Yeremiya 33 - Tonga Bible 1986

Mphanda yirunji

¹ Mazu gha Ambuya ghanguza so kwaku Yeremiya nyengo ya chiŵi, penipo wenga weche kujarikiya mu bwalo la ukaidi:

² “Viyo atiti Ambuya ŵeniwo angulenga charu chapasi, ndi kuchisunga, Ambuya ndi zina lawo:

³ Danani kwaku ine ndipo ndikwamukeninga, ndikuneniyeninga vinthu vikuru ndi vyakubisika vyo mulivi kuviziŵapo.

⁴ Pakuti viyo atiti Ambuya, Chiuta waku Yisraele, gha pa nyumba zamu msumba uwu ndi nyumba za ŵakaronga ŵaku Yuda zo zingubwangandulikiya pasi kwachichita linga lakujivikiriya ku vimbumira vya wakuzinga ndi ku nkhondo:

⁵ ŴaKaldiya ŵakazanga kuzachirwa ndi kuzizaza ndi viŵanda vya ŵanthu ŵeniwo ndikakosonga mu kukwiya kwangu ndi ukari wangu; pakuti ndabisa chisku changu ku msumba uwu chifukwa cha mautimbanizi ghawo ghose.

⁶ Ehe, ndikatolenga kwaku wo umoyo ndi kuchizga, ndipo ndikaŵachizganga ndi kuŵalongo kuzara kwa vyakusakata ndi wanangwa.

⁷ Ndikaŵawezganga ŵamikoli ŵaku Yuda ndi ŵamikoli ŵaku Yisraele, ndi kuŵazenga so uli ndimo ŵanguŵiya pakudanga.

⁸ Ndikaŵasukanga ku mlando wa uheni wawo wose wa paku ine, ndipo ndikagowoliyanga uheni wose wa kugarukiya ine.

⁹ Ndipo msumba uwu ukaŵanga kwaku ine zina la chimwemwe rumbu ndi unkhankhu paurongo pa mitundu yose ya charu chapasi yeniyo yikavwanga vya umampha wose weniwo ndikaŵachitiyanga iwo; ŵakawopanga ndi kunjenjeme chifukwa cha umampha wose ndi kusakata kose kweniko ndituwupaska.

¹⁰ “Viyo atiti Ambuya: Mu malo yagha ghenigho mutighanena kuti, ‘Ndi mapopa mwambura munthu pamwenga nyama,’ mu misumba yaku Yuda ndi miseu ya Yerusalemu yeniyo nja uyiku, yambura munthu, pamwenga wakujamo, pamwenga nyama, mwazamuvwika so

¹¹ mazu gha kuseka ndi mazu gha chimwemwe, mazu gha mweneko wa nthengwa ndi mazu gha mwali wa nthengwa, mazu ghaku wo ŵatumba, penipo ŵatuza ndi mipasku yakuwonge ku nyumba ya Ambuya: ‘Paskani viwongo ku Ambuya ŵa maŵanja, chifukwa mbamampha Ambuya, pakuti ncha muyaya chifundu chawo!’ “Pakuti ndikawezgiyangamo ŵamikoli ŵa charu cho, uli mpha kudanga, atiti Ambuya.

¹² “Viyo atiti Ambuya ŵa maŵanja: Mu malo yagha ghenigho ndi mapopa, ghambura munthu pamwenga nyama, ndi mu misumba yake yose, mukaŵanga malo ghakujamo ŵaliska ŵachipumuzga miskambu yawo.

¹³ Mu misumba ya mu charu cha mitunthu, mu misumba ya Shefela, ndi mu misumba ya ku Negebe, mu charu chaku Benjamini, mu malo ghaku Yerusalemu, ndi mu misumba yaku Yuda, miskambu yikaŵerengekanga so ndi manja gha ŵakuyiŵerenga, atiti Ambuya.

¹⁴ “Ehe, mazuŵa ghakazanga, atiti Ambuya, penipo ndazamufiska phanganu lenilo ndingupangana ndi Yisraele ndi Yuda.

¹⁵ Mu mazuŵa ghenigho ndi pa nyengo yeniyiya ndikamuyuskikyanga Davidi mphanda yirunji, iyo wazamuchita cheruzgu chirunji ndi ukongorekwa mu charu.

¹⁶ Mu mazuŵa ghenigha Yuda wakataskikanga ndi Yerusalemu wakajanga wakuvikiririka. Ndipo ili ndilo zina lo ŵakadanikanga nalo: ‘Ambuya mburunji widu.’

¹⁷ “Pakuti, atiti viyo Ambuya: Davidi kuti wakasoŵanga munthu cha wakuja pa chitengo chaku Yisraele,

¹⁸ ndipo ŵazukuru ŵina Levi kuti ŵakasoŵanga munthu cha paurongo pangu ŵakupereka mipasku yakocha, kocha mipasku ya ufwa, ndi kupereka sembe muyaya.”

¹⁹ Mazu gha Ambuya ghanguza kwaku Yeremiya:

²⁰ “Atiti Ambuya: Asani mungaswa phanganu langu la msana ndi phanganu langu la usiku kuti msana ndi usiku vireke kuŵako pa nyengo yawo yakutemeka;

²¹ iku phanganu langu nalo ndi Davidi mteŵeti wangu likaswekanga viyo kuti wakaŵanga ndi mwana munthurumi cha wakuwusa pa chitengo chake cha ufumu, ndi phanganu langu ndi ŵazukuru ŵaLevi ŵakunditataliya, likaswekanga.

²² Nge ndimo liŵanja la kuchanya kuti lingaŵerengeka cha, ndi muchenga wapa likumba kuti ungapimika cha, viyo ndimu ndikandaniskiyanga mphapu yaku Davidi mteŵeti wangu, ndi ŵazukuru ŵaLevi ŵeniwo ŵatinditataliya.”

²³ Mazu gha Ambuya ghanguza kwaku Yeremiya:

²⁴ “Kumbi ulivi kuteska chenicho ŵakamba ŵanthu yaŵa, kuti, ‘Kumbi Ambuya ataya mbumba ziŵi zo ŵangusankha?’ Viyo ŵanyoza ŵanthu ŵangu, kuti nge ndi mtundu so cha mu maso ghawo.

²⁵ Viyo atiti Ambuya: Asani ndilivi kukhozga phanganu langu la msana ndi la usiku ndi marangu gha kuchanya ndi charu chapasi,

²⁶ iku ndikapatanga mphapu yaku Yakobe ndi Davidi mteŵeti wangu, ndipo kuti ndikasankhanga yumoza cha wa ŵamphapu yake kuwusa pa mphapu yaku Abrahamu, Yisaki ndi Yakobe. Pakuti ndikaŵachitiyanga so umampha, ndipo ndikaŵanga ndi lisungu paku iwo.”