Ŵeruzgi 12 - Tonga Bible 1986

Jefta ndi Efraimu

¹ Ŵanthurumi ŵaku Efraimu ŵangudanika kuskoma vidya vya nkhondo, ndipo ŵangwambukiya ku Zafoni, ŵanguti kwaku Jefta, “Chifukwa nchine cho ungwambukiya kusirgha kwachirwana ndi Amoni ndipo wengavi kutidana kuti tirute nawe? Tikawochanga nyumba yako ndi moto, iwe, nawe we mwenimo.”

² Ndipo Jefta wanguti, “Ine ndi ŵanthu ŵangu tenga pa mphindanu ndi Amoni, ndipo po ndingumudanani, kuti mungundipozomoska cha ku janja lawo.

³ Po ndinguwona kuti mungukana kundipozomoska, ndingujitole umoyo wangu mu janja langu ndingwambukiya kusirgha kwachimikana ndi Amoni; ndipo Ambuya anguwapereka mu janja langu, na cho mwaziya kwaku ine msana wale nchine kuzachirwana nane?”

⁴ Sono Jefta wanguungang'a ŵanthu wose ŵamu Gileada, ŵangurwana ndi Efraimu; ndipo ŵanthu ŵamu Gileada ŵangukoso Efraimu, chifukwa watinge, “Imwe mwa ŵaGileada mukuthaŵa kwaku Efraimu, mukati mwaku Efraimu ndi Manase.”

⁵ Ndipo ŵaGileada ŵangupoka vipali vya Yordane ku ŵaEfraimu. Ndipo asani yose yo wanguthaŵa kwaku Efraimu wanguti, “Rekani ndambukiye kusirgha”, ŵanthu ŵamu Gileada ŵanguti kwaku yo, “Kumbi we mwina Efraimu?” Iyo wachiti, “Awa”,

⁶ ŵanguti kwaku iyo, “Sono kamba kuti Shibolete”, iyo wanguti, “Sibolete”, pakuti watondekanga kulizumbuwa kwakurunjika mbweno ŵamukonga ndi kumbaya pa vipali vya Yordane. Ndipo penipa ŵangufwiyapo nyengo yiya ŵaEfraimu vikwi machumi ghanayi ndi viŵi (42,000).

⁷ Jefta wangweruzga Yisraele virimika vinkhonde ndi chimoza. Pavuli wangufwa, ndi wanguŵikika mu Gileada.

Ibzani, Eloni ndi Abadoni

⁸ Pavuli pake Ibzani waku Betelehemu wangweruzga Yisraele.

⁹ Wenga ndi ŵana ŵanthurumi machumi ghatatu (30); ndi ŵana ŵanthukazi machumi ghatatu wanguŵaŵirwiska kubwalo ku khamu lake, ndipo ŵana ŵanthukazi machumi ghatatu wanguŵaserezga kutuliya kubwalo kutorana ndi ŵana ŵake ŵanthurumi, ndipo wangweruzga Yisraele virimika vinkhonde ndi viŵi.

¹⁰ Pavuli wangufwa Ibzani, wanguŵikika mu Betelehemu.

¹¹ Pavuli paku iyo Eloni mu Zebuluni wangweruzga Yisraele. Wangweruzga Yisraele virimika chumi.

¹² Pavuli Eloni mu Zebuluni wangufwa, wanguŵikika mu Ajaloni mu charu chaku Zebuluni.

¹³ Pavuli pake Abadoni mwana waku Hilele mu Piratoni wangweruzga Yisraele.

¹⁴ Wenga ndi ŵana ŵanthurumi machumi ghanayi ndi ŵazuku ŵanthurumi machumi ghatatu, wo ŵakweranga pa zimbunda machumi ghankhonde ndi ghaŵi (70); ndipo wangweruzga Yisraele virimika vinkhonde ndi vitatu.

¹⁵ Pavuli Abadoni mwana waku Hilele, wangufwa, ndipo wanguŵikika mu Piratoni mu charu chaku Efraimu, mu charu cha mitunthu cha Amaleke.