Yeremiya 45 - Tonga Bible 1986

Mazu gha Ambuya kwaku Baruki

¹ Mazu gho Yeremiya mchimi wangurongoro kwaku Baruki mwana waku Neriya, penipo walembanga mazu yagha mu buku wachimunene Yeremiya, mu chirimika cha chinayi chaku Yehoyakimu mwana waku Josiya karonga waku Yuda:

² “Viyo atiti Ambuya, Chiuta waku Yisraele, kwaku iwe, Baruki:

³ Ungukamba kuti, ‘Owe ine! Pakuti Ambuya akuskiyako chitima ku kuŵaŵa kwangu; ndavuka ndi kutamantha kwangu, ndipo kuti ndisaniya chipumulu cha.’

⁴ Ukakambe kwaku iyo, Viyo atiti Ambuya: Ehe, chenicho ndazenga ndibwanganduliya pasi, ndipo chenicho ndapanda ndipawuwa, charu chose ichi.

⁵ Ndipo kumbi utijipenje vinthu vikuru? Reka kuvipenja; pakuti, ehe, nditole chiheni pa vyamoyo vyose, atiti Ambuya: kweni ndikakupaskanga iwe umoyo wako nge ndi mphoto ya nkhondo mu malo ghose kweniko ungaya.”