Yeremiya 11 - Tonga Bible 1986

Kuswa phanganu

¹ Mazu gho ghanguza kwaku Yeremiya kutuwa ku Ambuya:

² “Vwani mazu gha phanganu ili, murongoro ku ŵanthu ŵaku Yuda ndi ŵakuja mu Yerusalemu.

³ Ukatinge kwaku wo, Viyo atiti Ambuya, Chiuta waku Yisraele; Watembeke munthu mweniyo wareka kuphwere mazu gha phanganu ili,

⁴ lenilo ndingulanguliya auskemwe pa nyengo yo ndinguŵatuzgiya mu charu cha Egipiti, kutuwa mu ng'anjo ya chisulo, ndinguti, Tegherezgani ku mazu ghangu, ndipo chitani chose cho nditumulanguliyani. Po ndipo mukaŵanga ŵanthu ŵangu, ndipo ine ndikaŵanga Chiuta winu,

⁵ mwakuti ndifiske rapu lo ndingurapiya ku auskemwe, kuŵapaska charu chakutaŵala mukaka ndi uchi, nge ndimo kuliri msana wale.” Sono ndinguŵamuka, “Viyo ndimu kuŵiye Ambuya.”

⁶ Ndipo Ambuya anguti, “Memeza mazu yagha ghose mu mizi yaku Yuda, ndi mu miseu ya Yerusalemu: Avwani mazu gha phanganu ili ndipo mughachitenge.

⁷ Pakuti ndinguŵachenjezga auskemwe, pa nyengo yo ndinguŵatuzgiya mu Egipiti; kuŵachenjezga kaŵi, inya mpaka zuŵa lino, kuti, Vwiyaninga mazu ghangu.

⁸ Ndipuuli kuti ŵanguvwiya pamwenga kutegherezga cha; kweni yose wangwenda mu unonono wa mtima wake uheni. Chifukwa cho ndingutole paku wo mazu ghose gha phanganu ili, lenilo ndinguŵalanguliya kulichita, kweni ŵengavi kulichita.”

⁹ Ambuya anguwerezgapo kukamba nane, “Ŵanthu ŵaku Yuda ndi ŵakuja mu Yerusalemu ŵagaruka.

¹⁰ Ŵawere vuli ku mautimbanizi gha ambuyawo, ŵeniwo ŵangukana kuvwa mazu ghangu; ŵandondoloska ŵachiuta ŵanyake kuŵatataliya; ŵaYisraele ndi ŵaYuda ŵaswa phanganu langu lenilo ndinguchita ndi auskeu.

¹¹ Chifukwa cho atiti Ambuya, Ehe, ine nditole uheni paku iwo, weniwo kuti angaziŵa kuwuthaŵa cha; chingana ŵangandiliriya, kuti ndikaŵategherezganga cha.

¹² Sono mizi yaku Yuda ndi ŵakuja mu Yerusalemu ŵakarutanga kwachiliriya ŵachiuta kwaku wo ŵangoche sembe kweni kuti ŵaziŵa kuŵataska cha mu nyengo ya suzgu yawo.

¹³ Pakuti ŵachiuta ŵinu ŵandana nge ndi mizi yinu, Yuda we; ndipo viguŵa vya sembe vyo mwazenge ku chilengesku vyandana nge ndi miseu ya Yerusalemu, viguŵa vyakochiyapo sembe kwaku Bala.

¹⁴ “Chifukwa cho reka kuŵarombe ŵanthu yaŵa, kuliya pamwenga kuromba chifukwa chawo, chifukwa kuti ndikategherezganga cha ŵachidana kwaku ine mu nyengo ya suzgu yawo.

¹⁵ Nkhwanjiwa wangu wendi mazaza uli mu nyumba yango, penipo iyo wachita nchitu zachilengesku? Kumbi marapu ndi nyama ya mpasku vingaziŵa kutuzgapo soka pinu? Kumbi mungaziŵa kutumbwa penipo?

¹⁶ Kale Ambuya angumudanani imwe, ‘Muti uŵisi wa Olive, wamampha wa vipasi vyamampha;’ kweni ndi chibumuzi cha lirondo likuru wakasonkhangako moto kwaku wo, ndipo mphanda zake zikapiriyanga.

¹⁷ Ambuya ŵa maŵanja, wo ŵangukupandani, ŵalangula kuti muwone chiheni, chifukwa cha uheni wo ŵaYisraele ndi ŵaYuda ŵachita, kundisosomole ku ukari pakoche sembe kwaku Bala.”

¹⁸ Ambuya angundiziŵiska ine, ndipo ndinguziŵa; ndipo mungundirongo ine nchitu zawo ziheni.

¹⁹ Kweni ndenga nge ndi mberere yakuzika yakurongozgeke kukubayika. Ndengavi kuziŵa kuti chenga paku ine ŵangupangirana machitidu gha chiŵembo pa mutu wangu, ŵakuti, “Tiyeni tiphwanye chimuti ndi chipasi chake, tiyeni timudumuweko ku charu cha ŵamoyo, mwakuti zina lake lireke kukumbukika so cha.”

²⁰ Kweni, Ambuya mwe, ŵa maŵanja, imwe muteruzga mu urunji; imwe mutesa mtima ndi mzimu; ndiwoneskeni thayu linu paku iwo, pakuti ndapereka kwinu mlando wangu.

²¹ Chifukwa cho atiti Ambuya gha pa ŵanthu ŵaku Anatoti, ŵeniwo ŵapenja kukubayani, ndi kuti, “Ungachimanga mu zina la Ambuya cha, vinu tingakubaya.”

²² Chifukwa cho atiti Ambuya ŵa maŵanja: “Ehe, ndikaŵalanganga: ŵanyamata ŵakafwanga ndi lipanga: ŵana ŵawo ŵanthurumi ndi ŵanthukazi ŵakafwanga ndi nja,

²³ ndipo palivi yumoza waku wo wakasiyikanga. Pakuti ndikatolenga chiheni pa ŵanthu ŵaku Anatoti, chirimika cha kulangika kwawo.”