Yeremiya 50 - Tonga Bible 1986

Kubwanganduka kwa Babiloni

¹ Mazu gho Ambuya angukamba gha paku Babiloni, ghakukamba ndi charu cha ŵaKaldiya, mwaku Yeremiya mchimi:

² “Ŵandiska mukati mu mitundu ndi memeza, umike mbendera umemeze, ungabisanga cha, kamba kuti: ‘Babiloni watoreka Belo walengeskeka, Merodaki wadika nthazi. Vikozgu vyake vyalengeskeka ŵangoza ŵake ŵamara nthazi.’

³ “Pakuti kutuliya ku nkhonde mtundu waza kukwere paku iyo, wo ukachitanga charu chake kuŵa mapopa, ndipo paulengevi yumoza wakuja mwenimo; wose munthu ndi nyama ŵakathaŵanga.

⁴ “Mu mazuŵa gha ndimu nyengo yiya, atiti Ambuya, ŵaYisraele ndi ŵaYuda ŵakazanga pamoza, ŵakaliyanga ŵachiza ndipo ŵazamupenja Ambuya Chiuta wawo.

⁵ Ŵazamufumba nthowa ya kuya ku Zioni, po visku vyawo vilereska kweniko, ŵakatinge, ‘Tiyeni, tijisazge pamoza ku Ambuya mu chipangano cha muyaya, cho kuti chikaruwikanga cha.’

⁶ “Ŵanthu ŵangu ŵaŵa mberere zakusoŵa; ŵaliska ŵawo ŵaŵa aserezga pa dondo, kuŵawezge kutali ku mapiri; kutuwa ku phiri kuya ku mtunthu ndimu ŵayende, ŵaruwa khora lawo.

⁷ Wose wo ŵanguŵasaniya ŵanguŵaparuwa, ndipo ŵakupindikana ŵawo ŵanguti, ‘Ifwe tilivi kafukwa, pakuti iwo ŵakulakwiya Ambuya, uja wawo weneko, Ambuya, wo nchigomekezgu cha auskeu,’ kwamphuwanga ŵakakhorwanga, atiti Ambuya.

⁸ “Thaŵanimo mukati mwaku Babiloni, ndipo tuwanimo mu charu cha ŵaKaldiya, muŵe uli mba phongo paurongo pa mskambu.

⁹ Pakuti ehe, ndichiska ndi nditole pa Babiloni mpingu wa mitundu yikuru, kutuwa ku charu chaku nkhonde; ndipo ŵazamkujindandamika paku iyo, kutuwa po ŵakatolekanga. Mivwi yawo ye uli nchiŵinda chakuziŵiska cho kuti manja ghake ghawe waka cha.

¹⁰ Kaldiya wakakwamphulikanga; wose wo ŵakamukwamphuwanga ŵakakhorwanga, atiti Ambuya.

¹¹ Chingana mukondwa, chingana mutijikuzga, imwe mwakukwamphuwa charu changu, chingana mwangare nge ndi thokazi pa uteka, ndi kubongo nge ndi kavalo,

¹² nyinamwe wakalengeskekanga kwakufikapo, ndipo yo wangukupapani wakakanyalanga. Awonani, wakaŵanga wakumariya wa mitundu, bozwa liyumu ndi mapopa.

¹³ Chifukwa cha ukari wa Ambuya ŵanthu kuti ŵakajangamo cha, kweni wakaŵanga mapopa ghakufikapo, yose wakudumuwa pa Babiloni, wakawopanga, ndi kwenjerwa chifukwa cha mabala ghake.

¹⁴ Jindandamikeni kulimbana ndi Babiloni kwakumuzunguliya imwe mose mwakutweŵa uta, mupong'eni, mungasiyako muvwi cha, pakuti walakwiya Ambuya.

¹⁵ Bangulani paku iyo kwakuzunguliya, wathera; malinga ghake ghawa, vimati vyake vyagumulikiya pasi. Pakuti iti ndi thayu la Ambuya: chitani thayu paku iyo, muchitiyeni nge ndimo iyo nayo wachitiya.

¹⁶ Ku Babiloni dumuwaniko wakumija, ndi yo wako chisenga, pa nyengo yakuvuna; chifukwa cha lipanga la wakusuzga, we yose wakarutanga ku ŵanthu ŵake, ndipo we yose wakathaŵiyanga ku charu chake.

¹⁷ “Yisraele ndi mberere yakupenjeka yo yadikiskika ndi zinkharamu, Pakudanga karonga wa Asiriya wangumuparuwa, ndipo sono pa umari Nebukadanezara karonga wa Babiloni waphwanya viwanga vyake.

¹⁸ Chifukwa cho, viyo atiti Ambuya Wa maŵanja, Chiuta waku Yisraele: Ehe, ndituza ndi chilangu pa karonga wa Babiloni ndi charu chake, nge ndimo ndingulangiya karonga wa Asiriya.

¹⁹ Ndikamuwezgiyanga Yisraele ku uliska wake, ndipo wakarghanga pa Karmele ndi mu Bashani, ndipo linweka lake likagutiskikanga pa mapiri ghaku Efraimu ndi mu Gileada.

²⁰ Mu mazuŵa gho ndi mu nyengo yiya, atiti Ambuya, utimbanizi waku Yisraele ukapenjekanga, ndipo kuti ukaŵangapo cha nanga ngumoza; uheni mwaku Yuda, kuti ukasanirikanga cha nanga ngumoza; pakuti ndikagowokiyanga wo ndikasiyanga kuŵa ŵakujapo.

²¹ Kwerani kumikana ndi charu cha Merataimu ndi kumikana ndi ŵakuja mu Pekoda. Bayani, muŵamariye limu pavuli pawo, atiti Ambuya, ndipo chitani chose cho ndakulanguliyani.

²² Kuwawata kwa nkhondo kwe ku charu, ndi phasulu likuru!

²³ Ehe, mo nyundo ya charu chose chapasi yadumulikiya pasi ndi yafyoka! Ehe mo Babiloni waŵiya chakofya mu mitundu!

²⁴ Ndingukuthya chiŵana ndipo unguwira Babiloni we, iwe kuti unguchiziŵa cha; ungusanirika ndi kukoreka chifukwa ungulimbana ndi Ambuya.

²⁵ Ambuya ajura nyumba yawo yakujamo vidya vya nkhondo, ndipo atuzgamo, vidya vya ukari wawo, pakuti Ambuya Chiuta wa maŵanja wendi nchitu yakuchita mu charu cha ŵaKaldiya.

²⁶ Zaninga kumikana nayo kutuwa kosekose; jurani nkhokwe zake; muwunjikeni nge ndi ndundu za mbuto, ndipo mumuphwanye tetete; mungasiyapo nanga nkhamoza kaku iyo.

²⁷ Bayani nkhuzi zake zose, muyi nazo kukubayika. Soka kwaku iwo pakuti zuŵa lawo laza nyengo ya chilangu chawo.

²⁸ “Avwani! Ŵathaŵa ndi kunyeremuka ku charu cha Babiloni, kwachitaula mu Zioni thayu la Ambuya Chiuta widu, thayu lapa kasopi wake.

²⁹ “Danani wakupong'a uta kumikana ndi Babiloni, wose wo mbakutweŵa uta. Goŵani kwakumuzunguliya: kupozomoskapo nanga njumoza cha. Mumuwezge kwakulingana ndi nchitu zake, mu muchitiye iyo kwakulingana ndi vyose vyo wachita, pakuti ndi kujikuzga kwake watafuliya Ambuya, Wakupaturika Yo waku Yisraele.

³⁰ Chifukwa cho ŵanyamata ŵake ŵakawanga mu maluluwa ghake, ndipo ŵankhondo ŵake wose ŵakaphwanyikanga mu zuŵa liya, atiti Ambuya.

³¹ “Ehe, ndilimbana ndi iwe, wakujikuzga we, atiti Ambuya Chiuta wa maŵanja; pakuti zuŵa lako laza, nyengo mwaku yeniyo ndikakulanganga.

³² Wakujikuzga wakaguŵanga ndi kuwa, paulengevi wakumuyuska, ndipo ndikakozganga moto mu misumba yake, ndipo ukarghanga wose ŵakumuzunguliya iyo.

³³ “Viyo atiti Ambuya ŵa maŵanja: ŴaYisraele ŵakudirizgika, ndi ŵaYuda pamoza nawo, wose wo ŵanguŵayola umkoli ŵaŵafyeka ukongwa, ŵakana kuŵataya kuti ŵarutenge.

³⁴ Muwombozi wawo ngwa nthazi; Ambuya ŵa maŵanga ndilo zina lawo. Kwauneneska waŵakambiyenge mlando wawo, alinga kuti wapaske kupumuwa ku charu chapasi, kweni chivurupi ku ŵakuja mu Babiloni.

³⁵ Lipanga pa ŵaKaldiya, atiti Ambuya, ndi pa ŵakuja mu Babiloni, ndi pa ŵaraŵara ŵake ndi ŵanthu ŵake ŵa zeru!

³⁶ Lipanga pa ŵavyanusi alinga ŵasanduke ŵakupusa! Lipanga pa ŵankhondo, alinga kuti ŵaphwanyike!

³⁷ Lipanga pa ŵakavalo ŵake ndi pa magareta ghake, ndi pa maŵanja ghalendo gha nkhondo gha mukati mwawo, mwakuti ŵaŵe ŵanthukazi! Lipanga pa vyuma vya wo vyose, alinga kuti ŵakwamphulike!

³⁸ Chiparantha pa maji ghake, alinga kuti ghakamuke! Pakuti ncharu cha vikozgu ndipo mbakufunthiya pa ŵangoza.

³⁹ “Chifukwa cho vikoko vyamu dondo vyazamuja pamoza ndi ŵapundu mu Babiloni, makuŵi ghazmuja mwake; kuti mukaŵanga so ŵanthu cha muyaya, nanga nkhujamo cha mu migonezi yose.

⁴⁰ Uli ndimo Ambuya angubwanganduliya Sodomu ndi Gomora ndi mizi yakuzengezgana nayo, atiti Ambuya, viyo so paulengevi munthu yo wakajangamo muwa, ndipo palivi mwana wa munthu yo wendamugonamo mwake.

⁴¹ Ehe, ŵanthu ŵakatuwanga ku nkhonde; mutundu wanthazi ndi ŵakaronga ŵanandi ŵayuka kutuwa kutali kwa charu chapasi.

⁴² Ŵato uta ndi mkondo; mbakari, ndipo ŵalivi lisungu. Mdinu wawo we uli nkhuuruma kwa nyanja; ŵakwera pa ŵakavalo, ŵakuvwala nge ndi munthu wa kulimbana nawe, wamwana munthukazi we wa Babiloni!

⁴³ “Karonga wa Babiloni wanguvwa mbiri yawo, ndipo manja ghanguwa kwambura chovyu; suzgu yingumuzinga, ndi urwirwi nge ngwa munthukazi wakupapa.

⁴⁴ “Ehe, ulaka ndi nkharamu yituwa mu lisuwa la Yordane kuziya pa khora la mberere lakukho, ine ruŵiruŵi ndikaŵachiskanga kumuthaŵa; ndipo ndikamikanga yose yo ndinghasankha kuŵa pachanya pake. Pakuti njani yo walingana ndi ine? Njani yo walimbanenge nane? Muliska njani yo wangama paurongo pangu?

⁴⁵ Chifukwa cho avwani fundu yo Ambuya arongoso kuchita pa Babiloni, ndi maghanaghanu ghawo pa charu cha Kaldiya; kwakuneneska twana twa ku mskambu wawo tukaguzikiyanga kutali; kwakuneneska khora lawo likanangikanga pa soka lawo.

⁴⁶ Pa mdinu wakupoke Babiloni charu chapasi chikatenthemanga, ndipo kuliya kwake kukavwikanga mukati mu mitundu.”