Yeremiya 37 - Tonga Bible 1986

Zedekiya wapempha Yeremiya kuti warombe ŵanthu

¹ Zedikiya mwana waku Josiya, mweniyo Nebukadanezara karonga waku Babiloni wangumia kuŵa karonga mu charu cha Yuda, wanguwusa mu malo ghaku Koniya mwana waku Yehoyakimu.

² Kweni chingana ndiyo pamwenga ŵateŵete ŵake pamwenga ŵanthu ŵamu charu cho kuti ŵanguvwiya cha mazu gha Ambuya gho angukambiya mwaku Yeremiya mchimi.

³ Karonga Zedikiya wangutuma Yohukali mwana waku Shelemiya, ndi Zefaniya mzukuru mwana waku Masiya, kwaku Yeremiya mchimi, kuti, “Utirombe kwa Ambuya Chiuta widu.”

⁴ Sono Yeremiya wenga weche kusere ndi kutuwa mukati mu ŵanthu, chifukwa ndipo weche wandaŵikiki mu ukayidi.

⁵ Nkhondo yaku Farao yinguza kutuwa ku Egipiti; ndipo penipo ŵaKaldiya ŵeniwo ŵanguzinga Yerusalemu ŵanguvwa makani ghaku iwo, ŵangutuwako ku Yerusalemu.

⁶ Ndipo ghanguza mazu gha Ambuya kwaku Yeremiya mchimi, ghakuti:

⁷ “Viyo atiti Ambuya, Chiuta waku Yisraele: Viyo ndimo ukakambiye karonga waku Yuda yo wakutuma kwaku ine kuzachifumba kwaku ine, ‘Ehe, nkhondo yaku Farao yo yinguza kwazachikuwovya ye pafupi kuwere ku Egipiti, ku charu chawo.

⁸ Ndipo ŵaKaldiya ŵazenge so kurwa ndi msumba uwu; ŵakautonga ndi kuwuwocha ndi moto.

⁹ Viyo atiti Ambuya, Rekani kujipusika, kuti, “ŴaKaldiya ŵakatuwangako kwaku ifwe”; pakuti watuwengeko cha.

¹⁰ Pakuti chingana mungapunda nkhondo yose ya ŵaKaldiya wo ŵaturwana namwe, ndi ŵangajako mukati mwawo ŵakurasika pe munthu we yose mu hema lake, wayukenge ndi kocha msumba uwu ndi moto.’ ”

Yeremiya mu ukaidi

¹¹ Ndipo pa nkhondo ya ŵaKaldiya yingutuwako ku Yerusalemu pakopa nkhondo yaku Farao,

¹² Yeremiya wangutuwa mu Yerusalemu ndi kuruta ku charu chaku Benjamini kwachironde chigaŵa chake kuwa, mukati mu ŵanthu.

¹³ Penipo wenga pa chipata chaku Benjamini, mulinda yo wanguŵapo wakudanika Irija mwana waku Shelemiya, mwana waku Hananiya, wangumuko Yeremiya mchimi, wanguti, “Upatuka iwe ku ŵaKaldiya.”

¹⁴ Ndipo Yeremiya wanguti, “Mbutesi; kuti ndipatuka ku ŵaKaldiya cha.” Kweni Irija kuti wangumuvwiya cha, ndipo wangumuko Yeremiya ndi wangutore ku ŵakaronga.

¹⁵ Ndipo ŵakaronga ŵangumukalipiya Yeremiya, ndi ŵangumpuma ndi ŵangumserezga mu ukaidi, mu nyumba yaku Jonafani mlembi, pakuti yingusanduskika kuŵa nyumba ya ukaidi.

¹⁶ Penipo Yeremiya wangusere mutuvipinda twa pasi, wangujamu mazuŵa ghanandi,

¹⁷ karonga Zedekiya wangutuma kwachimutuzga ndipo wangumuronde. Karonga wangumufumba ku udeke mu nyumba yake, wanguti, “Kumbi ghaliko mazu ghatuwa kwa Ambuya?” Yeremiya wanguti, “Ghaliko.” Sono wanguti, “Ukaperekekanga mu janja la karonga waku Babiloni.”

¹⁸ Yeremiya wanguti soka karonga Zedikiya, “Nchine cho ndakwanangiya pamwenga ndanangiya ŵateŵete ŵako, pamwenga ŵanthu Yaŵa, po ŵandiŵika mu ukaidi?

¹⁹ Kumbi ŵepani ŵamchimi ŵako wo ŵanguchima kwaku iwe, kuti, ‘Karonga waku Babiloni kuti wakazanga cha kumikana nawe ndi kumikana ndi charu ichi?’

²⁰ Sono yivwa ndi kurombe, O! Mbuya wangu karonga: zomerani kuti kuŵeyere kwangu kufike paurongo pinu, ndipo rekani kundiwezge so kunyumba yaku Jonafani mlembe, vinu ndingachifwiya kweniko.”

²¹ Viyo karonga Zedekiya wangurangura, kuti ŵamuŵike Yeremiya mu bwalo la nyumba ya ukaidi; ndipo chimbanduka cha chingwa chiperekeke kwaku iyo zuŵa ndi zuŵa chakutuliya ka mseu wa ŵakubika, mpaka chingwa chose cha mu msumba chimari. Viyo Yeremiya wanguja mu bwalo la nyumba ya ukaidi.