Yeremiya 40 - Tonga Bible 1986

Yeremiya waruta kwaku Gedaliya ku Mizipa

¹ Mazu ghanguza kwaku Yeremiya kutuwa ku Ambuya pavuli penipo Nebuzaradani nduna ya ŵalonda wangumuzomerezga kuruta kutuwa ku Rama, penipo wangumuto wakumangika mu unyolo pamoza ndi ŵamikoli wose ŵamu Yerusalemu ndi Yuda, wo ŵayolekiyanga ku Babiloni.

² Nduna ya ŵalonda yinguto Yeremiya ndi yinguti kwaku iyo, “Ambuya Chiuta wako wangutaula uheni uwu kuza pa malo yagha;

³ Ambuya ŵeneko ŵachichita uli ndimo angukambiya. Chifukwa mungulakwiya Ambuya, ndipo mwengavi kuvwiya mazu ghawo, chinthu ichi chaza paku imwe.

⁴ Sono, ehe, nditukufwatuwa iwe msanawale ku maunyolo gha pa manja ghako. Asani nchakwenere kwaku iwe kuruta nane ku Babiloni, zanga, ndipo ine ndikakuphwerenga umampha; ndipo asani kuti nchakwenere cha kuruta nane ku Babiloni, ungazanga cha. Ona, charu chose che paurongo pako; rutanga kwe kose ko ughanaghana kuti nkhwamampha ndi nkhwakurunjika kuyako.

⁵ Asani ukajanga iku uwere kwaku Gedaliya mwana waku Ahikamu, mwana waku Shafani mweniyo, karonga wa Babiloni wakumika kuŵa mumirizi wa misumba yaku Yuda, ndipo ukajenge nayo mukati mu ŵanthu; pamwenga rutanga kose kweniko ughanaghana kuti nkhwakurunjika kuyako.” Viyo nduna ya ukaidi wangumupaska vyakurgha ndi chaulera, ndipo wangumuzomerezga kuruta.

⁶ Sono Yeremiya wanguruta kwaku Gedaliya mwana waku Ahikamu pa Mizipa, ndipo wanguja nayo mukati mu ŵanthu wo ŵangusiyika mu charu.

⁷ Nduna zose za maŵanja mu charu chapakweru ndi ŵanthu, ŵanguvwa kuti karonga wa Babiloni wakumika Gedaliya mwana waku Ahikamu kuŵa mumirizi mu charu chiya. Ndipo ŵanguvwa kuti wakupereka kwaku iyo ŵanthurumi, ŵanthukazi, ndi ŵana, ŵa ŵakusauka ŵeniwo ŵengavi kutoreke ku umkoli ku Babiloni;

⁸ ŵanguruta kwaku Gedaliya pa Mizipa ndipo Ishimaele mwana waku Netaniya, Yohanani mwana waku Kareya, Seraya mwana waku Tenahumete, ŵana ŵaku Efai mu Netofate, Jezaniya mwana waku Makata, iwo ndi ŵanthu ŵawo.

⁹ Gedaliya mwana waku Ahikamu, mwana waku Shafani wangurapa kwaku wo ndi ŵanthu ŵawo, wakuti, “Mungopanga cha kutataliya ŵaKaldiya. Janinga mu charu, tataliyani karonga wa Babiloni, ndipo kukamuŵiyaninga umampha.

¹⁰ Ine ndikajanga pa Mizipa, kumumiyani paurongo pa ŵaKaldiya wo ŵakazanga kwaku ifwe; kweni imwe unjikani vinyo, ndi vipasi vya chipwepwe ndi mafuta, ndipo muvilonge mu viyaŵi vinu, ndipo muje mu misumba yinu yeniyo mwato.”

¹¹ Kwakukozgana so, penipo ŵaYuda wo ŵenga mu Moabu ndi mukati mu Amoni ndi mu ŵaEdomo ndi mu vyaru vinyake ŵanguvwa kuti karonga wa Babiloni wakusiyamo ŵanyake mu Yuda ndi kuti wakumika Gedaliya mwana waku Ahikamu, mwana waku Shafani kuŵa mumirizi paku iwo,

¹² sono ŵaYuda wose ŵanguweko ku malo ghose kweniko ŵangudikiskikiya, ŵanguza ku charu chaku Yuda, kwaku Gedaliya pa Mizipa; ndipo ŵanguwunjika vinyo ndi vipasi vya chipwepwe vyakuzala ukongwa.

¹³ Sono Yohanani mwana waku Kareya ndi ŵarongozgi wose ŵa maŵanja mu charu cha pakweru ŵanguza kwaku Gedaliya pa Mizipa,

¹⁴ ŵanguti kwaku iyo, “Kumbi uziŵa kuti Balisi karonga wa Amoni watuma Ishimaele mwana waku Netaniya kukubaya?” Kweni Gedaliya mwana waku Ahikamu kuti wanguvwana nawo cha.

¹⁵ Yohanani mwana waku Kareya wangukamba ku ubende ndi Gedaliya pa Mizipa kuti, “Nditume nkhabaye Ishimaele mwana waku Netaniya, ndipo paulengevi yumoza wakuziŵa ichi. Chifukwa nchine chakuti wakubaye, kuti ŵaYuda wose wo ŵawungana pafupi nawe ŵambininike, ndi kuti ŵakujapo ŵaYuda ŵamare?”

¹⁶ Kweni Gedaliya mwana waku Ahikamu wanguti kwaku Yohanani mwana waku Kareya, “Kuti ukachitanga ichi cha, pakuti ukamba gha utesi paku Ishimaele.”