Yeremiya 1 - Tonga Bible 1986

Kudanika kwaku Yeremiya kuti waŵe mchimi

¹ Mazu ghaku Yeremiya mwana waku Hilikiya, yumoza wa ŵazukuru wo ŵenga mu Anatoti mu charu chaku Benjamini.

² Mazu gha Ambuya ghanguza kwaku iyo mu mazuŵa ghaku Josiya mwana waku Amoni karonga waku Yuda, mu chirimika cha chumi ndi vitatu cha muwusu wake.

³ Ghangumuziya so mu mazuŵa ghaku Yehoyakimu mwana waku Josiya waku Yuda; ndipo mpaka ku umari wa chirimika cha chumi ndi chimoza cha muwusu waku Zedekiya, mpaka po Yerusalemu wangukoreka umkoli mu mwezi wa chinkhonde.

⁴ Sono mazu gha Ambuya ghanguza kwaku ine kuti,

⁵ “Ndenga ndindakupange mu chibali ndingukuziŵa kale, ndipo wenga undapapike ndingukupatuwa kale; ndingukusankha kuŵa mchimi ku mitundu.”

⁶ Sono ine ndinguti, “A, Ambuya Chiuta! Ehe, kuti ndiziŵa cha kurongoro, pakuti nde mwanamana.”

⁷ Kweni Ambuya anguti kwaku ine, “Reka kukamba kuti, ‘Nde mwanamana’; pakuti kwaku wose wo ndikutumengeko ukarutanga, ndipo chose cho ndilanguliyenge iwe ukachikambanga.

⁸ Ungopanga iwo cha, pakuti nde nawe kukutaska iwe,” atiti Ambuya.

⁹ Sono Ambuya angutambaruwa janja lawo ndi angukwaska mlomo wangu, ndipo anguti kwaku ine, “Ehe ndaŵika mazu ghangu mu mlomo wako.

¹⁰ Wona ndakumika iwe msana wale pa mitundu ndi pa maufumu, kupontho ndi kuswiya pasi, kubwanganduwa ndi kuthereska, kuzenga ndi kupanda.”

¹¹ Ndipo mazu gha Ambuya ghanguza kwangu ghakuti, “Yeremiya, uwonanji?” Ine ndinguti, “Ndiwona nthonga ya alimondi.”

¹² Sono Ambuya anguti kwaku ine, “Wawona umampha pakuti ine ndilindizga mazu ghangu kughachita!”

¹³ Mazu gha Ambuya ghanguza kwaku ine nyengo ya chiŵi ghakuti, “Uwonanji?” Ndipo ine ndinguti, “Ndiwona mumphika wakugaduka, warata msana ku nkhonde.”

¹⁴ Sono Ambuya anguti kwaku ine, “Kutuliya ku nkhonde chiheni chikaziyanga paku wose ŵakuja mu charu.

¹⁵ Pakuti, ehe, ndikadananga makhamu ghose gha maufumu ghaku nkhonde, atiti Ambuya; ŵakazanga, ndipo we yose wazamuŵika chitengo chake pakuserere pa malikomo gha Yerusalemu kunyekezga ku malinga ghake kwakuzunguliya kose ndi pa mizi yose yaku Yuda.

¹⁶ Ndipo ndikakambanga vyeruzgu vyango pako wo, pa mauheni ghawo ghose pakundireka ine; ŵawoche vya chema ŵa chiuta ŵanyake ndipo ŵasopa nchitu za manja gha ŵeneko.

¹⁷ Kweni iwe ujichinyiye mu chiunu chako; soka, ukaŵanene che chose cho ndikulanguliyenge iwe. Ungawopanga iwo cha vinu ndingakuwopeska paurongo pawo.

¹⁸ Ndipo ehe, ine msana wale ndikuchita iwe kuŵa nge ndi muzi wa malinga, mzati wa chisulu, ndi malinga gha mkuŵa kulimbana ndi charu chose ndi ŵakaronga ŵaku Yuda, ndi mafumu ghake, ŵazukuru ŵake, ndi ŵanthu ŵamu charu cho.

¹⁹ Ŵakarwananga nawe kweni kuti ŵakakupundanga cha pakuti ine nde nawe pamoza kukupozomoska,” atiti Ambuya.