Ŵeruzgi 17 - Tonga Bible 1986

Ŵangoza ŵaku Mika ndi Mzukuru

¹ Mu charu cha mitunthu chaku Efraimu mwenga munthu yo zina lake lenga Mika.

² Ndipo uyu wanguti ku nyina, vya siliva chikwi chimoza ndi machumi pe chumi (1,100) vingutoleka kwinu, vyo mungukambiyapo thembo lo ndingulivwa ndi ine, ehe, siliva yo wendi ine, “Ndine ndinguto.” Ndipo anyina ŵanguti “Wakutumbikika waŵe mwana ku Ambuya.”

³ Ndipo wanguwezge vya siliva chikwi ndi machumi pe chumi (1,100) ku nyina; ndipo nyina wanguti, “Ndipatuliya uyu ku Ambuya kutuwa ku janja langu, kuti mwana wangu wachitiye ngoza wakusema ndi ngoza wakusongono; chifukwa cho sono ndikamuwezgiyanga kwako.”

⁴ Viyo wati wawezge ndrama zo ku nyina, nyina wangutopo siliva machumi pe chumi ghaŵi (200) wangupereka ku wakusula vya siliva, yo wangumupangiya ngoza wakusema ndi ngoza wakusongono; ndipo wenga mu nyumba yaku Mika.

⁵ Mika wenga ndi kavuŵa; ndipo wanguchita chivwaru chapachifuŵa cha mzukuru ndi twangoza, ndipo so wangumika yumoza wa ŵana ŵake yo wanguŵa mzukuru wake.

⁶ Mu mazuŵa gho mwengavi karonga mu Yisraele; munthu yose wanguchita chenicho chenga chamampha mu maso ghaku yija.

⁷ Sono kwenga munyamata waku Betelehemu mu Yuda, wamu mbumba yaku Yuda yo wenga muLevi; ndipo wenga mulendo kwenikuwa.

⁸ Munthu uyu wangutuwako ku msumba waku Betelehemu waku Yuda, kwachija kweniko wangasaniya malo ghakujako; ndipo po wendanga, wanguza ku charu cha mitunthu chaku Efraimu ku nyumba yaku Mika.

⁹ Ndipo Mika wanguti kwaku iyo, “Utuliya pani?” Iyo wanguti, “Ine ndine muLevi waku Betelehemu waku Yuda, ndipo ndikayinganga kweniko kose ndingasaniya malo.”

¹⁰ Mika wanguti kwaku iyo, “Ujenge penipano, ndipo uŵe kwaku ine ada ndi mzukuru, ndipo ndikakupaskanga ndrama za siliva chumi pa chaka, ndi maraya, ndi kurgha.”

¹¹ Ndipo muLevi wangukhorwa kuja ndi munthu yo ndipo munyamata wanguŵa kwaku iyo nge njumoza wa ŵana ŵake.

¹² Ndipo Mika wangumumika, ndipo munyamata yo wanguŵa mzukuru, ndipo wenga mu nyumba yaku Mika.

¹³ Viyo Mika wanguti, “Sono ndiziŵa kuti Ambuya akandisakatiskanga, chifukwa ndendi muLevi yo ndi mzukuru.”