ŴaRoma 10 - Tonga Bible 1986

Yuda ŵataya urunji waku Chiuta

¹ Mwa ŵabali, linkweka la mtima wangu ndi niniziku langu lakwaku Chiuta pa chifukwa chaku wo, ndikhumba kuti ŵataskike.

² Chifukwa ndituŵasimikizgiya kuti phamphu la kuchiri kwaku Chiuta ŵe nalo, kweni uli ndi mziŵiru cha.

³ Chifukwa pakureka kuwamo mu urunji waku Chiuta, ndi pakulembe kumiska urunji waku ŵija, ŵengavi kujithereske ku urunji waku Chiuta.

⁴ Chifukwa kwaku yose wakuvwana Kristu mbumari wa langulu laku urunji.

Kutaskika kukunozgeke ŵanthu wose

⁵ Chifukwa Mosese walemba kuti munthu yo wauchitaurunji wamu langulu wajariyenge wamoyo mwenimo.

⁶ Kweni urunji wamu chivwanu ukamba viyo, Unganenanga cha mu mtima wako, “Njani wakweriyengeko kuchanya?” (ndiku, kusiska Kristu);

⁷ pamwenga, “Njani wasikiyengemo mu munthondwe wo?” (ndiku, kukwezga Kristu ku ŵakufwa).

⁸ Kweni ghatitinji? Mazu nge pafupi pako mu mlomo wako, ndi mu mtima wako: ndigho mazu gha chivwanu, ghenigho timemeza: ghakuti,

⁹ asani ungamzomera ndi mlomo wako Yesu nge ndi Mbuya, ndipo ungavwana mu mtima wako kuti Chiuta wangumyuska kuŵakufwa, ukataskikanga:

¹⁰ pakuti ndi mtima munthu wavwaniya ku urunji; ndipo ndi mlomo wazomera ku utaski.

¹¹ Pakuti lembo lo lititi, “Yose wakuvwana mwake kuti walengeskekenge cha.”

¹² Chifukwa mphambanu palive pakati pa muYuda ndi muGriki chifukwa yumoza iyo ndi Mbuya waku wose, msambasi kwaku wose ŵakudaniya paku iyo:

¹³ pakuti, “Mweniyo yose wadanenge pa zina la Ambuya, wakataskikanga.”

¹⁴ Kweni ŵadanenge uli paku mweniyo ŵalive kuvwana mwake? Ndipo ŵavwanenge uli mwaku yo ŵalive kumuvwa? Ndipo ŵavwenge uli kwambura ŵakutaula?

¹⁵ Ndipo ŵataulenge uli, kwambura kuti ŵatumika? Uli ndimo kwalembeke, “Nkhutowa nako marundi gha ŵakugozga vyamampha!”

¹⁶ Kweni kuti wose ŵavwiya evangeli cha. Chifukwa Yesaya watiti, “Ambuya, njani wavwaniya mukutaula kwidu?”

¹⁷ Viyo chivwanu chituliya mu kuvwa, ndi kuvwa ko mu mazu ghaku Kristu.

¹⁸ Kweni ndititi, asi ŵanguvwa? Inyadi, “Mazu ghawo ghanguwanda mu charu chose, ndi manenedu ghawo ku vigoti vya panupasi.”

¹⁹ Kweni ndititi, asi ŵanguziŵa Yisraele? Wadanga wakamba Mosese, “Ine ndikusosomoliyenge ku sanji ndi ŵambura mtundu, ndi kumkaraliskiyani ndi mtundu wambura kuwamo.”

²⁰ Kweni Yesaya wagangiya ukongwa, ndipo watiti, “Ndasanirika ndi wo ŵengavi kundipenja. Ndaŵa wakuwoneka kwaku ŵeniwo ŵalive kundilembe.”

²¹ Kweni kuchiri kwaku Yisraele watiti, “Zuŵa lose ndatambasuliya manja ghanguku khamu lamtafu ndi lamapiku-mapiku.”