ŴaRoma 12 - Tonga Bible 1986

Umoyo mu uteŵete waku Chiuta

¹ Viyo ndikuŵeyereni, mwa ŵabali, chifukwa cha vyalisungu vyo vyaku Chiuta, kupereka maliŵavu ghinu sembe yamoyo yakupaturika, yamarondeka kwaku Chiuta, ndiyo uteŵeti winu wavinjeru.

² Ndipo mungajilinganizga ndi mgonezi uno cha: kweni mujisanduske mu kuchitika vifya vinjeru vinu, alinga kuti mwesenge imwe mo liriri khumbu lo laku Chiuta, lamampha ndi lamarondeka ndi lakufiskika.

³ Chifukwa, ku wezi wakupaskika kwaku ine, ndimunene munthu yose wamwaku imwe, wareke kujipima kwakuruska po watenere kupimiya; kweni kupima kwakuziza, nge ndimo Chiuta wagaŵiya yose, yumoza ndi yumoza, chigaŵa cha chivwanu.

⁴ Chifukwa uli ndimo tiliri navyo viŵaru vinandi mu liŵavu limoza, ndi viŵaru vyose vyo kuti vye ndi mlimu umoza pe cha.

⁵ Viyo nanga teŵanandi te liŵavu limoza mwaku Kristu, kweni tose teviŵaru chimoza cha chinyake.

⁶ Ndipo pakuŵa navyo vyawezi vyakupambanapambana uli ndi wezi wo wakupaskika kwaku ifwe, pamwenga utaula, titaule kwakulingana ndi mweso wa chivwanu;

⁷ pamwenga uteŵeti, titakatakiye mu uteŵeti widu, pamwenga wakusambizga, mu usambizgi wake;

⁸ pamwenga wakuchichizga, mu uchichizga wake; wakupaska vyawezi, mu wanangwa; wakuwusa mu phamphu; wakuchitiya lisungu, mu masangu.

⁹ Chanju chinu chiŵe chamburafuvyu. Muŵe ŵakutinkha uheni, ndi ŵakumeremete ku umampha.

¹⁰ Mu chanju chaubali mwanjani.

¹¹ Mureke kuŵa ŵakata mu machitidu ghinu, muŵe ŵamphamphu mu mzimu, teŵetiyani Ambuya.

¹² Ŵakukondwa muchigomezgu; ŵakukunthiyapo mu suzgu; ŵakufwiririyapo mu kuromba,

¹³ muŵe ŵakusangana nawo mu maukavu gha ŵakupaturika; ŵakutakatakiya wezi ku ŵalendo.

¹⁴ Ŵatumbikeni ŵeniwo ŵakuŵembani; tumbikani, ndi mungatemba cha.

¹⁵ Kondwani pamoza ndi ŵakukondwa; tenjeni pamoza ndi ŵakutenje.

¹⁶ Yanani mu mtima yumoza ndi munyake. Mungasuŵiriyanga vyathamu cha, kweni sunganani ndi ŵakuzimbwa. Mungaŵanga ŵakujirumba cha.

¹⁷ Mungawerezge yumoza cha uheni pa uheni. Phwereni vyaulemu pa maso paku wose.

¹⁸ Asani nkhwamachitika, ulindimo muziŵiya, muŵe mu chimangu ndi ŵanthu wose.

¹⁹ Mwaŵakwanjiwa, mungajitayiya thayu cha, kweni ndereni malo ku kandundu kaku Chiuta; pakuti kwalembeka, “Thayu ndaku ine; ine ndamwerezgapo, watiti Mbuya.”

²⁰ Kweni, “Asani wamawongu wako ngwanja, muhiŵe ndi kurgha; asani ngwanyota, mumweske maji; chifukwa pakuchita viyo, urundenge pa mutu pake make gha moto.”

²¹ Ungagodeka ndi uheni cha, kweni ugode uheni wo ndi umampha.