Yeremiya 7 - Tonga Bible 1986

Nozgani nthowa zinu

¹ Mazu gho ghanguza kwaku Yeremiya kutuwa ku Ambuya:

² “Ima wa likomu la nyumba ya Ambuya, ndipo penipo memeza mazu yagha, uti, Vwani mazu gha Ambuya, imwe mwa ŵanthu mose ŵaku Yuda imwe musere muno kwachisopa Ambuya.

³ Viyo atiti Ambuya ŵa maŵanja, Chiuta waku Yisraele, Nozgani nthowa zinu ndi machitudu ghinu, ndipo ndikakupaskaninga kuja mu malo yagha.

⁴ Mungagomezganga mu mazu yagha ghakupusika cha: ghakuti, ‘Uyu ndi kasopi wa Ambuya, kasopi wa Ambuya, kasopi wa Ambuya.’

⁵ “Pakuti asani munozga nthowa zinu ndi machitidu ghinu, asani muteruzga nadi cheruzgu chirunji yumoza ndi munyake,

⁶ asani mureka kuyuzga ŵalendo, ndi ŵana ŵa masiya ndi vyoko, pamwenga kudiska kuyuzga ŵalendo, ndi ŵana ŵa masiya ndi vyoko, pamwenga kudiska ndopa za ŵanthu zambura kalema mumalo yagha; ndipo asani mukarekanga kurondo ŵachiuta ŵanyake wo ŵangumunangani mwaŵeni,

⁷ po ndipo ndikakupaskaninga kuja malo yagha, mu charu chenicho ndingupaska mwaka ku auskemwe muyaya.

⁸ “Ehe, imwe mugomekezga mu mazu ghakupusika ghambura kovya.

⁹ Kumbi mukabanga, mukabayanga, mukareŵanga, mukarapanga kwa utesi, mukawochiyanga Bala sembe, ndi kurondo ŵachiuta ŵanyake wo mulivi kuŵaziŵapo,

¹⁰ ndipo pavuli makazanga kuzachima paurongo pangu mu nyumba iyi, yo yidanika ndi zina langu, ndi kunena kuti, ‘Tataskika!’ Kweni mukiyakiya kuchita maukazuzi ghenagha?

¹¹ Kumbi nyumba iyi yeniyo yidanika ndi zina langu yasanduka mphanji ya ŵakupoka mu maso ghinu? Ehe, ine ndamweni ndayiwona, atiti Ambuya.

¹² Rutani sono ku malo ghangu ghenigho ghe mu Shilo, kweniko pakudanga ndingujarika zina langu, mukawone vyo ndinguchitiya malo gho chifukwa cha mauheni gha ŵanthu ŵangu ŵaYisraele.

¹³ Ndupo sono, chifukwa mwachita vinthu ivi vyose, atiti Ambuya, ndipo penipo ndingukamba namwe kwambura kureka kuti mungutegherezga cha, ndipo penipo ndingumudanani, kuti mungwamuka cha,

¹⁴ chifukwa cho ndikachitanga ku nyumba yo yidanika ndi zina langu, ndi mwaku yeniyo imwe mugomezga, ndi ku malo ghenigho ndingukupaskani ndi ku auskemwe, nge ndimo ndinguchitiya ku Shilo.

¹⁵ Ndipo ndikakudikiskaninga ku chisku changu, uli ndimo ndingudikiskiya ŵabali ŵinu, mphapu yose yaku Efraimu.

¹⁶ “Iwe ungaŵarombiyanga cha yaŵa ŵanthu, pamwenga kukwezga kuliya pamwenga rombu chifukwa chawo, ndipo ungandiŵerenga cha, pakuti nditukuvwa cha.

¹⁷ Kuti uwona cha vyenivyo ŵachita mu mizi yaku Yuda ndi mu miseu ya Yerusalemu?

¹⁸ Ŵana ŵadeŵa nkhuni, auskeu ŵakozga moto, ndipo ŵanthukazi ŵakantha nthimphwa, kubikiya viŵande fumukazi ya kuchanya; ndipo ŵadira mipasku ya kumwa ku ŵachita ŵanyake, kundisosomole ine kukukaripa.

¹⁹ Kumbi ndine mweniyo ŵasosomo atiti Ambuya? Kumbi kuti ndiwo ŵeneko cha, wo ŵatijitimbanizga?

²⁰ Chifukwa cho atiti Ambuya Chiuta; Ehe, kukwiya kwangu ndi ukari wangu vikapungulikiyanga pa malo yagha, pa munthu ndi nyama, pa miti yamu minda ndi chipasi chapa nyata. Vikawochekanga ndipo kuti vikazimwikanga cha.”

²¹ Viyo atiti Ambuya ŵa maŵanja, Chiuta waku Yisraele, “Sazganiko mipasku yinu yakocha ku sembe zinu, ndipo rghaninga nyama.

²² Pakuti mu zuŵa lo ndinguŵatuzgiya mu charu cha Egipiti, kuti ndingurongoro ku auskemwe cha, pamwenga kuŵalanguliya gha pa mipasku yakocha ndi sembe.

²³ Kweni langulu lo ndinguŵapaska ndi ili, ‘Muvwiyenge mazu ghangu, ndipo ine ndikaŵanga Chiuta winu, imwe mukaŵanga ŵanthu ŵangu; mwendenge mu nthowa yose yo ndikulanguliyani alinga kukuŵiyeninga umampha.’

²⁴ Kweni kuti ŵanguchita vyo ndinguŵalanguliya pamwenga kundivwiya cha, ŵangwenda mu vipangu vya ŵeneko ndi mu unonono wa mitima yawo yiheni, ndipo ŵanguwere vuli, kuti ŵanguya kunthazi cha.

²⁵ Kutuwa ku zuŵa lo auskemwe ŵangutuliya mu Egipiti kufika msana wale, ine ndawerezgapowerezgapo kutuma ŵateŵeti ŵangu ŵamchimi kwaku wo, zuŵa ndi zuŵa:

²⁶ kweni kuti ŵangutegherezga, pamwenga kundivwa cha, ŵangunonopeska mitima yawo. Wangunanga kurutizga pa auskeu.

²⁷ “Viyo ukambe nawo vinthu vyose ivi, kweni kuti ŵakakutegherezganga cha. Ukaŵadananga, kweni kuti ŵakakwamukanga cha.

²⁸ Ndipo wamkuti kwaku wo, ‘Uwu ndi mtundu weniwo wengavi kuvwiya mazu gha Ambuya Chiuta wawo, ndipo kuti ŵanguronde langulu cha; uneneska wamara; ukudumulikako ku milomo yawo.

²⁹ Sengani sisi linu ndi mulitaye; soskani chitenje pa mapiri, gha majarawi, pakuti Ambuya akana ndi ajowo mgonezi, mu ukari wawo.’

³⁰ “Pakuti ŵana ŵaku Yuda ŵachita uheni mu maso ghangu, atiti Ambuya, ŵamika maukazuzi ghawo mu nyumba yeniyo yikudanika ndi zina langu, kuyikazuzga.

³¹ Ndipo ŵazenga malo gha pachanya pa Tofeti, gho ghe mu dambo la mwana waku Hinomu, kwachocha ŵana ŵawo ŵanthurumi ndi ŵana ŵawo ŵanthukazi mu moto; chinthu cho ndengavi kuchitamula, chingana nkhuti chenga mu maghanughanu ghangu nako cha.

³² Chifukwa cho ehe, mazuŵa ghakazanga, atiti Ambuya, penipo kuti pakadanikanga so Tofeti cha, pamwenga dambo la mwana waku Hinomu, kweni dambo la kubayiyamo: pakuti ŵakaŵikanga ŵakufwa mu Tofeti chifukwa kulivi so malo kose kunyake.

³³ Ndipo mathupi gha ŵakufwa gha ŵanthu yaŵa ghakaŵanga chakurgha cha viyuni vya mude, ndi gha vinyama vya charu chapasi; ndipo palivi yo wakaviwofyanga kuti vithaŵiye kutali.

³⁴ Ndipo ndikakanizganga mu mizi yaku Yuda ndimu miseu ya Yerusalemu, mazu gha kadara ndi mazu ghakukondwa kuti ghakavwikanga cha, mazu ghamweni nthengwa ndi mazu ghamwali wanthengwa; pakuti charu chikasandukanga mapopa.