Yeremiya 20 - Tonga Bible 1986

Pashuru mzukuru wapuma Yeremiya ndi kumumanga

¹ Pashuru mzukuru, mwana waku Imere yo wenga wanchitu mura mu nyumba ya Ambuya, wanguvwa Yeremiya wachichima vinthu ivi.

² Sono Pashuru wangupuma Yeremiya mchimi yo, ndipo wangumumanga mu matangaja ghenigho ghenga mu Likomo laku Benjamini la panena la nyumba ya Ambuya.

³ Ndi mlenje penipo Pashuru wangufwatuwa Yeremiya mu matangaja, Yeremiya wanguti kwaku iyo, “Ambuya kuti atikudana zina lako kuti ndiwe Pashuru cha, kweni Chakofya Kosekose.

⁴ Pakuti atiti viyo Ambuya, Ehe, ndikakuchitanga chakofya kwaku wamweni ndi ku mabwezi ghako ghose. Ŵakabayikanga ndi lipanga la ŵakupindikana ŵawo, maso ghako ghachilereska. Ndipo ndikaperekanga Yuda yose mu janja la karonga wa Babiloni; ŵakayorekiyanga mu umkoli ku Babiloni, ndipo ŵakaŵabayanga ndi lipanga.

⁵ Ndipo so, ndikaperekanga usambasi wose wa msumba chanduwu chake chose, vinthu vyose vya mitengo, ndi mbiku zose za mafumu ghaku Yuda mu janja la ŵakupindikana ŵawo, ŵeniwo ŵakaŵa kwamphuwanga ndi kuŵamanga, ndi kuya nawo ku Babiloni.

⁶ Ndipo iwe Pashuru, ndi wose ŵakuja mu nyumba yako, mukayanga mu umkoli mukarutanga ku Babiloni, ndipo mwamufwiya kwenikuwa ndi kuŵikika kwenikuwa, iwe ndi mabwezi ghako ghose, kwaku wo iwe wachima vyautesi.”

⁷ Ambuya mwe, mwandipusika, ndipo ndingupusikika; mwe ŵakulimba kwakuruska ine, ndipo imwe mwapunda. Ine ndaŵa chakusekeka, zuŵa lose weyose watindiwera.

⁸ Pakuti penipo pose ndikamba, ndiliya, ndibangula, “Chiwawa ndi phasulu!” Pakuti mazu gha Ambuya ghandiŵiya ine tozu ndi chakusekeka zuŵa lose.

⁹ Asani ndititi, “Kuti ndikamuzumbuwanga cha, pamwenga kuchima so mu zina lake,” mu mtima wangu muchita nge mwe moto wakukole wo wajarikiya mu viwanga vyangu, ndipo ndavuka kuwusunga mukati, viyo kuti ndingaziŵa kujiko cha.

¹⁰ Pakuti ndituvwa ŵanandi ŵatokotezga. “Mantha ghe mu malo ghose! Musumuweni! Tiyeni timusumuwe!” Ndimu ghakambiya mabwezi ghangu ghose ghakuziŵirizgana nagho, ŵakulindizga kuwa kwangu. “Akhumba wakapusikikanga, penipo ndipo tingaziŵa kumupunda, ndi kumutayiya thayu lidu.”

¹¹ Kweni Ambuya ŵe nane uli ndi wankhondo wakofya; chifukwa cho ŵakundisuzga ŵakaguŵanga, kuti ŵakandipundanga cha. Ŵakalengeskekanga weniukongwa, chifukwa kuti ŵakachitangapo kanthu cha, kuyuyulika kwawo kwa muyaya kuti kukaruwikanga cha.

¹² Ambuya mwe ŵa maŵanja, imwe mutesa ŵarunji, imwe muwona mtima ndi zeru, ndiwoneskeni thayu linu paku iwo, pakuti ndapereka kwinu mlando wangu.

¹³ Mbiyani Ambuya; Rumbani Ambuya! Pakuti ataska umoyo wa ŵakusuzgika ku janja la wakuchita uheni.

¹⁴ Lakutembeka liŵe zuŵa, mwaku lo ndingupapikiya! Zuŵa lenilo ama angundipapiya, lireke kutumbikika!

¹⁵ Watembeke munthu yo wanguza ndi uthenga ku ada, wakuti, “Mwana munthurumi wakuwiyani imwe,” kuŵakondweska ukongwa.

¹⁶ Munthu yo waŵe ndi misumba yeniyo Ambuya anguthereska kwambura lisungu; watenere kuti wavwe kuliya ndi mlenji ndi chenjezgu ndi msana pakati,

¹⁷ chifukwa ŵengavi kundibayiya mu chibali; viyo mphanyi ama ŵanguŵa muunda wangu, ndi chibali chawo chinguŵa chikuru nyengo zose.

¹⁸ Chifukwa nchine cho ndingutuliya mu chibali kuzachiwona suzgu ndi chitima, ndi kuja mu chilengesku mu mazuŵa gha umoyo wangu?