Yeremiya 4 - Tonga Bible 1986

Ambuya akamba za kupasuka kwaku Yuda

¹ “Asani mukawenga, Yisraele we, atiti Ambuya, mutenere kuweredi kwaku ine. Asani munderezgapo maukazuzi ghinu paurongo pangu, ndi kuti mukangang'a cha,

² ndipo asani mukarapanga, ‘Mo ŵajaliya Ambuya ŵamoyo,’ mu uneneska, mu urunji, ndi mu kunyoroka, sono ndipo mitundu yikatumbikikiyanga mwaku imwe, ndipo mwaku imwe yikatumbwiyanga.”

³ Pakuti viyo Ambuya atiti ku ŵanthu ŵaku Yuda, ndi ku ŵakuja mu Yerusalemu: “Kong'onthani minda yinu ya mawongolomwa ndipo mureke kumija mu minga.

⁴ Jichinjiyeni ku Ambuya tuzganipo khungu la mitima yinu, mwa ŵanthu ŵaku Yuda ndi ŵakuja mu Yerusalemu, vinu ukari wangu ungaruta nge ndi moto, ndi kocha penipo palivi wakuwuzimwa chifukwa cha uheni wa machitidu ghinu.”

⁵ Kambani mwaku Yuda ndipo memezani mu Yerusalemu, ndi muti, “Mbani mbata kuporota mu charu; kamburani, munene kuti, ‘Wunganani, ndipo tiyeni tirute ku mizi ya malinga!’

⁶ Soskani mbendera kurazga ku Zioni, thaŵani kwachibisama, mungasweranga cha, chifukwa ndituza ndi chiheni kutuliya ku nkhonde ndi phasulu likuru.

⁷ Nkharamu yatuwa mu thundu lake, wakupasuwa mitundu wasoka; waruta kutuwa ku malo ghake kwachichita mapopa, charu chinu; mizi yinu yikaŵanga yakubwanganduka, yambura wakujamo.

⁸ Chifukwa chaku ichi vwarani chigudulu, liyani ndi bangurani; pakuti ukari wakofya wa Ambuya ulivi kuwerere vuli kutuwako kwidu.”

⁹ “Mu zuŵa leniliya, atiti Ambuya, karonga ndi mafumu ŵakatondekanga kukhwima mtima, ŵazukuru ŵakazizwanga, ŵamchimi ŵakazukumanga.”

¹⁰ Sono ine ndinguti, “Ambuya Chiuta, kwakuneneska mwaŵapusika limu ŵanthu yaŵa ndi Yerusalemu, pakukamba kuti, ‘Kukamuŵiyaninga umampha’; penipo lipanga lafika pa umoyo wawo iwo.”

¹¹ Pa nyengo yeniyiya kukanenekanga ku ŵanthu yaŵa ndiku Yerusalemu, “Mphepo yakocha yituwa ku mapiri ghambura miti mu lisuwa kupasuwa ŵanthu ŵangu, mphepo iyi kuti yikapepetanga, pamwenga kutozga cha,

¹² njanthazi ukongwa kuchita cho. Sono ndine ndikambiya mu cheruzgu paku iwo.”

¹³ Ehe, watuza nge ndi mitambo, magareta ghake uli ndi kavuruvuru; ŵakavalo ŵake mbamankharo kuruska zinombo. Owe ifwe, pakuti tapasuka!

¹⁴ Yerusalemu we, suka mtima kuti uheni utuwemo, mwakuti utaskike. Mpaka zuŵanji maghanaghano ghako ghaheni ghakajanga mu mtima wako?

¹⁵ Pakuti mazu ghakamba kutuwa ku Dani ghamemeza chiheni kutuwa ku phiri Efraimu.

¹⁶ Chenjezga mitundu kuti watuza; memeza mu Yerusalemu. “Akuŵazinga ŵatuliya ku charu cha kutali; ŵakambuliya pa mizi yaku Yuda.

¹⁷ Ŵazunguliya Yerusalemu kumunanga uli mbalonda ŵa munda, chifukwa wandigarukiya ine, atiti Ambuya.

¹⁸ Nthowa zinu ndi machitidu ghinu ndivyo vyatore ivi paku imwe Iyi ndi suzgu yako, ndipo njakuŵaŵa.”

¹⁹ Kuŵaŵa kwangu, kuŵaŵa kwangu, ndikunkhuwa mu kuŵaŵa! Owe, vimati vya mtima wangu! Mtima wangu upuma mwakofya kuti ndingaja chisisi cha; pakuti ndituvwa kuliya kwa mbata kumemeza kwa nkhondo.

²⁰ Phasulu lindondoloska ndi nthazi pa phasulu, charu chose chapopeskeka. Mahema ghangu ndi saru zangu zakuchinga vyanangika kwamabuchibuchi.

²¹ Mpaka zuŵanji ndikawonanga mbendera, ndi kuvwa kuliya kwa mbata?

²² “Pakuti ŵanthu ŵangu mbakupusa kuti ŵatindiziŵa cha; mbana ŵakupusa, ŵalivi kuwamo. Mbakuchenje mu kuchita uheni, kweni kuchita umampha kuti ŵaziŵa cha.”

²³ Ndingulereska pa charu, ndipo ehe, chenga mapopa ndi chambura kanthu, ndingulereska, kuchanya ukweru kwengavi.

²⁴ Ndingulereska pa mapiri, ndipo ehe, ghanguyaghayika, ndipo tumapiri tose tunguyaghayika uku ndi uku.

²⁵ Ndingulereska, ndi ehe, pengavi munthu, ndipo viyuni vyose vya mude vinguthaŵa.

²⁶ Ndingulereska, ndi ehe, charu cha minda chingusanduka bozwa, ndipo mizi yake yose yingupopeskeka paurongo pa Ambuya, paurongo pa ukari wawo wakofya.

²⁷ Pakuti viyo atiti Ambuya, “Charu chose, chikaŵanga mapopa, kweni kuti ndikamaranga vyose cha.

²⁸ Charu chapasi chikatenjenga chifukwa chaku ivi ndipo kuchanya kukafipanga; pakuti ndakamba, ndasimikizga mtima; ndilivi kugowoka chingana nkhuti ndikawerenga vuli nako so cha.”

²⁹ Pa chiwawa cha ŵakukwera pa kavalo ndi ŵakutweŵa uta; ŵanthu ŵamu muzi we wose ŵathaŵa, ŵasere mu matundu; ŵakwera mu majarawe; mizi yose yapatika ndipo palivi munthu yo wajamo.

³⁰ Ndipo iwe, wamu mapopa, ung'anamuwanji pakuvwara vyakutije, utijinozga ndi vyakunozge vya golide, ukuzga maso ghako ndi vyakupaka? Utijitozga kwawaka. Mabwezi ghako ghatukunyoza; ŵapenja umoyo wako.

³¹ Pakuti ndavwa kuliya uli nkhwa munthukazi yo we mukupapa, kuŵaŵa nge nkhwaku yo wapapa mwana wake wa umwali, kuliya kwa ŵanthu ŵaku Zioni ŵayatuka, ŵatambaruwa manja ghawo, ŵatiti, “Owe ifwe tiyatuka paurongo pa ŵakubaya.”