Yakobe 3 - Tonga Bible 1986

Lilime

¹ Mungaŵanga ŵasambizgi ŵanandi, mwa ŵabali ŵangu, pakuziŵa kuti tamronde chisusa chikuru. Chifukwa tose tiguŵa panandi.

² Asani munthu wareka kuguŵa mu mazu, ndiyo munthu wakufiskika, wanthazi kulitintha liŵavu lizirima nalo.

³ Kweni asani tiŵika vitinthiru mu milomu ya ŵakavalo, alinga kuti ŵativwenge: tichipepetuwa liŵavu lawo lose.

⁴ Awonani, ngaraŵa nazo, chingana zikuru, ndipo zigumizgika ndi mphepu zikali, zipetulika ndi sigiru yimanavi, kweniko kose wakupetuwa watizipeturiya.

⁵ Viyo lilime nalo nkhachiŵaru kamanavi ndipo lijithamiya ukongwa. Awonani moto umanaviweni nawo utocha lisuwa likuru!

⁶ Ndipo lilime ndi moto; lilime ncharu chambura urunji mukati mu viŵaru vidu, lakukazuzga liwavu lose, lakuŵika pa moto gulinga wa kaŵiru kidu, ndipo lakukozgeka moto ndi gehena.

⁷ Chifukwa mtundu we wose wa vinyama ndi so wa viyuni, wa vyakukwaŵa ndi so wa vyamu nyanja, uziŵirizgika, ndipo waziŵirizgika ndi mtundu waŵanthu.

⁸ Kweni palive munthu ngwanthazi kuziŵirizga lilimo lo; nchiheni chambura matinthika, chakuzara ulembi wakubaya.

⁹ Ndi lilime lo titumbika Ambuya ndi Dada; ndipo ndi lenilo pe titemba ŵanthu, wo mbakulengeka mu chikozgu chaku Chiuta:

¹⁰ mu mlomo weniwo pe mutuliya thumbiku ndi thembu! Mwa ŵabali ŵangu, vyenivi kuti vitenere kuŵa viyo cha.

¹¹ Kumbi chisima chibwibwituskiya ku mphowozi yimoza pe maji ghakunowa ndi ghakuŵaŵa?

¹² Kumbi mkuyu uziŵa kupasa maolive, mwa ŵabali ŵangu, pamwenga mphereska zinkhuyu? Chingana ndi maji ghamche ghalive kuziŵa kupaska ghakusamuka.

Zeru zakutuwa kuchanya

¹³ Njani wazeru ndi wakuwamo mwakuimwe? Warongole ndi kajaridu kake kakutowa milimu yake mu upovu wa zeru.

¹⁴ Kweni asani mwe nayo sanji yikaru ndi mphindanu mu mtima winu, mungatumbwiyanga ndi mungatetayanga pa uneneska wo cha.

¹⁵ Zeru yeniyo kuti njakusikiya kutuwa kuchanya cha, kweni njapasi, yaviŵaru, ya udemone.

¹⁶ Chifukwa kose kweniko kwe sanji ndi mphindanu, kweniko kwe chimtimbaheka ndi kachitidu kose kaheni.

¹⁷ Kweni zeru yo njakutuwa kuchanya njikhovu danga, pavuli njachimangu, yakoroŵa yakupemberezgeka wenguwengu, yakuzara lisungu ndi vipasi vyamampha, yambura gangang'u, yizira ufyali.

¹⁸ Ndipo chipasi cha urunji chimijikiya mu chimangu kwaku ŵeniwo mbakutata chimangu.