Yeremiya 15 - Tonga Bible 1986

Akambiya limu vya suzgu yakofya

¹ Sono Ambuya anguti, kwaku ine, “Chingana Mosese ndi Samuele ŵanguma paurongo pangu, kweni ndipuuli mtima wangu kuti watinge ung'anamukiyenge ku ŵanthu yaŵa cha. Ŵatuzgeko ku maso ghangu, ŵarutenge!

² Ndipo ŵachikufumba, kuti, ‘Tikayanga pani?’ iwe utinge kwaku wo, ‘Viyo atiti Ambuya: “Wo ŵatemeke ku chideru nkhu chideru; wo ŵatemeke ku lipanga nkhu lipanga; wo ŵatemeke ku chilala nkhu chilala; ndipo wo ŵatemeke ku umkoli nkhu umkoli.” ’

³ “Ndikaŵamikiyanga mitundu yinayi yaŵakuphwanya, atiti Ambuya: lipanga kwachibaya, ŵagaru kuparuwa, viyuni vya mude ndi vikoko vya pacharu chapasi kuparuwa ndi kuparang'a.

⁴ Ndipo ndikaŵachitanga chakofya ku maufumu ghose mu charu, chifukwa chaku cho Manase mwana waku Hezekiya karonga waku Yuda, wanguchita mu Yerusalemu.

⁵ Njani wakaŵanga ndi lisungu paku iwe, Yerusalemu we, pamwenga njani wakakukhuzanga? Njani wakapatukanga kukufumbani, mulipo uli?

⁶ Wandikana ine, atiti Ambuya, weche kuwerere vuli; viyo ndatambaluriya janja langu paku iwe ndakupasuwa; ndavuka ndi kugowoka-gowoka.

⁷ Ndaŵapepeta ndi chakupepete mu malikomo gha charu; ndaŵapaska chitima chanyifwa, ndaparghang'a ŵanthu ŵangu; ŵalivi kuweko ku nthowa zawo.

⁸ Ndandaniska vyoko vyawo, kwakuruska muchenga wa zinyanja; ndatole pa ŵanyinawo ŵa ŵanyamata, wakuŵananga ndi msana pakati; ndatuma kuŵaŵa ndi chofyu kuti viŵawiye kwa mabuchibuchi.

⁹ Yo wangupapa ŵankhonde ndi ŵaŵi wadengenduka, walakatuka; lumwi lake lasere kweche msana; wachita soni ndipo walengeskeka. Ndipo ŵakujapo ŵaku wo ndikaŵaperekanga ku lipanga, paurongo pa ŵakupindikana wawo, atiti Ambuya.”

¹⁰ Soka ndangu, ama pakuti mungundipapa, ndamunthu wa suskano ndi wakulimbana ndi charu chose! Ndilivi kukongoleska, chingana nkhuti ndikongole ine, kweni wose ŵatinditemba.

¹¹ Ambuya mwe, kwakuneneska ndapempha umampha wawo kwinu, ndamuŵeyereni chifukwa cha wakupindikana, mu nyengo ya suzgu ndi mu nyengo ya kuyungwa!

¹² Kumbi munthu wangaziŵa kufyo chisulo, chisulo chakutuwa ku nkhonde, ndi mkuŵa?

¹³ “Uromba winu ndi mbiku zinu ndikaperekanga kuŵa vyakuskowa, kwambura mtengo, chifukwa cha uheni winu wose, mu charu chinu chose.

¹⁴ Ndikamuchitiskaninga kuti mutataliye ŵakupindikana ŵinu mu charu cho mulivi kuchiziŵa, pakuti moto wa ukari wangu wakozgeka, weniwo ukakolenga muyaya.”

¹⁵ Ambuya mwe, imwe muziŵa; mundikumbuke ndi muchezge nane, ndipo toleni thayu chifukwa changu pa wakundisuzga. Mukukunthiyapo kwinu rekani kundituzgapo; ziŵani kuti chifukwa chinu ndipinga matozo.

¹⁶ Mazu ghinu ghangusanirika ndipo ndingughargha; mazu ghinu ghangundiŵiya likondwa ndi kuyereyeta mu mtima wangu; pakuti ndadanika ndi zina linu, Ambuya mwe, Chiuta wa maŵanja.

¹⁷ Ine kuti ndinguja nawo mu mpingu wa ŵamalikondwa gha ŵaka cha, chingana nkhuti ndingusekere nako cha. Ndinguja pakundija, chifukwa janja linu lenga paku ine, pakuti mungundizaza ndi ukari.

¹⁸ Chifukwa chine kuŵaŵa kwangu kureka kumara, bala langu ndambura mapoleka likana kupo? Kumbi mukandiŵiyanga ine nge nkhamsinji kakupusika, nge ndi maji ghenigho ghatondeka?

¹⁹ Chifukwa cho atiti Ambuya: “Asani uwengeko, ndikakuwerezgiyangamo ndipo ukamanga paurongo pangu. Asani ukakambanga cho nchakuzirwa, ndi cho nchawaka cha, ukaŵanga uli ndi mlomo wangu! Ŵakawerenga kwaku iwe, kweni iwe kuti ukawerenga kwaku iwo cha.

²⁰ Ndipo kwaku yaŵa ŵanthu ndikakulimbiskanga nge ndi linga la mkuŵa; ŵakarwananga nawe, kweni kuti ŵakakupundanga cha, pakuti ine nde nawe pamoza, kukutaska ndi kukupozomoska, atiti Ambuya.

²¹ Ndikakupozomoskanga ku janja la ŵaheni ndi kukuwombo mu janja la wankhaza yo.”