Yesaya 18 - Tonga Bible 1986

Ghapa Etiopia

¹ A! Charu chakukung'untha mapapa cho che kusirgha la misinji ya Etiopia;

² chenicho chituma ŵamirizi mu nthowa ya mu Nile, mu ngaraŵa za mabingwe zapa maji! Rutani, mwa mathenga ghakupusumpha, ku mtundu, utali wakoloŵa, ku ŵanthu wo ŵatopeka pafupi ndi kutali, mtundu wakulimba ndi wakuthereska, wo charu chake chigaŵika ndi misinji.

³ Imwe mose mwa ŵakuja mu charu chapasi, imwe ŵakuja pa charu, asani mbendera yakwezgeka pa mapiri, lereskani! Asani mbata yambika, vwani!

⁴ Pakuti viyo ndimu angukambiya kwangu Ambuya: “Chisisi ndikapenjanga mwa kuja ine uli ndi kufunda kwa pakweru mu lumwi, ulaka ndi mtambo wa dungwi mu kufunda kwa vuna.”

⁵ Pakuti vuna wenga wandaze, penipo kupasa kwamara ndipo luŵa lituŵa chipasi chikufya, wakadumuwangako vyakubuka ndi mbeja zakupanthiya, ndipo mphanda zakusapatiya wapanthengeko.

⁶ Vyose vyaku vyo vikasiyikanga ku viyuni vya kurgha nyama vya mu mapiri, ndi ku vinyama vya charu chapasi. Ndipo viyuni vyakurgha nyama vikajangapo chifukwa chose ndi nyama zose za charu chapasi zikajangapo chihanya chose.

⁷ Pa nyengo yiya vyaulera vikatolekiyanga ku Ambuya ŵa maŵanja, kutuwa ku ŵanthu ŵatali ndi ŵakoloŵa, ku ŵanthu wo ŵatopeka pafupi ndi kutali, mtundu wanthazi ndi wakuthereska, wo charu chake chikugaŵika ndi misinji, ku phiri Zioni, malo gha zina la Ambuya ŵa maŵanja.