Yesaya 14 - Tonga Bible 1986

¹ Ambuya akaŵanga ndi chitima paku Yakobe ndipo akasankhanga so Yisraele, akaŵaŵikanga mu charu chawo ndi chawo, ŵalendo ŵakajisazganga kwaku wo, ŵakajibatikanga ku nyumba yaku Yakobe.

² Ndipo ŵanthu ŵakaŵatonga ndi kuza nawo ku malo ghawo, nyumba yaku Yisraele yikaŵasunganga kuŵa ŵawo mu charu cha Ambuya nge mbaŵanda ŵanthurumi ndi ŵanthukazi, ŵakakonga umkoli ŵeniwo ŵanguko iwo umkoli, ndikuŵatufuliya ŵeniwo ŵangusuzga iwo.

³ Pa nyengo yo Ambuya akupaskani chipumulo ku urwirwi winu ndi kukutimbanizgika ndi ku kutakataka kuzitu ko ŵangumutakatiskani,

⁴ mukakambanga yagha pakuwera karonga wa Babiloni, “Wamara wakusuzga yo, ukari wa nkhaza wamara!

⁵ Ambuya afyo nthonga ya ŵaheni, ndodo ya ufumu ya ŵeruzgi,

⁶ yo yingukoso ŵanthu mu ukari ndi mbumu zambura kumara, yo yinguusa mitundu muukari, mu suzgu yambura kureka.

⁷ Charu chose chapasi chapumuwa che bata, ŵabangula ndi kumba.

⁸ Milombwa yikondwa paku iwe, Milanji ya Lebanoni, yititi, ‘Kutuliya nyengo yo unguwiskikiya pasi, palivi mtema-miti watuza kutinanga.’

⁹ Muunda kusi uyaghayika kukumana nawe uchiza, uyuska miduzi kukutauzga, wose wo ŵenga ŵarongozgi ŵa charu chapasi, uyuska ku vitengo vyawo wose wo ŵenga ŵakaronga ŵa mitundu.

¹⁰ Wose ŵakarongoronga ndi kukamba nawe: ‘Iwe nawe waŵa wakutomboroka nge ndifwe! Wayana nge ndifwe!’

¹¹ Unozgi wako watoleke kusi ku muunda, kumba kwa ŵabangwi ŵako; fusi ndizo chita kusi kwako, ndipo ŵa minyoro ndiwu chakuvwinkha chako.

¹² “Mo wambotoke kutuwa kuchanya, wa Nyenyezi ya Msana, mwana wa Matanda-kucha! Mo watemeke kuwa pasi, iwe ungularika pasi mitundu!

¹³ Ungukamba mu mtima wako, ‘Ndikakweriyanga kuchanya, pachanya pa nyenyezi zaku Chiuta ndikajarikanga chitengu changu pachanya; ndikajanga pa phiri la unganu kutali ku nkhonde,

¹⁴ ndikakweriyanga pachanya pa machanya gha mitambo, ndikajisanduskanga wakukozgana ndi wapachanya Limu.’

¹⁵ Kweni wasiskikiya pasi ku muunda, ku ndimba ya Zenje.

¹⁶ Wo ŵatikuwona ŵakakutambwanga, ndi kukughanaghaniya, kuti, ‘Kumbi ndiyu uyu munthu yo wangutenthemeska charu chapasi, yo wangusukuniska maufumu,

¹⁷ yo wanguchichita charu chapasi kuŵa mapopa yo wanguthereska mizi yake, yo wengavi kuzomerezga ŵamagoŵa ŵake kuya kwawo?’

¹⁸ Ŵakaronga wose ŵa mitundu mbakula mu unkhankhu we yose mu muunda wake;

¹⁹ kweni iwe wadikikiya kubwalo, kutali ndi muunda wako, uli nkhupapa kwa kufyoka wambura kukhumbikwa, wakuvwarikika ndi ŵakubayika, wo ŵangurasika ndi lipanga, wo ŵasere pasi ku mya ya Zenje, uli ndi thupi la kufwa la mupwatikiya pasi ndi rwayo.

²⁰ Kuti ukasazgikananga nawo cha mukaŵikidu, chifukwa waparghang'a charu chako, wabaya ŵanthu ŵako. “Mphanyi mphapu za ŵakuchita uheni warekeka kuzumbulika so!

²¹ Rongosoni kubaya ŵana ŵake chifukwa cha kulakwa kwa auskeu, vinu ŵangayuka ndi kuhara charu chapasi, kuzaza chisku cha charu chapasi ndi mizi.”

²² “Ine ndikaŵayukiyanga,” atiti Ambuya ŵa maŵanja, “ndipo ndikadumuwangako ku Babiloni zina ndi ŵakujapo, ŵakupapika kwaku wo, ndi mphapu yakuvuli, atiti Ambuya.

²³ Ndipo ndikauchitanga kuŵa chihara cha ŵamunjiri, ndi mweyo wakubwanganduwa, atiti Ambuya ŵa maŵanja.”

²⁴ Ambuya ŵa maŵanja ŵarapa: “Uli ndimo ndarongosole ndimu kukaŵiyanga, nge ndimo ndapimiya, viyo ndimu kukamuŵiyanga,

²⁵ kuti ndikaswanga mu Asiriya mu charu changu, ndi pa mapiri ghangu ndimupwatiyenge pasi pa rwayo; ndipo goŵa lake likatuwangako kwaku wo, ndi katundu wake kupheŵa lawo.”

²⁶ Iyi ndi fundu yo yakhozgeka, pakati pa charu chose chapasi, ndipo ili ndi janja lo latambarukiya pa mitundu yose.

²⁷ Pakuti Ambuya ŵa maŵanja ŵakhazga fundo, na njani wangakanizga? Janja lawo latambaruka, njani wakaliwezganga?

Chiuta wakaparghananga ŵaFilisti

²⁸ Mu chirimika cho wangufwiya karonga Ahazi uchimi uwu wunguza;

²⁹ “Mungakondwanga cha mwa ŵaFilisti imwe, kuti ndodo yo yingukukosoni yafyoka, pakuti kutuwa ku msisi wanjoka kukatuwanga chipi ndipo chipasi chake chikaŵanga njoka yakuphururuka.

³⁰ Ndipo waumwali wa musauchi wakarghanga, wanja wakalanga pasi mu Chimangu, kweni ndikabayanga msisi winu ndi nja, ndipo wakujapo winu ndikakosonga.

³¹ Utenje wa likomo, liya wa msumba, songonokani mu kopa, mwa ŵaFilisti, mose pamoza! Pakuti usi utuwa ku nkhonde, ndipo mulivi wakulimbalimba, mu ŵankhondo ŵake.”

³² Kumbi munthu waghamukenge uli mathenga gha mtundu? “Ambuya ndiwo akuzenga Zioni, ndipo mwaku wo ŵakusuzgika ŵa ŵanthu ŵasaniya pakubisama.”