Yeremiya 21 - Tonga Bible 1986

Akambiya limu za kupasuka kwa Yerusalemu

¹ Yagha ndigho mazu ghanguza kwaku Yeremiya kutuwa ku Ambuya, pa nyengo yo karonga Zedekiya wangutuma kwaku iyo Pashuru mwana waku Malkiya, ndi Zefaniya mzukuru yo, mwana waku Maseya, wakunena kuti,

² “Tifumbiyeni ku Ambuya, pakuti Nebukadanezara karonga wa Babiloni wachita nafwe nkhondo; pamwenga Ambuya akatichitiyanga kwakulingana ndi nchitu zawo zose, vinu akamuwezgiyanga vuli.”

³ Sono Yeremiya wanguti kwaku wo:

⁴ “Mukakambe viyo kwaku Zedekiya, ‘Viyo atiti Ambuya, Chiuta waku Yisraele: Ehe, ndikawezgiyanga vuli vidya vya nkhondo vyo vye mu manja ghinu, vyenivyo imwe murwiya navyo pa karonga wa Babiloni ndi pa ŵaKaldiya wo ŵakuzingani kubwalo ku malinga; ndipo ndikaŵawunjikanga wose mukati mu msumba uwu.

⁵ Ine ndamweni ndikarwanga namwe ndi janja lakutambaruwa ndi janja la nthazi, mu ukari, mu ufyu, ndimwakufya mtima ukongwa.

⁶ Ndikapumanga ŵakuja mu muzi uwu, munthu ndi nyama pamoza; ŵakafwanga ndi chideru chikuru.

⁷ Pavuli atiti Ambuya, ndikaperekanga Zedekiya karonga waku Yuda, ndi ŵateŵeti ŵake, ndi ŵanthu ŵamu msumba uwu wo ŵakapozomokanga ku chideru, lipanga ndichilala, mu janja laku Nebukadanezara karonga wa Babiloni, ndi mu janja la ŵakupindikana ŵawo, mu janja laku wo ŵapenja kuŵabaya. Ŵakaŵakosonga ndi lipanga; kuti wakaŵafwiyanga lisungu, pamwenga kuŵareka, pamwenga kuŵa ndi chitima cha.’

⁸ “Ndipo ku ŵanthu yaŵa ukati: ‘Viyo atiti Ambuya: Ehe, ndiŵika paurongo pinu nthowa ya umoyo ndi nthowa ya nyifwa.

⁹ Yo wakajanga mu msumba wakafwanga ndi lipanga, ndi chilala, ndi chideru; kweni yo wakatuwanga ndi kwachithere ku ŵaKaldiya, wo ŵakuzingani wakajanga wamoyo, wakaŵanga ndi umoyo wake nge ndi mphoto ya nkhondo.

¹⁰ Pakuti ndalereska chisku changu pa msumba uwu kuwuchitiya uheni umampha cha, atiti Ambuya: ukapaskikanga mu janja la karonga wa Babiloni, ndipo wakawochanga ndi moto.’

¹¹ “Ndipo ku nyumba ya karonga waku Yuda ukambe kuti, ‘Avwani mazu gha Ambuya,

¹² wa nyumba yaku Davidi! Atiti viyo Ambuya: Chitani cheruzgu chirunji ndi mlenji, ndipo umutaske ku janja la wakumukandirizga yo wakwamphulika vyake, vinu ukari wangu ungatuwa uli ndi moto, ndi kocha, po paulengevi wakuwuzimwa, chifukwa cha machitidu ghinu ghaheni.’ ”

¹³ “Ehe, ine nde wakususkana nawe, wakuja mu dambo we, jarawi lapa mtetete we, atiti Ambuya; mwaŵenimwe mutiti, ‘Njani wakasikanga kulimbana ndi ifwe, pamwenga njani wakaserenga mu nyumba zidu?’

¹⁴ Ndikamulanganinga kwakuyana ndi nchitu zinu, atiti Ambuya; ndikakozganga moto mu lisuwa lake, ndipo ukananganga vyose vyenivyo vikumzingiliya iyo.”