ŴaRoma 9 - Tonga Bible 1986

Chiuta ndi ŵanthu ŵake

¹ Ndineneska mwaku Kristu (kuti ndipusika cha; njuŵi zangu zisimikizgiya pamoza nane mu Mzimu Wakupaturika),

² kuti nde nacho chitima chikuru ndi urwirwi wambura kulekezga mu mtima wangu.

³ Chifukwa ndingakhumba mphanyi kuti ine ndamweni ndiŵe wakutembeka kwaku Kristu pa chifukwa cha ŵabali ŵangu, ŵachikazi ŵanyangu kuchiri ku liŵavu:

⁴ ŵeniwo mbaYisraele; kwaku ŵeniwo kwe ulezi wo, ndi unkhankhu wo, ndi marayizganu, ndi kapaskidu ka dangu, ndi uteŵeti waku Chiuta, ndi mapanganu;

⁵ ŵeniwo mbaseku, ndi mwaku ŵeniwo uli nkhu liŵavu wanguziya Kristu, yo we pachanya paku wose, Chiuta wakutumbikika muyaya. Ameni.

⁶ Kweni kuti kwe nge nkhuti mazu ghaku Chiuta ghatondeka cha. Chifukwa kuti wose mbaYisraele cha, ŵeniwo mbaku Yisraele,

⁷ ndipo kuti ndi wose cha wo mbana ŵaku Abrahamu pa chifukwa chakuti ndi mphapu yaku Abrahamu; kweni, “Muwaku Yisaki mphapu yaku, yikadanikanga.”

⁸ Uku ndiku kuti wo ŵakupapika ku liŵavu pe kuti mbana ŵaku Chiuta cha; kweni wo ŵakupapika chifukwa cha chipanganu chaku Chiuta ndiwo mbeu yake yeneko.

⁹ Chifukwa mazu gha chipanganu ngenagha, “Uli mpha nyengo yino ndiziyenge, ndipo Sara waŵenge ndi mwana.”

¹⁰ Ndipo viyo pe cha; kweni Rabeka nayo, wati wazuwuka ndi yumoza, ndiyo auskefwe Yisaki,

¹¹ chifukwa ŵana wo ŵecheŵandapapike, chingana nkhuchitapo so kanthu kamampha pamwenga kaheni, alinga kuti chitema chaku Chiuta kwakuyana ndi kasankhidu chijaririye, kutuwa ku zinchitu cha, kweni kwaku yo wadana,

¹² kungumneneke, “Mura yo wamteŵetiyenge mumana.”

¹³ Uli ndimo kwalembeke, “Yakobe ndamwanja, kweni Esau ndamtinkha.”

¹⁴ Viyo tikatingenji na? Kumbi kwe uwura urunji kwaku Chiuta?

¹⁵ Kungaŵanga viyo cha! Chifukwa kwaku Mosese watiti, “Ndimchitiyenge lisungu, yo yose ndimchitiya lisungu, ndipo ndenjerwiyenge yo yose nditenjerwa.”

¹⁶ Viyo na, kuti nchaku yo wakhumba cha, chingana nchaku yo wachimbiya cha, kweni nchaku Chiuta yo wachitiya lisungu.

¹⁷ Chifukwa lembo lo lititi kwaku Farao, “Kwaku chenichi ndicho ndingukuyuskiya, chakuti ndirongolenge mwako nthazi yangu, ndipo chakuti zina langu liwandiyenge mu charu chose chapasi.”

¹⁸ Viyo na, mweniyo wakhumba wamchitiya lisungu, ndipo mweniyo wakhumba wangangamiska.

Ukali waku Chiuta ndi lisungu lake

¹⁹ Viyo unenenge nane, chifukwa chine weche kususka? “Pakuti kumbi njani wakumikana ndi khumbu lake?”

²⁰ Awa na, wamunthu we, ndiwe yani wakuŵiringuliya Chiuta? Kumbi chakuwumbika cho chinenenge ku muumbi wake, “Chifukwa chine wandiumba viyo?”

²¹ Pamwenga, kumbi muumbi walive mtufu pa dongu, kuchita ndi burunga lenilo pe chiyaŵi chimoza ku rumbu, ndi chiyaŵi chinyake ku myuyu?

²² Kweni na kwati asani Chiuta, chingana wakhumba kurongo kandundu kake ndi kusimikizga nthazi yake, mu kuzuzipizga kukuru wangulekerezga ŵanthu wo wangukaripa nawo ndi kuŵarongosole ku wanangiku;

²³ ndipo alinga kuti waziŵiske usambasi wa unkhankhu wake pa ŵanthu wo ŵanguronde lisungu lake, ŵeniwo wangurongosole limu ku unkhankhu,

²⁴ kwaku ifwe kwari, taŵenifwe wangudana taŵamu ŵaYuda pe cha, kweni ŵamu Mitundu nawo so!

²⁵ Uli ndimo wanene so mwaku Hoseya, “Ndilitamurenge khamu, langu lo kuti lenga khamu langu cha; ndi yo wengavi kwanjiwa, nyankhwanjiwa.

²⁶ Ndipo kuŵenge kuti, mu malo mwenimo kunguŵaneneke, kuti mwe khamu langu cha, kweniko ŵatamulikenge ŵana ŵaku Chiuta Wamoyo.”

²⁷ Kweni Yesaya wakutiya paku Yisraele: “Chingana unandi wa ŵana ŵaku Yisraele we nge ndi mchenga wapa nyanja, ŵakusiyika ndiwo ŵataskikenge.

²⁸ Chifukwa Ambuya amchita cheruzgu panupasi, kwachiduli ndi kwaruŵi.”

²⁹ Ndipo, nge ndimo Yesaya wangukambiya kali, “Kwambura kuti Mbuya wa Maŵanja watisiyiya mbeu, mphanyi taŵa nge ndi Sodomu, ndi talinganizgika ndi Gomora.”

³⁰ Viyo tikambengenji? Ndi chenichi, chakuti ŵaMitundu wo ŵambura kundondoloska urunji, ŵangufikapo pa urunji, urunji nawo wakutuwa ku chivwanu:

³¹ kweni ŵaYisraele ŵakundondoloska langula la urunji, ŵengavi kufikapo pa langulu lo.

³² Chifukwa chine? Pakuti, pakundondoloska, kwachivwanu cha, kweni nge nkhu zinchitu ŵanguguŵa pa mwa wo wa chiguŵisku,

³³ uli ndimo kwalembeke, “Awonani, ndiŵika mu Zioni mwa wachiguŵisku ndi jarawe la chiwiska: ndipo yo ngwakuvwana paku iyo kuti walengeskekenge cha.”