Yeremiya 13 - Tonga Bible 1986

Ntharika ya lamba la bafuta yikamba ndi kulangika kwawo

¹ Ambuya angundinene kuti, “Ruta ukagule lamba labafuta, ukavware mu chiunu chako; ungalitupika mu maji cha.”

² Viyo ndingugula lamba kwakuyana ndi mazu gha Ambuya ndipo ndinguvwara mu chiunu.

³ Ndipo mazu gha Ambuya ghanguza kwangu kachiŵi kuti,

⁴ “Uto lamba lo ukugula, lole muchiunu mwako, ndipo soka, ruta ku Efrate ukabise mu mphanji ya jarawi.”

⁵ Viyo ndinguruta, ndingwachilibisa pa Efrate, nge ndimo angundilanguliya Ambuya.

⁶ Ndipo pavuli pa mazuŵa ghanandi Ambuya anguti, “Soka, ruta ku Efrate, ukato lamba liya ndingukulanguliya kulibisa kwenikuwa.”

⁷ Viyo ndinguruta ku Efrate, ndingukumba, ndi ndinguto lamba, pa malo penipo ndingulibisa. Ndipo ehe, lamba lo lingunangika, kuti lenga lamampha kuchitiya so kanthu cha.

⁸ Sono mazu gha Ambuya ghanguza kwangu;

⁹ “Viyo atiti Ambuya: Viyo so ndimu ndikanangiyanga kujikuzga kwaku Yuda ndi kujikuzga kukuru kwaku Yerusalemu.

¹⁰ Ŵanthu ŵaheni yaŵa ŵeniwo ŵakana kuvwa mazu ghangu, wo ŵarondo mu unonono wa mtima wawo ndipo watataliya ŵachiuta ŵanyake, ŵakaŵangauli ndi lamba ili, lo kuti ndamampha ku kanthusocha.

¹¹ Pakuti nge ndimo lamba likhore mu chiunu cha munthu, viyo ndimundinguchitiya nyumba yaku Yisraele ndi nyumba yaku Yuda kukhore mwaku ine, atiti Ambuya, alinga kuti ŵaŵe ŵanthu, zina, rumbu ndi unkhankhu kwaku ine; kweni kuti ŵangunkhumba kutegherezga cha.

¹² “Ukambenge nawo mazu yagha, ‘Viyo atiti Ambuya, Chiuta waku Yisraele, “Chiŵiya chose chikazazikanga ndi vinyo.” ’ Ndipo iwo ŵakatinge ‘Kumbi ifwe kuti tiziŵa cha kuti chiŵiya chose chikazazikanga ndi vinyo?’

¹³ Sono iwe wamunena kwaku wo kuti, ‘Viyo atiti Ambuya, Ehe, ndikaŵaloŵereskanga wose ŵakuja mu charu ichi: ŵakaronga wo ŵaja pa chitengo chaku Davidi, ŵazukuru, ŵamchimi ndi wose ŵakuja mu Yerusalemu.

¹⁴ Ndipo ine ndikaŵabwanyaniskanga uyu ku munyake, ŵauskeu ndi ŵana pamoza, atiti Ambuya. Kuti ndikachitanga chitima pamwenga kuŵareka waka nanga nkhuŵa ndi lisungu nako cha, kuti ndireke kuŵananga.’ ”

¹⁵ Avwani ndi tegherezgani; rekani jujikuzga; pakuti Ambuya akamba.

¹⁶ Paskani unkhankhu ku Ambuya Chiuta winu, wenga wandaze ndi mdima, marundi ghinu ghenga ghandaguŵe pa mapiri gha mdima, penipo imwe mupenja ukweru iyo wasanduskiyako mdima, watiusanduska mdima uzitu.

¹⁷ Kweni asani murekenge kutegherezga, mzimu wangu ukatenjenga ku ubende chifukwa cha kujikuzga kwinu; maso ghangu ghakaliyanga ukongwa ndi kumphororoska masozi, pakuti mskambu wa Ambuya wayoreke ku umkoli.

¹⁸ Kamba ku karonga ndi fumukazi nyina: “Jani pa mpando wakujiyuyuwa, pakuti chisoti chinu cha ufumu chatuwako ku mutu winu.”

¹⁹ Mizi yaku Negebu yajarika, palivi yo wangayijura; Yuda yose wayoreke ku umkoli Ku umkoli wakufikapo.

²⁰ “Soskani maso ghinu wonani wo ŵatuwa ku nkhonde. Wepani mskambu wo mungupaskika, mskambu winu wa manyanda?

²¹ Mukakambanganji asani ŵamika kuŵa nge ndi mutu paku imwe ŵeniwo imwe mwaŵeni mungusambizga kuŵa ŵakovwana namwe? Asi kuŵaŵa kukamukukaninga, uli nkhwamunthukazi wakupapa?

²² Ndipo asani mukakambanga mu mitima yinu, ‘Chifukwa chine vyatiziya vinthu ivi?’ Nchifukwa cha ukuru wa utimbanizi winu, viketi vinu vya kungunikiya muchanya, ndipo mutuvwa kupwetekeka kukuru.

²³ Kumbi mu Etiopia wangaziŵa kusintha liŵavu lake, pamwenga nyalubwe maŵanga ghake? Ipo namwe so mungaziŵa kuchita umampha mwa ŵakuziŵiriya kuchita uheni.

²⁴ Ndimumbininiskeninge nge ndi mwere wakuputiskika ndi mphepo kutuwa ku bozwa.

²⁵ Ichi ndichu chigaŵa chinu, phande lo ndakupimiyani imwe, atiti Ambuya, chifukwa mwandiruwa mwakomekezga mu mautesi.

²⁶ Ine ndamweni ndikakungunuliyanga ku maso viketi vinu, ndipo soni zinu ziwonekenge.

²⁷ Ndaghawona maukazuzi ghako, maureŵi ghako ndi kulampha-lampha kwako, uyagha-yagha wako wa ureŵi, pa mapiri ndi mu minda. Soka kwaku iwe, Yerusalemu! Kwakujariya mazuŵa ghalinga po wenga undatozgeke?”