Yesaya 16 - Tonga Bible 1986

¹ Ŵatuwa ŵana ŵamberere ku mweruzgi wa charu cho, kutuliya ku Sela, mu nthowa ya kubozwa, kuya ku phiri lamu Zioni.

² Ulaka ndi viyuni vyakuphururuka, uli ndi visa vyakupasuka, ndimu ŵaliri ŵana ŵanthukazi ŵaku Moabu pa vipholi vyaku Arnoni.

³ “Paskani fundu, perekani cheruzgu chirunji, chitani chiduzi chinu kuŵa nge mbusiku pa kukwera kwa msana. Bisani ŵakupatika mungasumuwanga ŵakuthaŵa cha;

⁴ ŵarekeni ŵakudikika ŵaku Moabu ŵajendiyenge mukati mwinu; ku ŵakuwabaya muŵe chakubisamamo chawo. Asani wakuyuzga kuti walipo so cha, ndipo kubaya kwamara, ndipo yo wapwatiya pasi ndi phazi watuwamo mu charu,

⁵ po ndipo chitengo cha ufumu chikamikikanga mu chanju chizirima ndipo paku cho ŵakajangapo mu ukongorekwa mu hema laku Davidi yo wateruzga ndi wapenja cheruzgu chirunji ndi ngwakukankhamika kuchita urunji.”

⁶ Tavwa gha kujikuzga kwaku Moabu, mwenimo wangujikuzgiya; kujikwezga kwake, kujikuzga kwake, ndi mtafu wake kujithamiya kwake nkhwa utesi.

⁷ Chifukwa ichi Moabu watenje, we yose wenjerwe Moabu. Tenjeni, ŵakupwetekeka ukongwa, chifukwa cha viŵande vyakusazgamo tuvipasi vyaku Kirihareseti.

⁸ Pakuti minda ya Heshiboni yagongowa, pamoza ndi mphereska ya Sibma, ŵeruzgi ŵa mitundu ŵadumuliya pasi mphanda zake, zo zingufika ku Jezeri zingulandiya ku bozwa, twakumemo twake tungutambarukiya kutali tungujumpha nyanja.

⁹ Chifukwa chinchi ndiliya ndi kaliridu kaku Jezeri chifukwa cha mphereska ya Sibma; nditukuzumbwiska ndi masozi ghangu, Heshiboni we ndi Eleale, pakuti pa chipasi chako ndi vuna yako chiwawa cha nkhondo cha ŵapo.

¹⁰ Ndipo chimwemwe ndi likondwa vyatuzgikako ku munda wakupasa; ndipo mu minda ya mphereska sumu kuti zimbikamo cha, viwawa kuti vichitika cha, palivi wakukanda yo wakanda vinyo pa mbuli, chiwawa cha waku unjika vipasi chachetamiskika.

¹¹ Chifukwa ichi mzimu wangu udandaula nge ndi kaligu paku Moabu ndi mtima wangu paku Kirheresi.

¹² Ndipo penipo Moabu watijirongo, wachijivuska pa malo gha visopo, penipo watuza ku nyumba yake yakupaturika kuzachiromba, kuti wanduwengepo kanthu cha.

¹³ Yagha ndi mazu gho Ambuya angukamba paku Moabu mu, nyengo yaruta.

¹⁴ Kweni sono Ambuya atiti, “Mu virimika vitatu uli ndi virimika vya wanchitu ya kulondapo mphoto, unkhankhu waku Moabu ukayeyekanga, chingana wangaŵa ndi chimpingu chikuru, ndipo wo ŵakaŵanga ŵamoyo ŵakaŵanga ŵamanavi ukongwa ndi ŵakutomboroka.”