Yeremiya 17 - Tonga Bible 1986

Gomezgani mu Ambuya

¹ Uheni waku Yuda walembeka ndi peni ya chisulo: ndi songo ya daimoni wazighirika pa chakulembapo cha mtima wawo, ndi pa masengwe gha majochero ghawo,

² ndipo ŵana ŵawo ŵakumbuka majochero ghawo gha sembe ndi vyakumika vyawo vyakusope Ashera ku muti wose uŵisi, ndi pa mitunthu yitali;

³ pa mapiri gha pa charu chikweru. Usambasi winu ndi mbiku zinu zose ndikaperekanga kukuskoŵeka, nge ndi mtengo wa uheni winu mu chigaŵa cha charu chinu chose.

⁴ Mukafwatuwangako janja linu ku chihara chinu chenicho ndingumupaskani, ndipo ndikamuchitaninga kutataliya ŵakupindikana ŵinu mu charu chenicho mulivi kuchiziŵa, pakuti mu ukari wangu moto wakozgeka weniwo ukakolenga muyaya.

⁵ Viyo atiti Ambuya: “Wakutembeka ndi munthu mweniyo wagomekezga mu munthu yo wasanduska liŵavu kuŵa nthazi yake, mweniyo mtima wake utuwako ku Ambuya.

⁶ We uli nchivwati cha mu bozwa, ndipo kuti wakawuwonanga umampha uchiza cha. Wakajanga mu malo ghakumila ghamu bozwa, mu charu cha muche cha mbura ŵanthu.

⁷ “Wakutumbikika ndi munthu mweniyo wagomekezga Ambuya, mweniyo gomezgu lake mba Mbuya.

⁸ Wakozgana ndi muti wakupandika pafupi ndi maji, weniwo utambaruliya misisi yake ku maji, ndipo kuti utopa cha chichiza chifundizi, pakuti mani ghake ghajaririya uŵisi, ndipo kuti usuzgika cha mu charu cha chilala pakuti kuti ureka cha kupasa vipasi.”

⁹ Mtima ngwakupusika kuruska vinthu vyose, ndipo nguheni ukongwa; njani wangauziŵa?

¹⁰ “Ine Ambuya ndipapaska mzimu, nditesa mtima, kupaska ku munthu we yose kwakulingana ndi thowa zake, kwakulingana ndi chipasi cha machitidu ghake.”

¹¹ Mweniyo wasaniya usambasi mu nthowa yambura kurunjika, wayana ndi nkhwali yeniyo yiunjika pamoza ŵana wo yengavi kukonkhomo iyo; viyo mukati mwa mazuŵa ghake usambasi ukamuthaŵanga, ndipo pa umari wake wakaŵanga bereŵeza.

¹² Chitengo cha unkhankhu chakujarikika pachanya kutuwa ku mtendeko ndi malo ghidu ghakupaturika.

¹³ Ambuya mwe, gomezgu laku Yisraele, ndakuti, wose wo ŵatikujowoni ŵakalengeskekanga; wo ŵarekana namwe ŵakalembekanga mu charu chapasi, pakuti ŵajowo Ambuya, wo nchisima cha maji gha umoyo.

¹⁴ Ndichizgeni, Ambuya, ndipo ndikachizgikanga; ndipozomoskeni, ndipo ndikapozomokanga; pakuti imwe ndimwe rumbu langu.

¹⁵ Ehe, ŵatiti kwaku ine, “Ghepani mazu gha Ambuya? Rekani ghazenge!”

¹⁶ Ndirivi kumukakamizgani kutuma chiheni, chingana nkhuti ndanweke zuŵa lasoka cha, imwe muziŵa; vyo vingutuwa mu milomo yangu, vyenga paurongo pa chisku chinu.

¹⁷ Rekani kuŵa chakofya kwaku ine; ndimwe chakubisamamo changu muzuŵa liheni.

¹⁸ Ŵalengeskeke ŵeniwo ŵatindisuzga; kweni ine mungandilengeska cha; ŵadiskike nthazi rekani kundidiska nthazi ine. Toleni paku iwo zuŵa liheni muŵaphwanye ndi kuphwanya kwa kaŵi.

¹⁹ Ambuya angunena nane, “Ruta ukame pa Likomo la Benjamini, paku lenilo ŵakaronga ŵaku Yuda ŵaserere ndi lenilo so ŵatuliyapo, ndi pa malikomo ghose gha Yerusalemu,

²⁰ ndipo ukanene kuti, ‘Avwani mazu gha Ambuya, imwe mwa ŵakaronga ŵaku Yuda, ndi ŵaYuda wose, ndi wose ŵakuja mu Yerusalemu, ŵeniwo ŵaserere mu malikomo yagha.

²¹ Viyo atiti Ambuya: Chenjeni ndi maumoyo ghinu vinu mungafwa, mungapinganga katundu cha pa zuŵa la sabata, pamwenga kumuserezga pa malikomo gha Yerusalemu.

²² Ndipo rekani kunyamuwa katundu kutuwa mu nyumba zinu pa sabata pamwenga kuchita mlimu we wose, kweni sungani zuŵa la sabata kuŵa lakupaturika, uli ndimo ndingulanguliya auskemwe.

²³ Kweni kuti ŵanguvwa chingana nkhutegherezga cha, kweni ŵangungangamiska khosi lawo, kuti ŵareke kuvwa ndi kuronde chisambizgu.

²⁴ “ ‘Kweni asani mukavwanga kwangu, atiti Ambuya, ndi kureka kuserezga mphingu pa malikomo gha msumba uwu pa zuŵa la sabata, kweni kusunga lakupaturika zuŵa la sabata ndi kuchita nchitu cha mwaku lo;

²⁵ po ndipo ŵakaserenga pa malikomo yagha ŵakaronga wo ŵaja pa chitengo chaku Davidi ŵakazanga ŵakukwera mu magareta ndi pa ŵakavalo, iwo ndi ŵanangwa ŵawo, ŵanthu ŵaku Yuda ndi ŵakuja mu Yerusalemu, ndipo mu msumba uwumukajanga ŵanthu muyaya.

²⁶ Ndipo ŵakazanga kutuwa ku misumba yaku Yuda ndi malo ghakuzunguliya Yerusalemu, kutuwa ku charu chaku Benjamini, kutuwa ku Sherela, ku charu cha mitunthu, ndi kutuwa ku Negebu ŵakupinga mipasku yakocha ndi zisembe, mipasku ya ufwa ndi vyachema, ndi kuza ndi mipasku ya kuwonge ku nyumba ya Ambuya.

²⁷ Kweni asani mukarekanga kundivwa ndi kureka lamulu lakuti zuŵa la sabata liŵe lakupaturika, ndi kupinga katundu kusere pa malikomo gha Yerusalemu pa zuŵa la sabata; po ndipo ndikakozganga moto mu malikomo ghake, zikafyanga nyumba za ufumu za Yerusalemu ndipo kuti ukazimwikanga cha.’ ”