Yeremiya 43 - Tonga Bible 1986

Kuwura chivwanu kwa ŵaYuda mu Egipiti

¹ Yeremiya wanguti wamara kurongoro ku ŵanthu wose mazu yagha ghose gha Ambuya Chiuta wawo, gho Ambuya Chiuta wawo wangumutuma kukamba kwaku iwo,

² Azariya mwana waku Hoshaya ndi Yohanani mwana waku Kareya ndi ŵanthu wose ŵamuyuyu ŵanguti kwaku Yeremiya, “Ukamba utesi. Ambuya Chiuta widu wengavi kukutuma kukamba kuti, ‘Rekani kuya ku Egipiti kwachija kwenikuwa.’

³ Kweni ndi Baruki mwana waku Neriya ndiyu wachita kumikana ndi ifwe, kutipereka ifwe mu janja la ŵaKaldiya, kuti ŵatibaye pamwenga kutiyole ku umkoli ku Babiloni.”

⁴ Viyo Yohanani, mwana waku Kareya, ndi zinduna za maŵanja ndi ŵanthu wose kuti ŵanguvwiya cha mazu gha Ambuya, kujaririya mu charu chaku Yuda.

⁵ Kweni Yohanani mwana waku Kareya ndi ŵakulanguliya wose ŵa maŵanja gha nkhondo ŵanguto wose waku japo ŵaku Yuda, wo ŵanguwe kuzachija mu charu chaku Yuda, kutuwa ku mitundu yose kweniko ŵangudikiskikiya,

⁶ ŵanthurumi, ŵanthukazi, ŵana, ŵana ŵanthukazi ŵa ŵakaronga, ndi munthu yose mweniyo Nebuzaradani nduna ya ŵalonda ŵangusiya ndi Gedaliya mwana waku Ahikamu, mwana waku Shafani; ndi so Yeremiya mchimi ndi Baruki mwana waku Neriya.

⁷ Ŵanguza mu charu cha Egipiti ndipo kuti ŵanguvwiya mazu gha Ambuya cha. Ŵangufika pa Tapanesi.

⁸ Sono mazu gha Ambuya ghanguza kwaku Yeremiya mu Tapanesi:

⁹ “Utole mu manja ghako mya yikuru, ndipo uyibise mu mchenga ndi dongo vyakukasa mu kanthowa ko ke pa khomo lakuserere ku nyumba ya ufumu yaku Farao mu Tapanesi pa maso pa ŵaYuda,

¹⁰ ndipo ukanene kwaku wo, ‘Viyo atiti Ambuya ŵa maŵanja, Chiuta waku Yisraele: Ehe, ndikatumanga ndi kuto Nebukadanezara karonga wa Babiloni, mteŵeti wangu, ndipo wazamumika chitengo chake pachanya pa mya iyi yeniyo ndabisa, ndipo wazamtandika saru yake ya ukaronga pachanya pake.

¹¹ Wakazanga kuzachikoso charu cha Egipiti, kupereka ku chideru ŵakutemeke ku soka la chideru, ku uŵanda ŵakutemeke kusoka la lipanga.

¹² Wazamkozga moto mu nyumba za ŵachiuta ŵaEgipiti: ndipo waza mukocha ndi kuŵayola ku uŵanda ndipo wazamtozga charu cha Egipiti, ulindimo mliska watozge chiphemeska chake cha vyakuruma: ndipo wazamtuwako kuwa mu chimangu.

¹³ Wazamkuswa mya ya Heleopole yo ye mu charu cha Egipiti, ndi wazamukocha ndi moto nyumba za ŵachiuta ŵa Egipiti.’ ”