Yesaya 10 - Tonga Bible 1986

¹ Owe kwaku wo ŵalamula malamulu gha utimbanizi, ndi ŵalembi wo ŵalemba yuzgu,

² kuŵanderezgako ŵasauchi ku cheruzgu chirunji ndi kuŵa kwamphuwa ŵakavu ŵa ŵanthu ŵangu vyakuŵenere, kuti vyoko viŵe vyakuskoŵa vyawo, ndi kuti ŵachite ŵana ŵamasiye nyama yawo!

³ Mukachitanganje mu zuŵa la chilangu, mu lirondo lo likatuwanga kutali? Nkhwakuyani ko mukachimbiriyanga kusaniya chovyo ndipo usambasi winu ukasiyikanga pani?

⁴ Palivi chakujako kweni kusindama pasi mukati mu ŵamagoŵa pamwenga kuwa mukati mu ŵakubayika. Mu chifukwa chose ichi, kukara kwake kuti kwarata kunyake cha ndipo janja lake leche kutambaruka.

Kubwanganduka kwa Asiriya

⁵ A! Asiriya nthonga ya kukara kwangu, ndodo ya ukari wangu!

⁶ Nditimutuma ku mtundu wambura Chiuta, ku ŵanthu ŵakundikaraliska ndiku nditumulanguliya, kwachito vyakuskoŵa ndi kuronda vyakuphanga, kuvipwatiya pasi nge mbulambwi, wamu miseu.

⁷ Kweni kuti ndimu wakhumbiya cha, ndipo mtima wake kuti ughanaghana viyo cha, cho che mu mtima nkhuparghang'a, ndi kutuzgapo mitundu yinandi,

⁸ pakuti watiti: “Asi ŵakutufuliya ŵangu wose mbakaronga?

⁹ Kumbi Kalno kuti wayana ndi Karchemishi cha? Kumbi Hamati kuti wayana ndi Arpadi cha? Kumbi Samaria asi wayana ndi Damasko?

¹⁰ Nge ndimo janja langu lafikiya ku maufumu gha ŵangoza ŵeniwo ŵangoza ŵawo ŵakusongono ŵenga ŵakuruku ku ŵaku Yerusalemu ndi Samaria.

¹¹ Kumbi kuti ndingachitiya Yerusalemu ndi ŵangoza ŵake nge ndimo ndinguchitiya kwaku Samaria ndi ŵangoza ŵake cha?”

¹² Penipo Ambuya atakuti ŵamara nchitu yawo yose pa phiri la Zioni ndi pa Yerusalemu akalanganga kujikuzga kukuru kwa karonga wa Asiriya ndi kujikwezga kwake.

¹³ Pakuti watiti: “Ndi nthazi za janja langu ndachichita ichi, ndipo ndi zeru zangu, pakuti nde ndi kuwamo; ndanderezga maliri gha ŵanthu, ndipo ndakwamphuwa mausambasi ghawo, uli ndi nkhuzi ndasiskiya pasi wo ŵanguja pa vitengo vya ufumu.

¹⁴ Janja langu lasaniya nge nchivimbu usambasi wa ŵanthu, ndipo uli mbanthu ŵaunjika mazira gho ghajoworeka, viyo ndimu ndaunjikiya charu chapasi; ndipo pengavi yumoza yo wangunderezgapo phapha limoza, pamwenga kujura mlomo, chingana nkhu ng'ung'uta.”

¹⁵ Kumbi mbavi yingajikuzga paku yo watiyitema? Pamwenga chakucheke ku jikuzga paku yo watichicheke? Nge ndodo yingasukung'iya yo watiyisoska, pamwenga uli nge ndimo nthonga yingasoske yo kuti ndi muti cha!

¹⁶ Viyo Ambuya, Ambuya ŵa maŵanja akatumanga urwali wakondeska mukati mu ŵankhondo ŵawo ŵakututuŵa, ndipo pasi pa unkhankhu wawo kukole kukakozgekanga, uli nkhukole kwa moto.

¹⁷ Ukweru waku Yisraele usandukenge moto, ndipo Mtuŵa wake Yumoza mlipu; ndipo ukawochanga ndi kwananga minga yake ndi kankhande mu zuŵa limoza.

¹⁸ Unkhankhu wa lisuwa lake ndi charu chake chakupasa Ambuya akaparghang'anga viŵi viyo mzimu ndi liŵavu, ndipo kukaŵanga uli ndi pa munthu wachita liwondewonde.

¹⁹ Miti yakujapo ya lisuwa lake yiŵenge yimanavi yakuti mwana mumana wangaziŵa kuyilemba.

²⁰ Mu zuŵa leniliya ŵakujapo ŵa ŵaYisraele ndi ŵakujapo ŵa nyumba yaku Yakobe kuti ŵakayegamiyanga so paku yo wanguŵakoso cha, kweni wakayegamiyanga pa Ambuya, mtuŵa Yumoza waku Yisraele, mu uneneska.

²¹ Ŵakujapo ŵakawenga, ŵakujapo ŵaku Yakobe, kuwere kwaku Chiuta wakulimba.

²² Pakuti chingana ŵanthu ŵako ŵaYisraele ŵangaŵa ŵanandi nge ndi mchenge wapa nyanja, ŵakujapo pe ŵaku wo ndiwo ŵakawenga. Phasulu larangulika, lifuza ndi urunji.

²³ Pakuti Ambuya, Ambuya ŵa maŵanja, akachitanga umari wakufikapo, uli ndimo kwalangulikiya, mukati mu charu chipasi.

²⁴ Viyo atiti, Ambuya ŵa maŵanja: “Owe mwa ŵanthu ŵangu, mwa ŵakuja mu Zioni, rekani kuwopa ŵaAsiriya ŵachikoso ndi nthonga ndi kusoske ndodo yawo paku imwe nge ndimo ŵanguchitiya ŵaEgipiti.

²⁵ Pakuti mu kanyengo kamanavi ukongwa kukara kwangu mukamaranga ndipo ukari wangu ukatumikanga ku phasulu lawo.

²⁶ Ndipo Ambuya ŵa maŵanja akasoskiyanga paku wo likwechu, nge ndimo angukosole Midiani pa jarawe la Orebe, ndipo nthonga yawo yikaŵanga pachanya pa nyanja, ndipo akayisoskanga nge ndimo anguchitiya mu Egipiti.

²⁷ Mu zuŵa liya mphingu yake yikatuwangapo pa pheŵa linu, ndipo goŵa lake likaphwanyikanga pa khosi linu.” Waruta wakwere kutuliya ku Rimoni,

²⁸ waza ku Aiya, waporota mu Migroni, pa Mikimashi warongapo katundu wake,

²⁹ wambuka pa fita, wagona pa Gebe ndi usiku, Rama watenthema, Gibea waku Sauli wathaŵa.

³⁰ Kamburani pakuriya, mwa ŵanthu ŵamu Galimi! Tegherezgani mwa ŵamu Laisha! Mumwamuke, mwa mu Anatote!

³¹ Madmena wemu kuthaŵa, ŵakuja mu Gebimu ŵathaŵa kupenja pakubisama.

³² Zuŵa lenili ili wakamanga pa Nobo, wakasukuniskanga nkhonyu yake pa phiri lamu Zioni, mtunthu wa Yerusalemu.

³³ Ehe, Ambuya, Ambuya ŵa maŵanja akapanthanga mphanda ndi nthazi zakofya; zitali-zitali zikadumulikiyanga pasi, ndipo zitali zikafupiskikanga.

³⁴ Wakadumuliyanga pasi ndi mbavi matundu gha lisuwa lakukho ukongwa, Lebanoni ndi miti yake ya muusu wakawanga.