Ŵeruzgi 3 - Tonga Bible 1986

Yisraele wateseka ndi mitundu yakujamo

¹ Iyi ndi mitundu yo Ambuya angureke Yisraele kuti wayeseke nayo, wose ŵaYisraele wo ŵengavi kuziŵapo kurwa nkhondo mu Kanani;

² ichi chenga chakuti mphanyi migpnezi ya ŵaYisraele yinguziŵa nkhondo, kuti kokuli angasambizga wo ŵengavi kuyiziŵa nkhondo kale.

³ Mitundu yose iyi: mafumu ghankhonde gha ŵaFilisti, ndi ŵaKanani wose, ŵaSidoni, ndi ŵaHivi wo ŵajanga pa phiri la Lebanoni, kwamba ku phiri Bala-Hermoni kwachifika pakuserere mu Hamati.

⁴ Yenga yakwesiyapo Yisraele, kuti kuziŵikwe vinu Yisraele wangavwiya marangu gha Ambuya, ghenigho angulanguliya auskeu mwaku Mosese.

⁵ Viyo ŵaYisraele ŵanguja mukati mu ŵaKanani, ŵaHiti, Amori, ŵaPerezi, ŵaHivi, ndi ŵaYebusi;

⁶ ndipo ŵanguyitole ŵana ŵawo ŵanthukazi kuŵa ŵawoli, ndipo ŵana ŵawo ŵanthukazi ŵangupereka ku ŵana ŵawo ŵanthurumi; ndipo ŵangutataliya ŵachiuta ŵawo.

Otniele wataska ŵaYisraele ku ŵaKanani

⁷ Ndipo ŵaYisraele ŵanguchita uheni mu maso gha Ambuya, ŵanguruwa Ambuya Chiuta wawo, ndi kutataliya ŵaBala ndi Ashera.

⁸ Chifukwa cho ukari wa Ambuya ungukole paku Yisraele, ndipo anguŵaguliska mu janja laku Kushani-rishataimu karonga waku Mesopotamia, ndipo ŵaYisraele ŵangutataliya Kushani-rishataimu virimika vinkhonde ndi vitatu.

⁹ Kweni penipo ŵaYisraele ŵanguliliya ku Ambuya, Ambuya anguŵasoske muwombozi ŵaYisraele mweniyo wanguŵawombo, Otniele mwana waku Kenazi, muhurwa waku Kalebu.

¹⁰ Mzimu wa Ambuya unguza paku iyo, ndipo wangweruzga Yisraele; wanguya ku nkhondo, ndipo Ambuya angupereka Kushani-rishataimu karonga waku Mesopotamia mu janja lake, ndipo janja lake lingupunda paku Kushani-rishataimu.

¹¹ Viyo charu chingupumuwa virimika machumi ghanayi. Pavuli Otniele mwana waku Kenazi wangufwa.

Ehudi waŵataska kwaku Egloni

¹² Ndipo ŵaYisraele ŵanguwerezgapo kuchita uheni mu maso gha Ambuya, ndipo Ambuya angukhozga Egloni karonga wa Moabu kumikana ndi Yisraele, chifukwa ŵanguchita uheni mu maso gha Ambuya.

¹³ Wanguwunjika ŵa Amoni ndi Amaleki; ndipo wanguruta ndi wanguthereska Yisraele; wangulonda msumba wa ŵakanchindwe.

¹⁴ Ndipo ŵaYisraele ŵangutataliya Egloni karonga wa Moabu virimika chumi pachanya vinkhonde ndi vitatu.

¹⁵ Kweni po ŵaYisraele ŵangubongole ku Ambuya, Ambuya anguŵasoske muwombozi, Ehudi, mwana waku Gera mwina Benjamini, munthu wa maze. ŴaYisraele ŵangutuma mithulu mwaku iyo kwaku Egloni karonga wa Moabu.

¹⁶ Ehudi wangujipangiya lipanga la wuyi kosekose, utali wake lenga mkono umoza, ndipo wangulikoloŵeka pa chigha chake cha ku marghe mukati mu vivwalo vyake.

¹⁷ Ndipo wangupereka mithulu kwaku Egloni karonga waku Moabu. Egloni wenga munthu wakututuŵa ukongwa.

¹⁸ Ndipo Ehudi wanguti wamara kupereka mithulu, ŵanthu wo ŵangupinga mithulu wanguŵatuma kuti ŵarutenge.

¹⁹ Kweni iyo wanguwere vuli pa mya yakusema pafupi ndi Gilgala, wanguti, “Ndendi uthenga winu waku ubendi karonga mwe.” Ndipo wangulangula, “Chetamani.” Sono wose ŵateŵeti ŵake ŵangutuwamo mo ŵenga.

²⁰ Ehudi wanguza kwaku iyo, po wangujamo yija mu chipinda chake cha bagha chakuzizira. Ehudi wanguti, “Ndendi uthenga wako wakutuliya kwaku Chiuta.” Ndipo wangusoke pa mpando wake.

²¹ Ndipo Ehudi wangufika ndi janja lake la maze, wangusoro lipanga ku chigha chake chaku marghe ndi wangugwaza mu rufu lake;

²² ndipo chigumbu nacho chingusere kulondo chipapa, ndipo mafuta ghanguburumutizga chipapa, pakuti wengavi kutuzga lipanga lo mu rufu; sono busu lingutuwa.

²³ Ehudi wangutuwa ndi kusere mu kachipinda kakusereriyamo, wangujara makhomo gha chipinda chaku bagha wachituwa, wangughapilingizga.

²⁴ Iyo wanguti waruta, ŵateŵeti wanguza; ndipo ŵanguti ŵawona kuti makhomo gha chipinda cha ku bagha ghenga ghakupiringizga ŵangughanaghana kuti, “Watijovya mu kachipinda kamana kamu chipinda chakuzizira chikuru.”

²⁵ Ŵangulindizga mpaka po ŵanguvuka, kweni po ŵengavi mbwenu kujura makhomo gha chipinda chaku bagha, ŵanguto kiŵangughajura; ndipo mwenimuwa mbuyawu wangula wakufwa.

²⁶ Ehudi wanguthaŵa po iwo ŵenga ŵeche kuzuulika ndipo wangujumpha mya yiya yakusema, wanguthaŵiya ku Seira.

²⁷ Wanguti wafika wangumba mbata mu charu cha mitunthu chaku Efraimu; ndipo ŵaYisraele ŵangusikiya nayo pamoza kutuwa ku charu chamithunthu, ndipo ŵenga nayo nge ndi mutu wawo.

²⁸ Ndipo wangunena ndi ŵanthu wo, “Rondoni ine, pakuti Ambuya apereka ŵakupindikana ŵinu ŵaMoabu mu janja linu.” Viyo ŵangusika ŵangumurondo, ndipo wanguto viphali vya Yordane kumikana ndi ŵaMoabu, kuti ŵanguzomerezga munthu nanga njumoza cha kwambukapo.

²⁹ Ndipo ŵangubaya pa nyengo yiya ankhumba ŵanthu vikwi chumi (10,000) vya ŵaMoabu, wose ŵanthazi pe, ŵa maliŵavu ghamampha; pengavi munthu yo wangupozomoka.

³⁰ Viyo Moabu wangupundika zuŵa liya ndi janja laku Yisraele. Ndipo charu chingupumuwa kwavirimika machumi ghankhonde ndi ghatatu (80).

³¹ Pauvli paku iyo wenga Shamgara mwana waku Anata, yo wangubaya ŵanthu machumi pe chumi ghankhonde ndi limoza (600) gha ŵaFilisti ndi mujokong'o wa ng'ombe. Iyo nayo wangupozomoska Yisraele.