Yeremiya 24 - Tonga Bible 1986

Sokora ziŵi za nkhuyu

¹ Pavuli Nebukadanezara karonga wa Babiloni wanguti wato, Yekoniya mwanawaku Yehoyakimu karonga waku Yuda, mu Yerusalemu pamoza ndi ŵanangwa ŵaku Yuda, ŵamisiri ndi ŵakusura, kuza nawo ku Babiloni, Ambuya angundiwoneska chiwona ichi: Awonani, sokora ziŵi zingujarikika paurongo pa kasopi wa Ambuya.

² Sokora yimoza yenga ndi nkhuyu zamampha ukongwa, zakukozgana ndi nkhuyu za mruwuku, kweni sokora yinyake yenga ndi nkhuyu ziheni ukongwa, ziheni zakuti zingarghika cha.

³ Ndipo Ambuya anguti kwaku ine, “Uwonanji, Yeremiya?” Ine ndinguti, “Nkhuyu, nkhuyu zamampha, zamampha ukongwa, ndi nkhuyu ziheni, ziheni, ziheni ukongwa, ziheni zo kuti zingarghika cha.”

⁴ Sono mazu gha Ambuya ghanguza kwangu:

⁵ “Viyo atiti Ambuya, Chiuta waku Yisraele: Ŵakuyoreka ku Yuda, ŵeniwo ndaŵatuzgako ku malo yagha kuya ku charu cha ŵaKaldiya, ŵakaŵanga ŵamampha nge ndi nkhuyu izi zamampha.

⁶ Ndikalereskanga iwo kuŵachitiya umampha, ndipo ndikaŵawezgiyanga ku charu ichi. Ndikaŵazenganga, ndi kuti ndiŵapasuliyenge pasi cha; ndikaŵapandanga, ndipo kuti ndikaŵazuwanga cha.

⁷ Ndikaŵapaskanga mtima wakuziŵa kuti ine ndine Ambuya; ndipo ŵakaŵanga ŵanthu ŵangu, ine ndikaŵanga Chiuta wawo, pakuti ŵakaweriyanga kwangu ndi mtima wawo wose.

⁸ “Kweni atiti viyo Ambuya: Kwakukozgana ndi nkhuyu ziheni zo kuti zingarghika cha, ndimu ndikachitiyanga ndi Zedekiya karonga waku Yuda, ŵaraŵara ŵake, ndi ŵakujapo ŵa Yerusalemu wo ŵakajangapo mu charu, ndi ŵakuja mu charu cha Egipiti.

⁹ Ndikaŵachitanga kuŵa chakofya ku maufumu ghose gha charu chapasi, kuŵa chakusekeka, chakukambika, kawerere, ndi chakutembeka mu malo ghose ghenigho ndikaŵadikiskiyangako.

¹⁰ Ndipo ndikatumanga lipanga, chilala, ndi chideru paku wo, mpaka ŵakamaranga tetete mu charu chenicho ndinguŵapaska iwo ndi auskeu.”