Yakobe 4 - Tonga Bible 1986

Ubwezi ndi charu

¹ Nchine cho chichitiska mahomwa ndi nchine cho chichitiska mapindanu mukati mwinu? Asi nga kweniko, ku malikondwa ghinu ghakurwiya mu viŵaru vinu?

² Mukhumbira, ndipo muuravi: mubaya, ndipo muŵiniwa, ndi kuti muziŵa kufikapo cha: mupindana ndipo mupota homwa; muuravi, chifukwa mureka kupempha.

³ Mupempha, ndipo kuti muronde cha, chifukwa kuti mupempha uheni, alinga kuti muvimariye pa malikondwa ghinu.

⁴ Mwaŵareŵi, asi muziŵa kuti kukondana ndi charu mbumawongu paku Chiuta? Viyo mweniyo yose wakhumba kuŵa wachikondana ndi charu wajisanduska wamawongu waku Chiuta.

⁵ Pamwenga kumbi murunguruka kuti lembo lo likamba waka, “Wanweke kwasanji mzimu wo wajariska mwidu?”

⁶ Kweni wapaska wezi ukuruku: viyo ŵatiti, “Chiuta wamikirana ndi wakujana, kweni wapaska wezi ku ŵakujiyuyuwa.”

⁷ Viyo jithereskiyeni kwaku Chiuta: kweni mikiranani ndi diabolo yo, ndipo wathaŵenge imwe.

⁸ Ndereni kufupi kwaku Chiuta, ndipo wanderenge kufupi kwinu. Photoni manja, mwaŵalakwi; ndipo tozgani mitima, mwaŵamitimapaŵi.

⁹ Suzgikani, ndi tenjeni, ndi liyani: kadara kinu kazgoke chitenje, ndi chimwemwe chinu ku chitima.

¹⁰ Mujichefye paurongo pa Ambuya, ndipo wamkuzgeninge.

Chenjezgu pakweruzga Mkristu munyako

¹¹ Munganenana cha, mwa ŵabali. Mweniyo wasuza mbali, pamwenga wateruzga mbali wake, wasuza dangu, ndi wateruzga dangu: kweni asani uteruzga dangu, kuti we mchita wa dangu cha, kweni mweruzgi.

¹² Walipo Yumoza yo ngwakumika dangu ndi wakweruzga, yo ngwanthazi kutaska ndi kwananga: kweni ndiwe yani iwe, uteruzga mwanase wako.

Chenjezgu pakujitukumuwa

¹³ Ekwe, aimwe, mwaŵakukamba, “Le pamwenga mawa tikenge ku muzi wakuti e, ndipo titandarenge kweniko chaka chimoza, tamgula ndi kusaska, ndi kwanduwa”;

¹⁴ penipo napo mulive kuchiziŵiska chamawa cha. Pakuti we uli umoyo winu? Mwe nyankhuŵinda, na, yo wawoneka kanyengo kamanavi, ndipo pavuli wazirimitiya.

¹⁵ Ukongwa mutenere kukamba, “Asani Ambuya ŵakhumbenge ndipo tikaŵanga ŵamoyo, ndipo tikachitanga chenichi pamwenga chiya.”

¹⁶ Kweni sono mutumbwiya mu matukutuku ghinu: chi tumbwa chose chaviyo nchiheni.

¹⁷ Viyo kwaku yo waziŵa kuchita keneko, ndipo ngwambura kukachita, kwaku mweniyo nchilakwa.