Ŵeruzgi 20 - Tonga Bible 1986

Benjamini warwana ndi Yisraele

¹ Sono ŵaYisraele ŵangutuwa, kwamba ku Dani kufika ku Beresheba, ndi charu chaku Gileada, ndipo mpingu wo unguwungana uli ndi munthu yumoza ku Ambuya pa Mizipa.

² Ndipo mafumu gha ŵanthu wose, gha mafuku ghose ghaku Yisraele, ŵangujirongo ŵija mu unganu wa ŵanthu ŵaku Chiuta vikwi machumi pe chumi, ghanayi (400,000) ŵakwenda pasi ŵakuwewepuwa lipanga.

³ (Sono ŵina Benjamini ŵanguvwa kuti ŵaYisraele ŵaruta ku Mizipa.) Ndipo ŵaYisraele ŵanguti, “Tinene, uheni uwu unguza uli?”

⁴ Ndipo muLevi mrumi wa munthukazi yuwa wangubayika wanguti, “Ine ndinguza ku Gibea wa ŵina Benjamini, pamoza ndi mbiligha yangu, kuti ndigone pakuti kwenga usiku.

⁵ Ndipo ŵanthu ŵamu Gibea ŵangundiyukiya, ndi ŵanguzinga nyumba mwenimo ndenga; khumbu lawo lenga la kundibaya ine, wanguchita chikwala mbiligha yangu, ndipo wakufwa.

⁶ Ndipo ndinguto mbiligha yangu ndinguyidumuwa mathuŵi mathuŵi, ndingughatuma ku charu chose cha chihara chaku Yisraele; pakuti ŵakuchita ukazuzi ndi uvumbwa mu Yisraele.

⁷ Ehe, imwe mose mwa ŵaYisraele, perekani fundu yinu ndi suskanani pamoza paku ichi.”

⁸ Ndipo ŵanthu wose ŵangusoka nge ndi munthu yumoza, ŵanguti, “Palivi yumoza waku ifwe yo wakawerenga ku hema lake pamwenga yo wakawerenga ku nyumba yake.

⁹ Kweni sono cho tikachitiyanga Gibea ndi ichi; tikweriyengeko ndi mphenduzga,

¹⁰ ndipo tikatonga ŵanthu chumi mu machumi pe chumi, mu mitundu yose yaku Yisraele, ndi machumi pe chumi mu chikwi chimoza ndi chikwi chimoza mu vikwi chumi, kuza ndi vyakurgha vya ŵanthu, mwakuti asani ŵaza ŵatayiye thayu Gibea waku Benjamini, chifukwa cha uheni ndi uvumbwa wose wo wachita mu Yisraele.”

¹¹ Viyo ŵaYisraele ŵanguwungana kwachimikana ndi msumba uwa, ŵakulungana pamoza nge ndi munthu yumoza.

¹² Ndipo mafuku ghaku Yisraele ghangutuma ŵanthu kufuku lose laku Benjamini, ŵanguti, “Mbuheni uli uwu wo wachitika mukati mwinu?

¹³ Chifukwa ichi perekani ŵanthu wo, ŵauliuli ŵamu Gibea, alinga tiŵabaye, ndi kutuzgamo uheni mwaku Yisraele.” Kweni ŵaBenjamini kuti ŵanguphwereko cha ku mazu gha ŵabali ŵawo ŵaYisraele.

¹⁴ Sono ŵaBenjamini ŵanguza pamoza ku Gibea kutuwa mu misumba, kwachirwana nkhondo ndi ŵaYisraele.

¹⁵ Ndipo ŵaBenjamini ŵanguŵerenga kutuwa mu misumba yawo pa zuŵa leniliya ŵanthu vikwi machumi ghaŵi ndi vinkhonde ndi chimoza (26,000) ŵakuko lipanga, pade pa ŵakuja mu Gibea, wo ŵanguŵerengeka ŵanthu ŵakusankhika pe machumi pe chumi ghankhonde ndi ghaŵi (700).

¹⁶ Mukati mwaku yaŵa wose mwenga machumi pe chumi ghankhonde ndi ghaŵi (700) ŵanthu ŵakusankhika wo ŵenga ndi maze; we yose waku yaŵa wanguziŵa kupong'a ndi kachingwe mwa pa sisi kwambura kumbwita.

¹⁷ Ndipo ŵaYisraele, ŵapade kwaku Benjamini, ŵanguŵerenga ŵanthu vikwi machumi pe chumi ghanayi (400,000) ŵakusolo lipanga; wose yaŵa ŵenga ŵakuziŵa nkhondo.

¹⁸ ŴaYisraele ŵangusoka ndi ŵanguruta ku Betele, ŵangufumbiriya kwaku Chiuta, “Ndiyani waku ifwe yo wadangenge kuruta ku nkhondo kwachirwana ndi ŵaBenjamini?” Ndipo Ambuya anguti, “Yuda ndiyo wadangenge kukweriyako.”

¹⁹ Sono ŵaYisraele ŵangusoka ndi mlenji, ŵangugoŵa kumikana ndi Gibea.

²⁰ ŴaYisraele ŵanguruta ku nkhondo kumikana ndi Benjamini; ŵangundanda mu mzere wa nkhondo kumikana nawo pa Gibea.

²¹ ŴaBenjamini ŵangutuwa mu Gibea, ndipo ŵangubayiya pasi zuŵa liya ŵanthu vikwi machumi ghaŵi ndi viŵi (22,000) vya ŵaYisraele.

²² Kweni ŵaYisraele ŵangulimba mtima, ndipo ŵanguwerezgapo kuchita so mzere wa nkhondo mu malo ghenigha ŵangumamo pa zuŵa lakudanga.

²³ Ndipo ŵaYisraele ŵangukwera ndi ŵanguliliya paurongo pa Ambuya mpaka ku mazulo, ŵangufumbiriya ku Ambuya, “Kumbi tikanderenga so kufupi kwachirwana nkhondo ndi ŵebali ŵidu ŵaBenjamini?” Ambuya anguti, “Rutani karwaneni nawo.”

²⁴ Viyo ŵaYisraele ŵangundere kufupi kumikana ndi ŵina Benjamini zuŵa la chiŵi.

²⁵ Benjamini nayo ŵanguruta so kwachirwana nawo ndipo ŵangubayiya pasi, vikwi chumi pachanya vinkhonde ndi vitatu (18,000) vya ŵanthu ŵaku Yisraele; yaŵa wose ŵenga ŵanthu ŵakuziŵa kurwa.

²⁶ Sono ŵaYisraele wose, liŵanja lose la nkhondo, ŵangukwera ŵanguza ku Betele, ŵangutenje, ŵanguja pasi paurongo pa Ambuya, ŵangufunga kurgha zuŵa lose liya mpaka mazulo, ŵangupaska mipasku yakocha ndi mipasku ya chimangu paurongo pa Ambuya.

²⁷ Ndipo ŵaYisraele ŵangufumbiriya ku Ambuya (pakuti bokosi la phanganu laku Chiuta lenga kwenikuwa mu mazuŵa ghenigho,

²⁸ Finehasi mwana waku Eleazara mwana waku Aroni wanguteŵete paurongo paku lo mu mazuŵa ghenigha) ŵanguti, “Kumbi tiwerezgengepo so kuruta ku nkhondo kumikana ndi ŵabali ŵidu ŵaBenjamini, pamwenga tireke?” Ndipo Ambuya anguti, “Kweriyaniko; pakuti la mawa ndikaŵaperekanga mu janja linu.”

²⁹ Viyo ŵaYisraele ŵangubisa ŵanthu ŵanyake kuzungulizga Gibea.

³⁰ Ndipo ŵanyake ŵangukwera kwachimikana ndi ŵaBenjamini pa zuŵa la chitatu, ndipo ŵangujindandika kumikana ndi Gibea, nge mpha nyengo zakudanga.

³¹ Ndipo ŵaBenjamini ŵangurwana ndi ŵanthu wo, ndipo ŵangunderezgekako ku msumba; ndipo nge mpha nyengo zinyake ŵangwamba kukoso ndi kubaya ŵanyake ŵa ŵaYisraele wo, mu miseu yikuru, unyake wo ukwere ku Betele ndi unyake wo urata ku Gibea, ndi mu malo ghose, akhumba ŵanthu machumi ghatatu ŵaku Yisraele wangubayika.

³² ŴaBenjamini ŵanguti, “Wadikiskika paurongo pidu, nge mpha kudanga.” Kweni ŵaYisraele ŵanguti, “Tiyeni tithaŵe, mwakuti tiŵatuzgeko ku msumba ŵaye ku miseu yikuru.”

³³ Ndipo ŵaYisraele ŵangusoka kutuwa mu malo ghawo, ŵangujindandika pa Bala-tamara; ndipo ŵaYisraele wo ŵangubisama ŵangusotopoka ruŵiruŵi mu malo ghawo ku zambwe kwa Geba.

³⁴ Ndipo kunguza ŵakumikana ndi Gibea, vikwi chumi (10,000) ŵanthu ŵakusankhika ŵakutuwa mwaku Yisraele yose, ndipo nkhondo yinguŵa yinonono; ŵaBenjamini ŵengavi kuziŵa kuti uyowi wenga pafupi ndi iwo.

³⁵ Ndipo Ambuya anguthereska Benjamini paurongo paku Yisraele; ndipo ŵaYisraele ŵangubaya ŵaBenjamini vikwi machumi ghaŵi ndi vinkhonde, pachanya machumi pe chumi (25,100) zuŵa liya, wose yaŵa ŵenga ŵanthu ŵakusolo lipanga.

³⁶ Viyo ŵaBenjamini ŵanguwona kuti ŵathereskeka. ŴaYisraele wangupaska malo kwaku Benjamini, chifukwa wangugomekezga pa ŵanthu ŵakubisama wo ŵanguŵamika kumikana ndi Gibea.

³⁷ Ndipo wo ŵangubisama ŵangutinthimika ndi ŵanguchimbiriya pa Gibea; wakukoso msumba wose ndi wuyi wa lipanga.

³⁸ Sono chisimikizgu chakurongosoleka pakati pa ŵaYisraele ndi ŵanthu ŵa ŵangubisama chenga chakuti asani ŵachitiska mtambo ukuru wa usi wakukwere ku chanya kutuwa mu msumba,

³⁹ iku ŵaYisraele ŵang'anamukiye ku nkhondo. Sono ŵaBenjamini ŵangwamba kukoso ndi kubaya akhumba machumi ghatatu gha ŵaYisraele; ŵanguti, “Kwakuneneska ŵabayika paurongo pidu, nge ndimu nkhondo yakudanga.”

⁴⁰ Kweni penipo chisimikizgu cha mtambo wa usi chingwamba kukwera, kutuliya mu msumba, ŵaBenjamini ŵangulereska kuvuli kwawo; ndipo ehe; msumba wose ungukwezga usi kuchanya.

⁴¹ Sono ŵaYisraele ŵangung'anamuka, ndipo ŵanthu ŵaku Benjamini ŵangudika nthazi, pakuti ŵanguwona kuti uyowi we pafupi ndi iwo,

⁴² chifukwa cho ŵangung'anamukiya misana yawo ku ŵanthu ŵaku Yisraele kurata ku bozwa, kweni nkhondo yinguŵazinga ndipo wo wangutuwa mu msumba ŵanguŵabaya mukati mwawo.

⁴³ Pakuŵadumuliya pasi ŵaBenjamini ŵanguŵandondoloska ndi kuŵaphwatiya pasi kwamba ku Noba kwachifika kwakutghana ndi Gibea ku vuma.

⁴⁴ Ŵanthu vikwi chumi ndi vinkhonde ndi vitatu (18,000) ŵaku Benjamini ŵangubayika, wose yaŵa ŵenga zingwazi.

⁴⁵ Ndipo ŵangung'anamuka ŵanguthaŵa kurata ku bozwa; kweni nkhondo yinguŵazinga ndipo wo wangutuwa mu msumba ŵanguŵabaya mukati mwawo.

⁴⁶ Viyo wose wo ŵangufwa mu zuŵa liya ŵaku Benjamini ŵenga vikwi machumi ghaŵi ndi vinkhonde (25,000) yaŵa wose ŵenga zingwazi.

⁴⁷ Kweni ŵanthu machumi pe chumi ghankhonde ndi limoza (600) ŵangung'anamuka, ŵanguthaŵa kurata ku bozwa ku jarawe laku Rimoni, ndipo ŵanguja pa jarawe laku Rimoni miyezi yinayi.

⁴⁸ Ndipo ŵaYisraele wangung'anamukiya kuvuli kumikana ndi ŵaBenjamini, ŵanguŵakoso ndi wuyi wa lipanga, ŵanthu ndi viŵetu ndi vyose vyo ŵangusaniya. Ndipo misumba yose yo ŵangusaniya ŵangocha ndi moto.