ŴaRoma 2 - Tonga Bible 1986

Cheruzgu chaku Chiuta

¹ Viyo ndiwe wambura mpandira, wa munthu yose wakweruzga: chifukwa mwaku chenicho uteruzga munyako, ujisuska wamweni; pakuti wakweruzga uchita vyenivyo.

² Ndipo tiziŵa kuti cheruzgu chaku Chiuta kwakuyana ndi uneneska che pa ŵakuchita vyaviyo.

³ Ndipo kumbi upima chenichi, wamunthu we, wakuŵeruzga ŵeniwo ŵachita vyaviyo, ndi wakuvichita wamweni, kuti iwe wamfyanthamukako ku cheruzgu chaku Chiuta?

⁴ Pamwenga uyuyuwa kumbi usambasi wa ulemu wake ndi unkhunthiya ndi chilekerezga, pakureka kuziŵa kuti ulemu wo waku Chiuta ngwakurongozge iwe ku chipe?

⁵ Kweni mu unononu wako ndi mtima wako wakukana kupe, ujiŵikiya kandundu mu zuŵa la kandundu ndi la uvumbuzi wa cheruzgu chirunji chaku Chiuta;

⁶ mweniyo wawerezgiyenge kwaku yose kwakulingana ndi nchitu zake.

⁷ Umoyo wamuyaya kwaku ŵeniwo ŵachita umampha kwalinthata, mbakulembe unkhankhu ndi rumbu ndi uwura chivuzi;

⁸ kweni kwaku wo mbakujitukumuwa ndi kuti ŵavwiya uneneska cha kweni ŵavwiya ulakwi kukaŵanga ukari ndi kandundu,

⁹ pakaŵanga suzgu ndi kuzita kwamu mtima wa munthu we yose yo wachita uheni, wamu Yuda danga ndiso wa muGriki.

¹⁰ Kweni unkhankhu ndi rumbu ndi chimangu kwaku yose yo ngwakuchita umampha, ku muYuda danga ndi so ku muGriki:

¹¹ chifukwa kwaku Chiuta ulive urumba chisku.

¹² Chifukwa ŵeniwo wose ŵalakwa kwambura dangu, kwambura dangu nako so ŵamyowa: ndipo ŵeniwo wose ŵalakwa mu chilangulu, ndi chilangulu ŵamkweruzgika;

¹³ chifukwa kuti ŵakuvwa dangu mbarunji kwaku Chiuta cha, kweni ŵakuchita dangu ndiwo ŵamrunjiskika.

¹⁴ Chifukwa penipo ŵaMitundu pakuŵavi chilangulu ŵachita vya chilangulu kwaku iwo ŵeneko;

¹⁵ mwakuti ŵarongo iwo kuti nchitu ya chilangulu cho yilembeka mu mitima yawo, njuŵi zawo zakusimikizgiyapo, ndi maghanaghanu ghawo, limoza ku linyake, ghakuŵapanikizga pamwenga ghakuŵapandiriska;

¹⁶ mu zuŵa lenilo Chiuta wamkweruzgiya mwaku Yesu Kristu vibisibisi vya ŵanthu, kwakulingana ndi evangeli wangu.

ŴaYuda ndi dangu

¹⁷ Kweni asani iwe utamulika muYuda, ndi uthamiya chilangulu cho, ndi utumbwiya mwaku Chiuta,

¹⁸ ndi uteska khumbu lake, ndi ukhozga vyo vyamamphaku;

¹⁹ asani, pakusambizgika chilangulu cho, ukhozga vyo uziŵa kuti we chirongozgi wa ŵachiburumutiya, ukweru ku ŵamu mdima,

²⁰ wakulanga ŵakupusa, msambizgi wa malitema, pakuŵa ndi chikozgu cha mziŵiru ndi cha uneneska mu chilangulu cho;

²¹ viyo wa wakusambizga munyake, asi ujisambizga wamweni? Wa wakumemeza kuba cha, kumbi iwe utuba?

²² Wa wakukamba kureŵa cha, nawe ureŵa kumbi? Wa wakutinkha vyangoza, kumbi iwe uskoŵa ŵakasopi?

²³ Wa wakutumbwiya mu chilangulu, kumbi pakujumpha dangu utimyuyuwa Chiuta?

²⁴ Chifukwa, uli ndimo kwalembeke, “Zina laku Chiuta litokoskeka mu ŵaMitundu pa chifwa chinu.”

²⁵ Pakuti nadi mchinju utanduwa, asani uchita dangu: kweni asani ndiwe mjumpha-dangu, mchinju wako waŵadi uruwa-mchinju.

²⁶ Viyo asani uwuramchinju wo usungirizga vyakutemeka virunji vya chilangulu cho, asi uwuramchinju wake wampimika mchinju?

²⁷ Ndipo so asi uwura-mchinju wo wa ku kawi, pakufiska chilangulu cho, weruzgenge iwe wamjumpha-dangu, chingana we ndi lembo ndi mchinju?

²⁸ Chifukwa kuti ndiyo muYuda cha, yo ngwamu kawonekedu pe; chingana nkhuti ndiwo mchinju cha, wo ngwamu kawonekedu mu liŵavu:

²⁹ kweni ndiyo muYuda yo ngwa mukati; ndipo mchinju ngwa mtima, mu mzimu, mu lembo cha; rumbu laku mweniyo kuti nda ku ŵanthu cha, kweni kwaku Chiuta.