Yeremiya 47 - Tonga Bible 1986

Ambuya akamba ndi kupasuka kwa ŵaFilisti

¹ Mazu gha Ambuya ghanguza kwaku Yeremiya mchimi ghapa ŵaFilisti, Farao wenga wandakoso Gaza.

² “Viyo atiti Ambuya: Ehe, maji ghasoka kutuwa ku nkhonde, ndipo ghakaŵanga mweza wakusapatiya: ghakazazanga charu ndi vyose vya mwenimo, msumba ndi ŵeniwo ŵaja mwaku wo. Ŵanthurumi ŵakaliyanga, ndipo yose wakujamo wakatenjenga.

³ Po chiwawa cha mdinu wa ŵakavalo ŵake ŵanthurumi pa kuchimbiya ndi mankharu kwa magareta ghake, pa chiwawa cha kukunkhuruka kwa mikombelo yake, auskeu kuti ŵalereska kuvuli ku ŵana ŵawo cha; manja ghawo ngakukhwinyatadi,

⁴ chifukwa cha zuŵa lenilo likazanga kuzachiphwanya ŵaFilisti wose, kuŵadumuwa mu Turo ndi Sidoni wakovya yose yo wakujamo. Pakuti Ambuya ŵaphwanya ŵaFilisti; ŵakusiyikamo mu charu cha likumba laku Kafatori.

⁵ Phala laza paku Gaza, Ashikeloni wamara. Mwaŵakusiyikamo ŵa Anakimu mwe, mpaka zuŵanji mukajitemanga?

⁶ Aha, walipanga la Ambuya! Mpaka zuŵanji weche kuja cheti? Jiserezgi wija mu chibazi, pumuwa uje chisisi!

⁷ Likajanga uli chisisi, penipo Ambuya akulilanguliya kale? Akulituma kulimbana ndi Ashikeloni ndi so ndi likumba la nyanja.”