Yesaya 11 - Tonga Bible 1986

Chigomezgu chaku Yisraele mkucha

¹ Pakatuwanga chitivwa pa chipandu chaku Jese, ndipo mphanda yikakuwanga kutuwa ku misisi yake.

² Ndipo Mzimu wa Ambuya ukajanga paku iyo, mzimu wa chinjeru ndi wakuwamo, mzimu wa fundu ndi nthazi, mzimu wa zeru ndi wa chopu cha Ambuya.

³ Ndipo kukankhaŵiya kwake kwazamkuŵa ku kopa Ambuya. Kuti werezgenge ndi cho maso ghake ghawona cha, pamwenga kudumuwa ndi cho makutu ghake ghavwa cha;

⁴ kweni mu urunji wakeruzganga ŵasauchi, ndi kudumuwa ndi mwenera ŵakuzika ŵacharu chapasi; ndi nthonga ya mlomo wake ndipo ndimvuchi wa milomo yake wakabayanga ŵaheni.

⁵ Urunji ukaŵanga lamba la muchiunu chake, umagomekezgeka lamba la kujikhozga nalo.

⁶ Mphumphi yikajanga pamoza ndi mwana wa mberere, ndipo nyalubwe wakagonanga pasi ndi mwana wa mbuzi, thole, nkharamu pamoza ndi viŵetu vyakututuŵa mwana mumanavi wakavirongozganga.

⁷ Ng'ombe yinthukazi ndi chipembere vikarghanga; ŵana ŵawo ŵakalanga pamoza, ndipo nkharamu yikarghanga uteka nge ndi ng'ombe.

⁸ Mwana wakonkha wakaseŵenga pa zenje la njoka, ndipo mwana wakureka be wakaŵikanga janja lake pa zenje la chipi.

⁹ Kuti vikapwetekanga pamwenga kubwanganduwa cha mu phiri langu lose lakupaturika, pakuti charu chapasi chikazazikanga ndi zeru za Ambuya nge ndimo maji ghazaziya nyanja.

¹⁰ Mu zuŵa liya msisi waku Jese ukamanga nge nchiziŵisku ku ŵanthu, iyo ndiyo mitundu yikapenjanga: ndipo mwakuja mwake mukaŵanga mwaunkhankhu.

¹¹ Mu zuŵa liya Ambuya akarutirizganga mbwenu janja lawo nyengo yachiŵi, kusaniya wakujapo wa ŵanthu ŵawo, kutuwa ku Asiriya, ku Egipiti, ku Patrosi, ku Etiopia, ku Elami, ku Shinari, ku Hamati, ndi ku vyaru vya mu likumba la nyanja.

¹² Wakasoskiyanga mbendera pa mitundu, wakaunjikanga pamoza wakutayika waku Yisraele, ndi kuunjika ŵakuparghang'ika ŵaku Yuda kutuwa ku visongo vinayi vya charu chapasi.

¹³ Sanje yaku Efraimu yikatuwangapo, ndipo wo ŵasuzga Yuda ŵakadumulikanga, Efraimu kuti wakachitiyanga sanje Yuda cha, nanga ndi Yuda kuti wakasuzganga Efraimu cha.

¹⁴ Kweni ŵakakhumukiyanga pa phewa la ŵaFilisti kuchiri ku zambwe, ndipo wose pamoza ŵazamuskoŵa ŵanthu ŵaku vuma. Wazamutambaruliya janja lawo paku Edomu ndi Moabu, ŵina Amoni ŵakaŵavwiyanga.

¹⁵ Ndipo Ambuya akamariyanga limu lilime laku nyanja ya Egipiti; ndipo wakazungung'anga janja lawo pa Msinji ndi mphepo yawo yakocha, kuwukoso mu ngalonde zinkhonde ndi ziŵi alinga kuti ŵanthu ŵambukenge pa yumu.

¹⁶ Ndipo kukaŵanga gurwi kutuliya ku Asiriya chifukwa cha ŵanthu ŵakujapo wo ŵasiyika, uli ndimo wanguŵiya pa ŵaYisraele wachikwera kutuwa mu charu cha Egipiti.