŵanja. Chiuta waku Yisraele, nditikutauliya.

Gha paku Duma

¹¹ Ghakukambika gha paku Duma. Yumoza wadanirizga kwangu kutuliya ku Seira, “Wamulonda, mbusiku wakutinje? Wamulonda, mbusiku wakutinje?”

¹² Mulonda watiti: “Mlenji utuza, ndipo so usiku. Asani ukafumbiriyanga, fumbiriya; uwere so kuno.”

Ghapa Arabia

¹³ Ghakukambika ghapa Arabia. Mu matundu mu Arabia ndimu ukagonanga, Mwa mipingo ya ŵamalonda ŵa Dedani.

¹⁴ Zani ndi maji ku wanyota, kumanani nayo ndi chakurgha wakuthaŵa, imwe mwa ŵakuja mu charu cha Tema.

¹⁵ Pakuti ŵathaŵa ku malipanga, pa lipanga lakuwewepuwa, ku uta wakutweŵa, ndi kukunyekezga kwa homwa.

¹⁶ Pakuti Ambuya angundinene kuti, “Mukati muchirimika chimoza kwakulingana ndivirimika vya wanchitu wa mphoto, unkhankhu wose waku Kedara ukamaranga.

¹⁷ Ndipo ŵakujapo ŵa ŵakupong'a mivwi ŵa virimbi vya ŵana ŵaku Kedara ŵakaŵanga ŵamanavi ŵeni, pakuti Ambuya Chiuta waku Yisraele wa kamba.”