Yeremiya 41 - Tonga Bible 1986

Gedaliya wabayika

¹ Mu mwezi wa chinkhonde ndichiŵi, Ishimaele mwana waku Netaniya, mwana waku Elishama, wamu mbumba ya ufumu, yumoza wa nduna zira za karonga, wanguza ndi ŵanthu chumi kwaku Gedaliya mwana waku Ahikamu, pa Mizipa. Ŵachirgha kurgha pamoza pa Mizipa,

² Ishimaele mwana waku Netaniya ndi ŵanthu chumi ŵa pamoza nayo ŵangusoka ndi ŵangumutema Gedaliya mwana waku Ahikamu, mwana waku Shafani ndi lipanga, ndi ŵangumubaya; mweniyo karonga wa Babiloni wangumika kuŵa mumirizi mu charu chiya.

³ Ishimaele wangubaya so ŵaYuda wose wo ŵenga ndi Gedaliya pa Mizipa, ndi ŵasilikali ŵankhondo ŵaKaldiya wo ŵengapo penipo.

⁴ Pa zuŵa la pavuli pakubayika kwaku Gedaliya, wenga wandaziŵe nanga njumoza ichi,

⁵ ŵanthu machumi ghakhonde ndi ghatatu ŵangufika kutuliya ku Shekemu ndi Shilo ndi Samaria, ŵakumeta myembi yawo ndi vivwalo vyawo vyakuparuka, ndi ŵakujitema maliŵavu ghawo ŵakunyamuwa mpasku wawo wa ufwa ndi vyachema kwachipaska pa nyumba ya Ambuya.

⁶ Ishimaele mwana waku Netaniya wangutuwa ku Mizipa kuzachikumana nawo, waliyanga wachiza. Wachikumana nawo, wanguti kwaku wo, “Sereni zani kwaku Gedaliya mwana waku Ahikamu.”

⁷ Ŵanguti ŵasere mu msumba, Ishimaele mwana waku Netaniya ndi ŵanthu ŵa pamoza nayo ŵanguŵabaya, ndi ŵanguŵataya mu chisima cha maji.

⁸ Kweni ŵengapo ŵanthu chumi pakati pawo wo wangukamba kwaku Ishimaele, “Reka kutibaya, pakuti tendi zinkhokwe za trigu, barile, majuta, ndi uchi wakubisika mu minda.” Viyo wangugowoka ndi kuti wanguŵabaya pamoza ndi ŵanyawo cha.

⁹ Sono chisima cho Ishimaele wangutayamo viŵanda vyose vya ŵanthu wo wangubaya, chenga chisima chikuru cho karonga Asa wangukumba chakujivikiriyamo kwaku Basha karonga waku Yisraele. Ishimaele mwana waku Netanyiya wanguchizaza ndi wiŵanda.

¹⁰ Sono Ishimaele wanguŵachita uŵanda ŵanthu wose ŵakujapo wo ŵenga mu Mizipa, ŵana ŵanthukazi ŵakaronga ndi ŵanthu wose wo ŵangujapo mu Mizipa, wo Nebuzaradani nduna ya ŵalonda ŵa ŵakaida wangupereka kwaku Gedaliya mwana waku Ahikamu. Ishimaele mwana waku Netaniya wanguŵayole ku umkoli ndipo wangusoka wangwambukiya ku Amoni.

¹¹ Kweni penipo Yohanani mwana waku Kareya, ndi ŵarongozgi wose ŵa maŵanja ŵapamoza nayo, ŵanguvwa gha uheni wose wo Ishimaele mwana waku Netaniya wanguchita,

¹² ŵanguto ŵanthu ŵawo ndi ŵanguruta kwachirwa ndi Ishimaele mwana waku Netaniya. Ŵanguza paku iyo pa chiziŵa chikuru chenicho chemu Gibeoni.

¹³ Ndipo penipo ŵanthu wo ŵenga ndi Ishimaele ŵanguwona Yohanani mwana waku Kareya ndi ŵarongozgi ŵa maŵanja pamoza nayo, ŵangukondwa.

¹⁴ Viyo ŵanthu wose wo Ishimaele wangutole umkoli kutuwa ku Mizipa wangung'anamuka ndi ŵanguweko, wanguruta kwaku Yohanani mwana waku Kareya.

¹⁵ Kweni Ishimaele mwana waku Netaniya wanguthaŵa kwaku Yohanani pamoza ndi ŵanthu ŵankhonde ndi ŵatatu, ndi ŵanguya ku Amoni.

¹⁶ Sono Yohanani mwana waku Kareya ndi ŵarongozgi ŵa maŵanja ŵa pamoza nayo ŵanguto wose ŵakujapo wo Ishimaele mwana waku Netaniya wanguŵatole umkoli kutuwa ku Mizipa pavuli wati wabaya Gedaliya mwana waku Ahikamu, ŵasilikali ŵankhondo, ŵanthukazi, ŵana ŵamithenu, Yohanani wanguŵawezgako ku Gibeoni.

¹⁷ Ndipo wanguruta ndi ŵanguja pa Geruti Kimihamu pafupi ndi Betelehemu, pakukhumba kuya ku Egipiti,

¹⁸ chifukwa cha ŵaKaldiya; pakuti ŵawopanga, chifukwa Ishimaele mwana waku Netaniya wangubaya Gedaliya mwana waku Ahikamu, mweniyo karonga waku Babiloni wangumumika kuŵa mumirizi pa charu chiya.