ŴaRoma 6 - Tonga Bible 1986

Kufwa ku uheni kweni kuŵa ndi umoyo mwaku Kristu

¹ Viyo tikatingenji? Kumbi tijaririyenge mu ulakwi, alinga kuti wezi wo ufurwe?

² Kungaŵanga viyo cha! Taŵenifwe tingufwa ku ulakwi, tijaririyenge ŵamoyo so uli mwenimo?

³ Pamwenga mureka kuziŵa kuti tose taŵenifwe tingubatizikiya mwaku Kristu Yesu, tingubatizikiya mu nyifwa yake?

⁴ Viyo tinguŵikikiya pamoza nayo mu chibatizo mu nyifwa: alinga kuti, uli ndimo Kristu wanguyuskikiyako ku nyifwa ndi unkhankhu wa Awiske, viyo ifwe nafwe tendiyenge mu ufya wa umoyo.

⁵ Chifukwa asani tarungikana nayo pamoza mu chikozgu cha nyifwa yake, kwakuneneska tirungikenge pamoza nayo mu chiyuka chake nacho viyo;

⁶ pakuziŵa chenichi, kuti unthu widu wakali ungupayikikiya pamoza nayo, alinga kuti liŵavu lo la ulakwi liwayulike, viyo kuti tireke ifwe kuŵa so ŵaŵanda ku ulakwi;

⁷ pakuti yo wafwa warunjiskika ku ulakwi.

⁸ Kweni asani tingufwiya pamoza ndi Kristu, tivwana kuti tiŵiyenge so ŵamoyo nayo,

⁹ taŵakuziŵa kuti Kristu, pakuyuskika ku ŵakufwa, kuti ngwamafwika so cha, kuti nyifwa yimtufuliya so cha.

¹⁰ Chifukwa nyifwa yo wangufwa, wangufwiya kamoza pe mbwenu kuchiri ku ulakwi: kweni umoyo wo wajariya, waujariya kuchiri kwaku Chiuta.

¹¹ Viyo namwe mujipime ŵakufwa kuchiri ku ulakwi, kweni ŵamoyo kuchiri kwaku Chiuta mwaku Kristu Yesu.

¹² Viyo ulakwi ureke kuwusa mu liŵavu linu lachifweni, kuti muvwiye maulakalaka ghake.

¹³ Ndipo viŵaru vinu mungavipereka cha ku ulakwi nge ndi vitataliru vya uwura-urunji; kweni mujipereke kwaku Chiuta, nge mbamoyo ku ŵakufwa, ndi viŵaru vinu nge ndi vitataliru vya urunji kwaku Chiuta.

¹⁴ Chifukwa kuti ulakwi utufuliyenge paku imwe cha: chifukwa kuti mwe pasi pa chilangulu cha, kweni pasi pa wezi.

Kuŵa ŵaŵanda ŵa urunji

¹⁵ Na uli kumbi tilakwenge, pakuti kuti te pasi pa chilangulu cha, kweni pasi pa wezi? Kungaŵanga viyo cha!

¹⁶ Asi muziŵa kuti kwaku mweniyo mujiperekako nge mbaŵanda kwachimvwiya, mwe ŵaŵanda kwaku yo mumvwiya, pamwenga ŵa mvwiyu ku urunji?

¹⁷ Kweni wawongeke Chiuta, kuti chingana mwaŵanga ŵaŵanda ŵa ulakwi, ndikweni munguvwiya mu mtima kasambizgidu ko kakuperekeka kwaku imwe;

¹⁸ ndipo pakufwatulika ku ulakwi, munguŵa ŵaŵanda ku urunji.

¹⁹ Ndikamba nge ndi munthu pa chifukwa cha udomboto wa liŵavu linu; chifukwa uli ndimo mungupereke viŵaru vinu nge mbaŵanda ku ukazuzi ndi ku uchikana-marangu kuya ku uchikana-marangu, viyo sono viperekeni viŵaru vinu nge mbaŵanda ku urunji kuya ku kupaturika.

²⁰ Chifukwa penipo mwenga ŵaŵanda ŵa ulakwi, mwenga ŵanangwa kuchiri ku urunji.

²¹ Viyo mwenga ndi chipasi chakutinji kali mwaku vyenivyo sono mulenga soni navyo? Chifukwa umari waku viya ndi nyifwa.

²² Kweni sono mwati mwafwatulika ku ulakwi, ndi so mwati mwaŵa ŵaŵanda kwaku Chiuta, mwe nacho chipasi chinu kuya ku kupaturika, ndi umari wa umoyo wamuyaya.

²³ Chifukwa mphotu ya ulakwi ndi nyifwa; kweni chawezi chaku Chiuta mbumoyo wamuyaya mwaku Kristu Yesu Ambuyafwe.