Ŵeruzgi 4 - Tonga Bible 1986

Debora ndi Baraki

¹ Wati wafwa Ehudi ŵaYisraele ŵanguwerezgapo kuchita cho chenga chiheni mu maso gha Ambuya.

² Ndipo Ambuya anguŵaguliska mu janja laku Yabini karonga wa ŵaKanani, yo wawusanga mu Hazoro; wakurongozga liŵanja lake la nkhondo, wenga Sisera, mweniyo wajanga mu Harosheti-hagoimi.

³ Sono ŵaYisraele ŵangubongole ku Ambuya kupempha chovyo; pakuti Sisera wenga ndi magareta gha chisulo machumi pe chumi ghankhonde ndi ghanayi (900) wanguyuzga ŵaYisraele ndi nkhaza kwa virimika machumi ghaŵi.

⁴ Sono Debora mchimikazi, muwoli waku Lapidoti, weruzganga Yisraele pa nyengo yiya.

⁵ Wanguziŵiriya kuja msina mwa mugwalangwa waku Debora pakati pa Rama ndi Betele mu charu cha mitunthu chaku Efraimu; ndipo ŵaYisraele ŵazanga kwaku iyo kuzacheruzgika.

⁶ Wangutuma kwachidana Baraki mwana waku Abinamu waku Kedeshi mu Naftali, wanguti kwaku iyo, Ambuya Chiuta waku Yisraele, watikulanguliya, “Ruta, kawunjike ŵanthu ŵako pa phiri Taboro, uruti ndi ŵanthu vikwi chumi (10,000) kutuwa ku fuku laku Naftali ndi fuku laku Zebuluni.

⁷ Ndipo ndikatuzganga Sisera, wakurongozga mura wa nkhondo yaku Yabini, kwachikumana nawe pa msinji Kishoni ndi magareta ghake ndi maŵanja ghake gha nkhondo; ndipo ndikamuperekanga mu janja lako.”

⁸ Baraki wanguti kwaku iyo, “Asani ukarutanga nane, ndikarutanga, kweni asani kuti ukarutanga nane cha, nane kuti ndikarutanga cha.”

⁹ Ndipo iyo wanguti, “Kwakuneneska ndikarutanga nawe, kweni ulendo uwu kuti ukakutoriyanga unkhankhu iwe cha, chifukwa Ambuya akaperekanga Sisera mu janja la munthukazi.” Sono Debora wangusoka, wanguruta ndi Baraki ku Kedeshi.

¹⁰ Ndipo Baraki wangudana Zebuluni ndi Naftali kuza ku Kedeshi, ŵanthu vikwi chumi (10,000) ŵangukweriyako pasi pa urongozgi wake, Debora nayo wangukweriyako.

¹¹ Sono Heberi mu Keni wangujipatuwako ku ŵaKeni, mphapu yaku Hobabu msibweni waku Mosese, wangukhoma hema lake kutali ku chimiti cha mkundi mu Zananimu yo we pafupi ndi Kedeshi.

Jaelu wabaya Sisera

¹² Sisera wanguti wavwa kuti Baraki mwana waku abinoamu wakwere ku phiri Taboro,

¹³ wangudana magareta ghake ghose, magareta machumi pe chumi ghankhonde ndi ghanayi (900) gha chisulo, ndi ŵanthu wose wo ŵenga nayo pamoza, kutuwa ku Haroshetihagoimu mpaka ku msinji Kishoni.

¹⁴ Ndipo Debora wanguti kwaku Baraki, “Kwera! Pakuti ili ndi zuŵa lo Ambuya apereka Sisera mu janjo lako. Asi Ambuya atikudanjiriyani?” Viyo Baraki wangusika ku phiri Taboro pamoza ndi ŵanthu vikwi chumi (10,000) ŵakumulondo.

¹⁵ Ndipo Ambuya angumbininiska Sisera ndi magareta ghake ndi liŵanja lose la nkhondo paurongo paku Baraki ndi lipanga; Sisera wangusika mu gareta ndipo wanguthaŵa cha kwenda pasi.

¹⁶ Baraki wangudondoloska magareta ndi liŵanja la nkhondo ku Haroshetihagoimu ndipo liŵanja lankhondo lingumara ndi lipanga; kuti wangujapo cha munthu nanga njumoza.

¹⁷ Kweni Sisera wanguthaŵa kwenda pasi kuya ku hema laku Jaelu, muwoli waku Heberi muKeni; pakuti penga chimangu pakati paku Yabini karonga waku Hazoro ndi nyumba yaku Heberi muKeni.

¹⁸ Jaelu wangutuwa kwachikumana ndi Sisera, ndipo wangunena nayo, “Patuka, mbuyangu, patukiya kuno, ungopanga cha.” Viyo wangupatukiya kwaku iyo wangusere mu hema, ndipo wangumuvwinkha chirundu.

¹⁹ Sisera wanguti ku munthukazi, “Chondi ndipaskeko tumanavi twakumwa; pakuti ndendi nyota ukongwa.” Jaelu wangujura thumba mo mwenga mkaka wangumpaska kumwa ndi wangumuvwinkha so.

²⁰ Ndipo wanguti ku munthukazi, “Umi pa khomo la hema, asani watuzapo munthu kukufumba, ‘Kumbi pe munthu pano?’ Iwe unene kuti, ‘Palivi.’ ”

²¹ Kweni Jaelu muwoli waku Heberi wanguto chichiri chakukhome hema ndi wanguto nyundo mu janja lake, wanguruta kwambura muswayu ndi wangukhome chichiri cho mugutu laku Sisera, chinguporota mpaka pasi, po wenga mutulo tuzitu pakuti wanguvuka. Viyo wangufwa.

²² Ndipo ehe, po Baraki wandondoloskanga Sisera, Jaelu wangutuwa kwachikumana nayo, wanguti kwaku iyo, “Zanga ndikurongo munthu yo upenja.” Viyo wanguruta ndi kusere kwaku iyo mu hema lake; ndipo muwa mungula Sisera wakufwa ndi chichiri cha hema mu gutu lake.

²³ Viyo pa zuŵa liya Chiuta wanguthereska Yabini karonga wa Kanani paurongo pa ŵaYisraele.

²⁴ Ndipo janja la ŵaYisraele lingunyekezga ndi nthazi kwakukiyakiya paku Yabini karonga wa Kanani, mpaka wangubwanganduwa Yabini karonga wa Kanani.