ŴaRoma 7 - Tonga Bible 1986

Nthengwa nge nchirongolero mo timangikiya ndi dangu

¹ Pamwenga mureka kuwamu, mwa ŵabali (chifukwa ndirongoro kwaku wo mbakuziŵiriya ndi chilangulu) kuti chilangulu cho chitufuliya pa munthu nyengo yose yo waŵiya wamoyo?

² Chifukwa munthukazi wakuŵirwa wamangika ndi dangu ku mrumi wake weche wamoyo; kweni asani wafwa mrumi wake, wafwatulika ku dangu la mrumi wake.

³ Viyo na, asani, weche wamoyo mrumi wake, waŵirwa ku munthurumi munyake, wazumbulikenge mureŵi; kweni asani wangafwa mrumi wake, ndi mwanangwa ku dangu lo, viyo kuti ndi mreŵi cha, chingana waŵirwa ku munthurumi munyake.

⁴ Eviyo, mwa ŵabali ŵangu, namwe so mungufiskikiya ku chilangulu cho mu liŵavulo laku Kristu; alinga kuti muŵirwiskike ku munyake yo wanguyuskika ku ŵakufwa, mwakuti tipasiye Chiuta vipasi.

⁵ Chifukwa penipo tajanga kwakuyana ndi kaŵiro ka unthu widu, makhumbiro gha maulakwi, gho ghanguziya mu chilangulu cho, ghachitiyanga mu viŵaru vidu, kwachipasiya vipasi ku nyifwa.

⁶ Kweni sono tadomoleka ku chilangulu cho, tati tafwako kwaku cho takolekangamo; viyo kuti titeŵetiyenge mu ufya wa mzimu, ndi mu ukali wa lembo cha.

Dangu ndi uheni

⁷ Titingenji na? Kumbi chilangulu cho nchaulakwi? Kungaŵanga viyo cha! Kweni mphanyi ndengavi kuteska ulakwi, mo uliri, kwambura chilangulu cho; chifukwa mphanyi kuti ndaziŵa chiŵinu nacho cha, asani chilangulu cho chengavi kunena, “Ungaŵiniwa cha”;

⁸ kweni ulakwi, pakutendeke mu langulu, ungutataliya mwangu likhumbira lose: chifukwa pade pa chilangulu ulakwi ngwakufwa.

⁹ Ndipo ine kali ndenga wamoyo pade pa chilangulu: kweni, lati laza langulu lo, ulakwi ungusisipuka, ndipo ine ndingufwa;

¹⁰ ndipo langulu lo lakurata ku umoyo lingusanirika kwaku ine ndakurata ku nyifwa.

¹¹ Chifukwa ulakwi wo, pakutendeke mu langulu lo, ungundifuvya, ndipo mwaku lo ungundibaya.

¹² Viyo chilangulu cho nchakupaturika, ndipo langulu lo ndakupaturika, ndi lakurunjika, ndi lamampha.

¹³ Viyo kumbi cho nchamampha chingundiŵiya nyifwa? Kungaŵa viyo cha! Kweni ulakwi ndi wo, wakuchitiya nyifwa mwaku ine mwaku cho nchamampha, mwakuti ulakwi uwoneke kuti mbulakwi, kuti ulakwi mwa langulu lo ungaŵadi ulakwi ukuru.

¹⁴ Chifukwa tiziŵa kuti chilangulu cho nchamzimu: kweni ine nde wanyama, wakugulika muŵanda ku ulakwi.

¹⁵ Chifukwa cho ndichita, kuti ndiwamu cha: chifukwa cho ndikhumba ndicho kuti ndichita cha; kweni cho nditinkha, ndicho ndichita.

¹⁶ Kweni asani cho ndirive kukhumba, ndicho ndichita, ndizomerezgana ndi chilangulu cho kuti nchamampha.

¹⁷ Kweni sono kuti ndine so cha ndichichita, kweni ulakwi wo wakuja mwangu.

¹⁸ Chifukwa ndiziŵa kuti mwangu, ndikwesa kuti, mu liŵavu langu kuti kajamo kanthu kamampha cha: pakuti kukhumba kwe nane, kweni kuchita kamampha ko kuti kuliko cha.

¹⁹ Chifukwa kamampha ko ndikhumba, kuti ndichita cha: kweni kaheni ko ndireka kukhumba, keniko ndichita.

²⁰ Kweni asani ndichita chenicho ndireka kukhumba, kuti ndine so cha ndichita, kweni ulakwi wo uja mwangu.

²¹ Viyo ndisaniya dangu lenili, lakuti, kwaku ine ndawakukhumba kuchita cho nchamampha, chiheni cho chiriko.

²² Chifukwa mu chilangulu chaku Chiuta ndikondwere kwakulingana ndi munthu yo wamukati,

²³ kweni mu viŵaru vyangu ndithoŵa dangu lamwenga, lakurwiya pa chilangulu cho cha vinjeru vyangu, ndi lakundikole mkoli ku dangu lo la ulakwi, lo le mu viŵaru vyangu.

²⁴ Ndamunthu msokwa ine! Njani wanditaskengeko ku liŵavu la nyifwa yeniyi?

²⁵ Ndimwonga Chiuta mwaku Yesu Kristu Ambuyafwe. Viyo na, ine ndamweni nditeŵete dangu laku Chiuta ndi vinjeru vyangu; kweni ndi liŵavu lo nditeŵete dangu la ulakwi.