ŴaRoma 4 - Tonga Bible 1986

Abrahamu nge nchakuwoniyapo

¹ Viyo tikatingenji ndi Abrahamu, auskekurufwe kuchiri ku liŵavu, wasaniya chine?

² Chifukwa, asani Abrahamu wangurunjiskika kwamu zinchitu, wenacho chakutumbwiyapo; kweni kuchiri kwaku Chiuta cha.

³ Pakuti lembo lititinji? “Ndipo Abrahamu wanguvwaniya mwaku Chiuta, ndipo kungupimikiya iyo nge mburunji.”

⁴ Kweni ku wanchitu kuti mphotu yipimikiya uli nchawanangwa cha, kweni ndi malipiru.

⁵ Kweni kwaku yo ngwakuchita cha, kweni ngwakuvwana mwaku mweniyo warunjiska wambura kusopa, chivwanu chake chimpimikiya nge mburunji.

⁶ Uli ndimo Davidi nayo wakambiya ndi mwaŵi waku yo munthu, kwaku mweniyo Chiuta wapimiya urunji pade pa zinchitu,

⁷ “Mbamwaŵi ŵeniwo vyarekereka vya uchikanamarangu vyawo ndi vyaku ŵeniwo vilakwa vyaundika.

⁸ Ngwamwaŵi munthu mweniyo mbuya walive kumpimiya ulakwi.”

⁹ Kumbi mwaŵi uwu viyo ngwapa mchinju pe pamwenga ngwapa uwura-mchinju so? Chifukwa tititi, kwaku Abrahamu chivwanu chake chingupimikiya urunji.

¹⁰ Na, chingupimikiya uli? Po wenga mumchinju, pamwenga mu uwura mchinju? Mu mchinju cha, kweni mu uwura-mchinju:

¹¹ ndipo wanguronde chisimikizgu cha mchinju, chiŵali cha urunji wa chivwanu wo wenga nawo uwura-mchinju: alinga waŵe iyo wiskeu waku wose ŵakuvwana, chingana mbambura kuchinjika, alinga kuti urunji wo ungapimikiya iwo nawo;

¹² waŵe so wiskeu wa mchinju, ku ŵamu mchinju pe cha, kweni ndi kwaku ŵeniwo ŵatenda mu mendedu gha chivwanu chaku Abrahamu auskefwe, cho wanguŵa nacho wenga wandachinjike.

Chipanganu chaku Chiuta chirondeka mu chigomezgu

¹³ Chifukwa kuti chinguziya mwa chilangulu cha chipanganu cho cha kwaku Abrahamu pamwe ku mbeu yake, chakuti waŵenge iyo mhara wa panupasi, kweni chinguziya mwa urunji wa chivwanu.

¹⁴ Chifukwa asani ŵamu chilangulu mbakuhara, chivwanu icho nchaumbughuya, ndipo chipanganu cho chawayuka:

¹⁵ chifukwa chilangulu cho chitataliya kandundu; kweni ko kulive chilangulu, kulive so ubudi.

¹⁶ Chifukwa chenichi nchakutuwa ku chivwanu, kuti chiŵe kwakulingana ndi wezi; kuti chipanganu chiŵe chakukho ku mbeu yose yo: kwaku yo pe njamu chilangulu cha, kweni so kwaku yo njamuchivwanu chaku Abrahamu, mweniyo mbauskefwe ŵaku tose,

¹⁷ uli ndimo kwalembeke, “Ndakuŵika wiskeu wa mitundu yinandi,” paurongo paku Chiuta, mwaku mweniyo wanguvwaniya, mweniyo so wasanduska ŵakufwa ŵaŵe ŵamoyo, ndi wadana vyambura kuŵapo, ulaka nge vyengapo.

¹⁸ Mweniyo Abrahamu, chati chamara chigomekezgu, wanguvwaniya mu chigomekezgu, kuti wakaŵanga iyo wiskeu wa mitundu yinandi, kwakuyana ndi nenedu lo, “Yikaŵanga viyo mbeu yako.”

¹⁹ Ndipo kwambura kutomboroka mu chivwanu, wangusanda liŵavu laku iyo mweneko nge ndakufwa kali pakuŵa ndi virimika akhumba machumi pe chumi, ndi kafwidu ka mphapu yaku Sara.

²⁰ Ndipo kuchiri ku chipanganu chaku Chiuta wengavi kutomboroka mu chivwanu kweni wangukhome mu chivwanu, wakupaska unkhankhu kwaku Chiuta,

²¹ ndiwakukhorwa kuti cho wangupangana wenga so wanthazi kwachichita.

²² “Chifukwa kungupimikiya iyo nge mburunji.”

²³ Kweni kuti kungulembeka pa chifukwa chaku iyo pe cha, “Kuti kungumpimikiya,”

²⁴ kweni pa chifwa chaku ifwe nafwe, kwaku taŵenifwe kwamkutipimikiya, pakuvwaniya mwaku yo wanguyuska Yesu Ambuyafwe ku ŵakufwa,

²⁵ mweniyo wangukomboleke pa chifukwa cha vilakwa vidu, ndipo wanguyuskikiya pa chifukwa cha kurunjiskika kwidu.