Yesaya 1 - Tonga Bible 1986

Kulakwa ndi masuzgu gha ŵaYisraele

¹ Chiwona chaku Yesaya mwana waku Amozi, cho wanguwona chakukamba ndi Yuda ndi Yerusalemu mu mazuŵa ghaku Uziya, Yotamu, Ahazi, ndi Hezekiya, ŵakaronga ŵaku Yuda.

² Vwani, mwa machanya mwe, tegherezga gutu, wa charu chapasi; pakuti Ambuya akamba: “Ŵana wo ndahiŵa ndi kuŵakuzga, kweni ŵandigarukiya.

³ Ng'ombe yiziŵa mbuyake ndi mbunda khora lake; kweni Yisraele kuti waziŵa cha, ŵanthu ŵangu kuti ŵawamo cha.”

⁴ Owe, khamu la kulakwa, ŵanthu ŵakuzazika uchikanamarangu, mphapu ya ŵakuchita uheni, ŵana ŵakuchita vya wiyu. Ŵajowo Ambuya, ŵayuyuwa Mtuŵa yo waku Yisraele, ŵasanduka ŵalendo.

⁵ Chifukwa chine mukapumikiyanga-pumikiyanga, pakuti mugarukiya-garukiya? Mutu wose ngwakutama, mtima wose utufwa chipoyo.

⁶ Kutuwa ku phazi kusi kwachifika ku mutu, kuti muvwika kanthu cha, kweni vikukusa pe ndi vironda ndi mabala ghakusuruwa ndopa; virivi kupo, pamwenga kumangika, pamwenga korovyeka ndi mafuta.

⁷ Charu chinu nchamapopa, mizi yinu yocheka ndi moto; mu maso ghakumwaŵeni ŵalendo ŵaphwanya charu chinu; nchamapopa, nge chatereskeke ndi ŵalendo.

⁸ Ndipo msumba wa Zioni wajowoleka nge ndi msasa mu munda wa mphereska, nge nchigongwe mu munda wa vinkhaka, nge ndi muzi wakuzingika.

⁹ Asani Ambuya ŵa maŵanja ŵengavi kutisiyiyapo ŵakujapo ŵamanavi, mphanyi tinguŵa nge ndi Sodomu; ndi kusanduka nge ndi Gomora.

¹⁰ Avwani mazu gha Ambuya, mwa ŵeruzgi ŵa Sodomu! Tegherezgani gutu ku kurunguchizga kwaku Chiuta widu, mwa ŵanthu ŵaku Gomora!

¹¹ “Kwaku ine unandi wa mipasku yinu nkhane?” atiti Ambuya. “Ndaronde kale mipasku yakukwana yakocha ya ŵabira ndi mafuta gha nyama zakuliska, kuti ndikondwa ndi ndopa za nkhuzi cha, pamwenga za ŵana ŵa mberere, ndi za ŵaphongo cha.

¹² “Muchizamuwoneka paurongo pangu, njani wanweka kuti imwe mwendenge-yendenge mu mabwaro ghangu?

¹³ Mungatonga so mipasku yaŵakaŵaka cha, vyachema mbu kazuzi kwangu. Mwezi ufya ndi sabata ndi kudana maunganu kuti ndingakunthiyapo mauheni ndi maunganu cha.

¹⁴ Myezi yinu yifya ndi madghera ghinu ghakutemeka, mzimu wangu utinkha, vyasanduka katundu mzitu, ndavuka kuvinyamuwa.

¹⁵ Muchitambaruwa manja ghinu, ndikabisanga maso ghangu kwinu, inya chingana mungachita marombu ghanandi, kuti nditegherezgenge cha, manja ghinu ghazara ndi ndopa.

¹⁶ Musambe; mujiphoto; tuzgani uheni wa machitidu ghinu pa maso pangu; rekani kuchita uheni,

¹⁷ sambirani kuchita umampha, penjani cheruzgu chirunji, wovyani ŵakusuzgika; vikiriyani ŵana ŵaranda, chitiyani lisungu vyoko.

¹⁸ “Zaninga sono, tipaskane fundo,” atiti Ambuya: “Chingana uheni winu ungaŵa waku chesama, ukaŵanga utuŵa nge ndi nyankhuŵinda, chingana ungaŵa wakuti jee ngendi nkhama, ukasandukanga nge ndi weya wa mberere.

¹⁹ Asani mwe ŵakunweka ndiŵakuvwiya, mukarghanga vyamampha vya charu cho.

²⁰ Kweni asani mukana ndi kugaruka, mukamaranga ndi lipanga, pakuti mlomo wa Ambuya wakamba.”

²¹ Muzi wamagomekezeka, wasanduka mureŵi, wo unguzara ndi cheruzgu chirunji! Urunji wajanga mwake, kweni sono mbakubaya ŵanthu.

²² Siliva winu wachita mbiri, vinyo winu wasazgikana ndi maji.

²³ Ŵaraŵara ŵinu ŵaŵa vigaruka ndi mabwezi gha ŵankhungu. We yose watanja vinda ndipo ŵaunukiya vyaulera. Kuti ŵavikiriya ŵana ŵaranda cha, ndipo makani gha choko ŵatighaphwere cha.

²⁴ Chifukwa cho Ambuya atiti. Ambuya ŵa maŵanja, Wanthazi yo waku Yisraele: “Aha, ndikatuzgangapo ukari wangu pa ŵakupindikana nane, ndi kujitayiya thayu pa ŵarwani ŵangu.

²⁵ Nding'anamuliyenge janja langu paku imwe ndikaphotonga uloso winu uli ndi maji ghakuphoto ndi kutuzgako mthovu winu.

²⁶ Ndipo ndikawezgiyangapo ŵeruzgi ŵinu nge mphakudanga, ndi nduna zinu uli mpha chiyambo. Pavuli mukadanikanga msumba urunji, muzi wamagomekezgeka.”

²⁷ Zioni wakawombokwanga ndi cheruzgu chirunji, ndi wo ŵe mukati mwake wo mbakupe mtima, ndi urunji.

²⁸ Kweni vigaruka ndi ŵaheni ŵakaphwanyikiyanga pamoza, ndi wose wo ŵakana Ambuya ŵakamaranga.

²⁹ Pakuti mulengengi soni ndi miti ya mkundi mwaku yo mungukondwere; ndipo mukayangazukanga chifukwa cha minda yo mukusankha.

³⁰ Pakuti mukaŵanga nge ndi mkundi wo wafota mani, inya nge ndi munda wambura maji.

³¹ Ndipo wanthazi wakaŵanga nge nchingwi cha wazi, nchitu yake yikaŵanga muthovu wa ŵaka, ndipo vyose viŵi vifyiyenge pamoza, ndipo paulengevi wakuvizimwa.