Yesaya 20 - Tonga Bible 1986

Chisimikizgu chakupasuka kwa Egipiti ndi Etiopia

¹ Mu chirimika cho ndina yira ya nkhondo yo yingutumika ndi Sargoni karonga wa Asiriya, yinguza ku Ashidodi kurwa nkhondo ndi kuwuto,

² pa nyengo yiya Ambuya angukambiya mwaku Yesaya mwana waku Amozi, kuti, “Ruta, ukafwatuwe chigudulu mu chiunu chako ndi kuzuwa viyato ku marundi ghako,” iyo wanguchita ichi, wangwenda wankhuli ndi marundi ghawaka.

³ Ambuya anguti, “Uli ndimo mteŵeti wangu Yesaya wayende nkhuli ndi marundi ghawaka virimika vitatu nge nchisimikizgu ndi chenjezgu pa Egipiti ndi Etiopia,

⁴ viyo ndimu karonga wa Asiriya wakarongozgiyanga ŵaEgipiti ŵaŵanda ndi ŵaEtiopia ŵamkoli, wose ŵampupuka ndi makhongwe, wankhuli ndi marundi ghawaka, ndi matako ghankhuli, pa soni ya Egipiti.

⁵ Sono ŵakazizwanga ndi kutimbanizgika chifukwa chaku Etiopia gomezgu lawo ndi Egipiti thamu lawo.

⁶ Ndipo ŵakuja mu charu ichi cha likumba wakakambanga mu zuŵa liya, ‘Ehe, ichi ndichu chachitika kwaku wo tingugomekezga mwawo ndi kwaku wo tachimbiriyanga kovyeka, kuti titaskike ku karonga wa Asiriya! Na ifwe, tikapozomokanga uli?’ ”